មន្ត្រីទំនាក់ទំនងសាធារណៈរបស់មន្ទីរពេទ្យកុមារអង្គរ បានឱ្យដឹងថា ថវិកាដែលប្រមូលបានពីសប្បុរសជនទាំងក្នុងនឹងក្រៅស្រុក មានចំនួន៤០ម៉ឺនដុល្លារអាមេរិក ដើម្បីបន្តដំណើរការជួយសង្គ្រោះអ្នកជំងឺ។
ប្រធានការិយាល័យទំនាក់ទំនងសាធារណៈរបស់អង្គការមន្ទីរពេទ្យកុមារអង្គរ អ្នកនាង ស៊ិនកេត អរុណ បានប្រាប់វីអូឌីនៅថ្ងៃនេះថា ព្រឹត្តិការណ៍ «រត់ដើម្បីសប្បុរសធម៌ជាមួយសាយ» ចាប់ពីថ្ងៃទី២៦ ខែតុលា ដល់ថ្ងៃទី២០ ខែវិច្ឆកា វេលាម៉ោង២រសៀលម្សិលមិញ មន្ទីរពេទ្យកុមារអង្គរ បានទទួលថវិកាពីសប្បុរសជនទាំងក្នុងនឹងក្រៅប្រទេសមានចំនួន៤០ម៉ឺនដុល្លារ ។
អ្នកនាងបញ្ជាក់ថា ថវិកាដែលទទួលបានពីសប្បុរសជននឹងយកទៅជួយដល់កុមារដែលសម្រាកព្យាបាលនៅមន្ទីរពេទ្យកុមារអង្គរ ដោយឥតគិតថ្លៃ។ ជំងឺដែលត្រូវព្យាបាលរួមមាន ជំងឺអេដស៍ ជំងឺមហារីកភ្នែក មហារីកគ្រាប់ឈាម ជំងឺបេះដូង ជំងឺប្រព័ន្ធប្រសាទ និងជំងឺតំរង់នោមជាដើម។
អ្នកនាង អរុណ ក៏អំពាវនាវទៅសប្បុរសជនទាំងក្នុងស្រុកនិងក្រៅប្រទេសចូលរួមបរិច្ចាកថវិកាឱ្យបានច្រើន ដើម្បីជួយដល់កុមារដែលសម្រាកនៅមន្ទីរពេទ្យកុមារអង្គរឱ្យកាន់តែមានគុណភាពខ្ពស់។
យុទ្ធនាការ «រត់ដើម្បីសប្បុរសធម៌ជាមួយសាយ» បានចាប់ផ្តើមនៅថ្ងៃ២៦ ខែតុលា ឆ្នាំ២០២០ និងគ្រោងបញ្ចប់នៅថ្ងៃ១៣ ខែមករា ឆ្នាំ២០២១។ ហើយ សាយ រត់តែម្នាក់ឯងតាមបណ្តោយផ្លូវជុំវិញព្រំដែនប្រទេសកម្ពុជា ក្នុងខេត្តចំនួន២០ សរុប៩៩ថ្ងៃ៕
