អង្គការសង្គមស៊ីវិលចំនួន១១ បង្ហាញការព្រួយបារម្ភចំពោះផលប៉ះពាល់ឆ្លងដែនដល់ប្រទេសតាមដងទន្លេមេគង្គផ្នែកខាងក្រោម ជាពិសេសបឹងទន្លេសាបកម្ពុជា ខណៈពួកគេរកឃើញថា អ្នកអភិវឌ្ឍន៍គម្រោងទំនប់វារីអគ្គិសនី សាណាខាំ លើដងទន្លេមេគង្គក្នុងប្រទេសឡាវ បានប្រើប្រាស់ទិន្នន័យចាស់សម្រាប់សិក្សាផលប៉ះពាល់។
ការព្រួយបារម្ភនេះ បានធ្វើឡើងស្របពេលដែលគណៈកម្មការទន្លេមេគង្គ កំពុងរៀបចំវេទិកាអ្នកពាក់ព័ន្ធថ្នាក់តំបន់លើកទី១០ ដើម្បីពិគ្រោះយោបល់ទៅលើសំណើគម្រោងទំនប់វារីអគ្គិសនីសាណាខាំ នៅលើតួមេទន្លេមេគង្គ នៅថ្ងៃទី២៤ ខែវិច្ឆិកា ឆ្នាំ២០២០នេះ នៅទីក្រុងប៉ាកសេ ប្រទេសឡាវ។
សេចក្តីថ្លែងការណ៍រួមរបស់អង្គការទាំង១១ ដែលធ្វើការលើវិស័យអភិបាលទឹកនិងធនធានធម្មជាតិនៅកម្ពុជា នៅថ្ងៃអង្គារនេះ បានលើកឡើងថា យោងតាមឯកសារគម្រោងទំនប់វារីអគ្គិសនី សាណាខាំ ពួកគេរកឃើញថា អ្នកអភិវឌ្ឍន៍គម្រោងបានប្រើប្រាស់ទិន្នន័យចន្លោះឆ្នាំ២០១០-២០១១ មកធ្វើជាមូលដ្ឋានក្នុងការសិក្សាផលប៉ះពាល់ជលផល ជលសាស្ត្រ លំហូរដីល្បាប់ គុណភាពទឹក សុវត្ថិភាពទំនប់ និងផលប៉ះពាល់នានា ទោះជាមានការសិក្សាថ្មីៗត្រូវបានធ្វើរួចហើយក្តី។
សេចក្តីថ្លែងការណ៍បន្តថា៖ «ការប្រើទិន្នន័យចាស់ជាមូលដ្ឋានក្នុងការសិក្សានេះ បានបង្កើតក្តីមន្ទិលអំពីគុណភាពរបស់របាយការណ៍គម្រោង ថាវានឹងមិនឆ្លើយតបទៅនឹងស្ថានភាពប្រែប្រួលនាពេលបច្ចុប្បន្នរបស់ទន្លេមេគង្គ ដែលមិនអាចផ្តល់ព័ត៌មានគ្រប់គ្រាន់និងគ្រប់ជ្រុងជ្រោយដល់ក្រុមប្រឹក្សារួម សម្រាប់ជាមូលដ្ឋានក្នុងការផ្តល់នូវការណែនាំផ្នែកបច្ចេកទេសដែលអាចទុកចិត្តបានឡើយ»។
អង្គការទាំងនោះមានដូចជា អង្គការសកម្មភាពដើម្បីអភិវឌ្ឍន៍ វេទិកាអង្គការមិនមែនរដ្ឋាភិបាលស្តីពីកម្ពុជា សមាគមថែរក្សាបរិស្ថាននិងវប្បធម៌ ក្រុមប្រឹក្សាយុវជនកម្ពុជា សម្ព័ន្ធប្រជានេសាទកម្ពុជា សម្ព័ន្ធភាពដើម្បីអភិរក្សជលផល និងអង្គការមួយចំនួនទៀត។
អង្គការទាំងនោះក៏បានលើកឡើងដែរថា ការប្រែប្រួលអាកាសធាតុជាកត្តាចម្បងដែលធ្វើឱ្យកម្ពស់ទឹកទន្លេមេគង្គនិងបឹងទន្លេសាប មានកម្រិតទាបក្នុងរយៈពេល២ឆ្នាំចុងក្រោយនេះ ប៉ុន្តែវត្តមានរបស់ទំនប់វារីអគ្គិសនីកាន់តែច្រើនឡើងៗនៅលើអាងទន្លេមេគង្គនិងដៃទន្លេ ក៏បានបង្កើនក្តីបារម្ភកាន់តែខ្លាំងឡើងៗអំពីនិរន្តរភាពរបស់ទន្លេមេង្គនិងបឹងទន្លេសាបនៅក្នុងប្រទេសកម្ពុជា។
