មន្ត្រីជាន់ខ្ពស់ក្រសួងបរិស្ថាន បន្តលើកទឹកចិត្តអាជ្ញាធរមូលដ្ឋាននិងប្រជាពលរដ្ឋឱ្យបង្កើនការចូលរួមដាំដើមឈើនៅតាមទីសាធារណៈ សាលារៀន វត្តអារាម និងនៅតាមស្ថាប័នរដ្ឋ ដើម្បីបង្កើនភាពបៃតង និងចូលរួមការពារបរិស្ថាននិងធនធានធម្មជាតិ។
រដ្ឋលេខាធិការក្រសួងបរិស្ថាន លោក នេត្រ ភក្ត្រា មានប្រសាសន៍ក្នុងការប្រារព្ធ«ទិវាអនាម័យបរិស្ថានជាតិ» នៅសាលាខេត្តព្រះវិហារ នៅថ្ងៃចន្ទនេះថា ព្រៃឈើដើរតួនាទីសំខាន់ក្នុងការការ ពារប្រព័ន្ធអេកូឡូស៊ី បង្កើនគុណភាពខ្យល់ ថែរក្សាគុណភាពដី និងការពារប្រភពទឹកក្រោមដី រួមនឹងអត្ថប្រយោជន៍ជាច្រើនទៀត ដែលចាំបាច់ត្រូវដាំបន្ថែមពីលើឈើធម្មជាតិដែលកម្ពុជាមាន។
ដោយមើលឃើញពីសារៈប្រយោជន៍សំខាន់របស់ដើមឈើសម្រាប់ភពផែនដី លោកបានថ្លែងដោយលើកទឹកចិត្តដល់ប្រជាពលរដ្ឋនិងអាជ្ញាធរមូលដ្ឋាន បន្តចូលរួមដាំដើមឈើនៅតាមផ្ទះនិងទីសាធារណៈនានា ដើម្បីបង្កើនភាពបៃតង និងជាផ្នែកមួយនៃការបន្ស៊ាំទៅនឹងការប្រែប្រួលអាកាសធាតុ។
លោក នេត្រ ភក្ត្រា បានបញ្ជាក់ថា៖ «ទាំងការបង្កើនភាពបៃតងនៅក្នុងសហគមន៍ដោយការដាំដើមឈើនិងការសម្អាតអនាម័យបរិស្ថានជាប្រចាំនោះ នឹងធ្វើឱ្យភូមិដ្ឋាន សហគមន៍ និងទីក្រុងរបស់យើងមានបរិស្ថានល្អស្អាត មានអនាម័យ និងផ្តល់នូវផាសុកភាពដល់ការរស់នៅ និងធ្វើឱ្យសហគមន៍របស់យើងមានសុខភាពល្អ»។
បើតាមលោក នេត្រ ភក្ត្រា បច្ចុប្បន្ន គម្របព្រៃឈើកម្ពុជា មានជាង៨,៥លានហិកតា ស្មើនឹង៤៦,៨៦% នៃផ្ទៃដីសរុបរបស់កម្ពុជា។ ដោយឡែក ផ្ទៃដីព្រៃឈើដែលស្ថិតក្រោមការការពារនិងអភិរក្សដោយក្រសួងបរិស្ថាន លោកថា មានទំហំប្រមាណ៧,៣លានហិកតា ដោយចែកចេញជា៦៥តំបន់ការពារធម្មជាតិ រួមមាន ឧទ្យានជាតិ ដែនជម្រកសត្វព្រៃ តំបន់ការពារទេសភាព តំបន់ប្រើប្រាស់ច្រើនយ៉ាង រួមនឹងរបៀងអភិរក្សជីវចម្រុះ។
ក្នុងពិធីប្រារព្ធ«ទិវាអនាម័យបរិស្ថានជាតិ»នេះដែរ អភិបាលខេត្តព្រះវិហារ លោក ប្រាក់ សុវណ្ណ បានក្រើនរំឭកនិងជំរុញឱ្យស្ថាប័នសាធារណៈនិងឯកជន អាជ្ញាធរគ្រប់លំដាប់ថ្នាក់ និងប្រជាពលរដ្ឋ ចូលរួមធ្វើអនាម័យនិងថែរក្សាបរិស្ថានជាប្រចាំនៅតាមមូលដ្ឋានរបស់ខ្លួន។
លោកក៏បានជំរុញឱ្យអាជ្ញាធរមូលដ្ឋាននិងស្ថាប័នពាក់ព័ន្ធ ធ្វើការអប់រំផ្សព្វផ្សាយដល់ប្រជាពលរដ្ឋពីការគ្រប់គ្រង ទុកដាក់សំរាម និងសំណល់រឹងឱ្យបានត្រឹមត្រូវផងដែរ៕
