យ៉ាងហោចណាស់ យុវជនបន្សាបគ្រឿងញៀនចំនួន៥០នាក់ បានហែកបង្អួចរត់គេចខ្លួនកាលពីយប់ថ្ងៃទី២០ខែនេះ ខណៈបច្ចុប្បន្នសមត្ថកិច្ចឃាត់ខ្លួនមកវិញបាន១៣នាក់។
ប្រធានមជ្ឈមណ្ឌលស្តារនីតិសម្បទាកែវផុស លោក វ៉ិត វ៉ាល់ដា ប្រាប់វីអូឌីនៅថ្ងៃនេះថា ក្រុមយុវជនបន្សាបគ្រឿងញៀនក្នុងជម្ឈមណ្ឌលស្តារនីតិសម្បទាកែវផុស ក្នុងខេត្តព្រះសីហនុ ចំនួន៥០នាក់ បានលួចរួចរត់ចេញពីមណ្ឌលកាលពីយប់ថ្ងៃទី២០ ខែវិច្ឆិកានេះ។
លោកបន្តថា ក្រោយពីរត់គេចខ្លួន សមត្ថកិច្ចចំរុះ រួមមាននគរបាល កងរាជអាវុធហត្ថស្រុកព្រៃនប់ និងស្រុកស្ទឹងហាវ សហការគ្នាជាមួយអាជ្ញាធរពាក់ព័ន្ធ បានឃាត់ខ្លួនយុវជនបានចំនួន១៣នាក់មកវិញ បើគិតត្រឹមថ្ងៃទី២២ ខែដដែលនេះ។
លោកមានប្រសាសន៍ថា៖ « មកដល់ថ្ងៃនេះ យើងឃាត់គាត់បាន១៣នាក់ ប៉ុន្តែឥឡូវខ្ញុំមិនទាន់បញ្ជាក់មូលហេតុទេ ខ្ញុំរវល់ជាប់ប្រជុំ»។
ចំណែកមនុស្ស៣៧នាក់ទៀត ក្រុមសមត្ថកិច្ចបានស្រាវជ្រាវរកឃើញថា មានអ្នកខ្លះទៅផ្ទះ និងខ្លះទៀតរត់ទៅតាមមិត្តភ័ក្ត។ ករណីនេះ លោកថា សមត្ថកិច្ចកំពុងស្រាវជ្រាវចាប់ពួកគេយកមកមណ្ឌលវិញ៕