ករណីនេះ អង្គការទាំង១១ បានស្នើដល់គណៈកម្មការទន្លេមេគង្គ (MRC) ដែលមានប្រទេសទាំង៤ជាសមាជិក រួមមាន កម្ពុជា ឡាវ ថៃ និងវៀតណាម ត្រូវមានជំហរម៉ឺងម៉ាត់ តម្រូវឱ្យអ្នកអភិវឌ្ឍន៍គម្រោងប្រើប្រាស់ទិន្នន័យថ្មីបំផុត ជាមូលដ្ឋានក្នុងការសិក្សាគម្រោង ដើម្បីអាចផ្តល់នូវព័ត៌មានគ្រប់គ្រាន់និងគ្រប់ជ្រុងជ្រោយ សម្រាប់ការពិគ្រោះយោបល់ជាមួយអ្នកពាក់ព័ន្ធ។
ពួកគេក៏បានស្នើដល់ភាគីពាក់ព័ន្ធ រង់ចាំមើលលទ្ធផលនៃការអនុវត្តគម្រោងសាកល្បង ស្តីពី ការតាមដានបរិស្ថានរួមនៃដំណើរការរបស់ទំនប់ សាយ៉ាបូរី និង ដនសាហុង ឆ្នាំ២០២០-២០២១ ដើម្បីយកជាមូលដ្ឋានក្នុងការសិក្សាកែលម្អគម្រោងថ្មីៗ ដែលអាចជួយកាត់បន្ថយផលប៉ះពាល់ជាអវិជ្ជមានដល់ទន្លេមេគង្គ។
លេខាធិការដ្ឋានសម្ព័ន្ធទន្លេកម្ពុជា លោក ម៉ក់ ប៊ុនធឿន ស្នើទៅរដ្ឋាភិបាលឡាវ និងអ្នកអភិវឌ្ឍន៍គម្រោង ធ្វើការពិគ្រោះយោបល់ជាមួយភាគីពាក់ព័ន្ធ មុននឹងសាសង់ទំបន់វារីអគ្គិសនីនេះ។
លោកក៏បានស្នើឱ្យពន្យារពេលពិគ្រោះយោបល់លើគម្រោងទំនប់វារីអគ្គិសនីនានា ក្នុងអំឡុងពេលមានការរីករាលដាលនៃជំងឺកូវីដ១៩ ដើម្បីធានាឱ្យមានការផ្តល់យោបល់បានពេញលេញពីគ្រប់អ្នកពាក់ព័ន្ធ។
លោកថា៖ «ការស្នើនេះ ដើម្បីឱ្យលោកឆ្លើយតបនឹងការកង្វល់របស់អង្គការសង្គមស៊ីវិលពីកម្ពុជា អំពីផលប៉ះពាល់ឆ្លងដែនដែលអាចនឹងកើតមានឡើងនៅថ្ងៃមុខ បើសិនជាគម្រោងនេះសាងសង់»។
វីអូឌី មិនទាន់អាចសុំការអត្ថាធិប្បាយជុំវិញករណីនេះពីលោកបណ្ឌិត អាន ពេជ្រហត្ថដា នាយកប្រតិបត្តិនៃលេខាធិការដ្ឋានគណៈកម្មការទន្លេមេគង្គ បានទេ នៅថ្ងៃអង្គារនេះ។
បើយោងតាមរបាយការណ៍ Council Study ដែលធ្វើឡើងក្នុងរយៈពេល៦ឆ្នាំ ពីឆ្នាំ២០១២-២០១៧ ដោយគណៈកម្មការទន្លេមេគង្គ បង្ហាញថា ទំនប់វារីអគ្គិសនីធំៗចំនួន១១ នៅលើតួមេទន្លេមេគង្គក្រោម និងទំនប់វារីអគ្គិសនីនៅតាមដៃទន្លេមេគង្គចំនួន១២០ទៀត ដែលគ្រោងសាងសង់រួចនៅត្រឹមឆ្នាំ២០៤០ នឹងបង្កគ្រោះថ្នាក់ដល់ប្រព័ន្ធអេកូឡូស៊ី សេដ្ឋកិច្ច និងសន្តិសុខស្បៀងក្នុងតំបន់៕
