ក្រសួងសុខាភិបាល ឱ្យដឹងថា មានករណីជាសះស្បើយជំងឺកូវីដ១៩ម្នាក់ ជាបុរសជនជាតិឥណ្ឌា ដែលធ្វើឱ្យចំនួនអ្នកនៅសម្រាកព្យាបាលជំងឺនេះ នៅសល់១០នាក់ទៀត។
សេចក្តីជូនដំណឹងរបស់ក្រសួងសុខាភិបាល នៅថ្ងៃទី២៤ ខែវិច្ឆិកា ឆ្នាំ២០២០ បានឱ្យដឹងថា អ្នកជាសះស្បើយពីជំងឺកូវីដ១៩នោះ ជាបុរសជនជាតិឥណ្ឌា អាយុ៣៣ឆ្នាំ បានធ្វើដំណើរមកពីប្រទេសឥណ្ឌា មកដល់កម្ពុជា នៅថ្ងៃទី០៥ ខែវិច្ឆិកា ឆ្នាំ២០២០ និងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។
ក្រសួងបន្តថា មិនមានករណីវិជ្ជមានវីរុសកូវីដ១៩ថ្មីនោះទេ នៅថ្ងៃទី២៣ ខែវិច្ឆិកា ឆ្នាំ២០២០។
បើតាមក្រសួងសុខាភិបាល គិតត្រឹមម៉ោង៧ព្រឹក ថ្ងៃទី២៤ ខែវិច្ឆិកា ឆ្នាំ២០២០ កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន៣០៦នាក់ ក្នុងនោះព្យាបាលជាសះស្បើយចំនួន២៩៦នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន១០នាក់៕
