មន្ត្រី៩នាក់ទៀត ត្រូវបានតែងតាំងជាមន្ត្រីជាន់ខ្ពស់នៃក្រសួងប្រៃសណីយ៍ និងទូរគមនាគមន៍ បន្ថែមទៅមន្ត្រីជាន់ខ្ពស់ដ៏ច្រើននៅក្រសួងមួយនេះ។
ក្នុងព្រះរាជក្រឹត្យចុះថ្ងៃទី១៩ ខែវិច្ឆិកា ព្រះមហាក្សត្រ សម្រេចព្រះបរមនាថ នរោត្ដម សីហមុនី បានត្រាស់បង្គាប់តែងតាំងមន្ត្រី៣រូបជារដ្ឋលេខាធិការ មន្ត្រី៤រូបជាអនុរដ្ឋលេខាធិការនៃក្រសួងប្រៃសណីយ៍ និងទូរគមនាគមន៍ ហើយមន្ត្រី២រូបទៀតជាថ្នាក់ដឹកនាំនៃនិយ័តករទូរគមនាគមន៍កម្ពុជា។
ព្រះមហាក្សត្រកម្ពុជា បានត្រាស់បង្គាប់តែងតាំងមន្ត្រីជាន់ខ្ពស់ទាំងនេះទៅតាមសំណើរបស់លោកនាយករដ្ឋមន្ត្រី ហ៊ុន សែន។
ការតែងតាំងមន្ត្រីជាន់ខ្ពស់បន្ថែមនេះ នាំឱ្យចំនួនរដ្ឋលេខាធិការនៅក្រសួងប្រៃសណីយ៍ និងទូរគមនាគមន៍ កើនឡើងដល់ចំនួន១៤រូប អនុរដ្ឋលេខាធិការកើនឡើងដល់ចំនួន២១រូប សម្រាប់រដ្ឋាភិបាលអាណត្តិទី៦នេះ៕
