រាជរដ្ឋាភិបាលកម្ពុជា ផ្តល់ម៉ាស់ចំនួន២លាននិងសម្ភារវេជ្ជសាស្ត្រមួយចំនួនទៀត ជូនដល់រដ្ឋាភិបាលនិងប្រជាជនមីយ៉ាន់ម៉ា ដើម្បីប្រើប្រាស់សម្រាប់ទប់ស្កាត់ការឆ្លងរីករាលដាលនៃជំងឺកូវីដ១៩។
យោងតាមលិខិតរបស់លោកនាយករដ្ឋមន្ត្រី ហ៊ុន សែន ផ្ញើជូនលោកស្រី អោង សានស៊ូជី ទីប្រឹក្សារដ្ឋនៃសាធារណរដ្ឋសហភាពមីយ៉ាន់ម៉ា នៅថ្ងៃទី២៤ ខែវិច្ឆិកា ឆ្នាំ២០២០នេះ បានឱ្យដឹងថា រដ្ឋមន្ត្រីក្រសួងសុខាភិបាលកម្ពុជា លោក ម៉ម ប៊ុនហេង នឹងនាំយកអំណោយម៉ាស់និងសម្ភារវេជ្ជសាស្ត្រទាំងនោះ ទៅប្រគល់ជូនរដ្ឋាភិបាលមីយ៉ាន់ម៉ា តាមរយៈយន្តហោះពិសេស នៅថ្ងៃទី២៦ ខែវិច្ឆិកា ខាងមុខនេះ។
លោកបន្តថា៖ «ជាមួយនឹងការខិតខំរួមគ្នា ខ្ញុំមានជំនឿយ៉ាងមុតមាំថា យើងនឹងទទួលបានជោគជ័យក្នុងការប្រយុទ្ធប្រឆាំងនឹងជំងឺកូវីដ១៩ ហើយយើងនឹងងើបឡើងវិញយ៉ាងរឹងមាំជាមួយគ្នា»។
បើតាមបញ្ជីរាយនាមអំណោយរបស់រាជរដ្ឋាភិបាលកម្ពុជា ផ្តល់ជូនរដ្ឋាភិបាលមីយ៉ាន់ម៉ានោះ មានដូចជា ម៉ាស់៣ប្រភេទ វ៉ែនតាការពារ សម្លៀកបំពាក់ការពារ ឧបករណ៍វាស់កម្តៅ របាំងការពារមុខ ម៉ាស៊ីនជួយដល់ការដកដង្ហើម ម៉ាស៊ីនតាមដានសញ្ញាជីវិត ម្សៅថ្នាំបាញ់សម្លាប់មេរោគ ស្បែកជើងកវែង និងទឹកសាប៊ូលាងដៃ។
លិខិតរបស់លោកនាយករដ្ឋមន្ត្រី ហ៊ុន សែន ក៏បានសម្តែងនូវការអបអរចំពោះលោកស្រី អោង សានស៊ូជី ចំពោះជ័យជម្នះរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ ក្នុងការបោះឆ្នោតសកលនៅប្រទេសមីយ៉ាន់ម៉ា នាពេលថ្មីៗនេះផងដែរ។
លោកថា៖ «ខ្ញុំសូមអះអាងជាថ្មីនូវការប្តេជ្ញាចិត្តធ្វើការយ៉ាងជិតស្និទ្ធជាមួយលោកជំទាវ ក្នុងក្របខណ្ឌទ្វេភាគីនិងតំបន់ ដើម្បីនាំមកនូវផលប្រយោជន៍ជាក់ស្តែងកាន់តែច្រើនថែមទៀតសម្រាប់ប្រទេសយើងទាំងពីរ និងវិបុលភាពដ៏ធំធេងសម្រាប់សហគមន៍អាស៊ាន»។
កាលពីថ្ងៃទី១៤ ខែវិច្ឆិកា ឆ្នាំ២០២០ កន្លងទៅថ្មីៗនេះ រាជរដ្ឋាភិបាលកម្ពុជាក៏បានផ្ដល់ជំនួយជាម៉ាស់ចំនួន២លាននិងបរិក្ខារពេទ្យផ្សេងទៀតដល់ប្រទេសឡាវផងដែរ ដើម្បីឱ្យប្រទេសជិតខាងកម្ពុជាមួយនេះ យកទៅប្រើប្រាស់សម្រាប់ទប់ស្កាត់ការឆ្លងរីករាលដាលនៃជំងឺកូវីដ១៩៕
