ក្រសួងសុខាភិបាល ប្រកាសរកឃើញអ្នកឆ្លងជំងឺកូវីដ១៩ថ្មី ចំនួន១នាក់ លើបុរសជនជាតិនេប៉ាល់ដែលធ្លាប់ឆ្លងវីរុសនេះម្តងរួចមកហើយ និងមានករណីជាសះស្បើយចំនួន២នាក់។
សេចក្តីជូនដំណឹងរបស់ក្រសួងសុខាភិបាល នៅថ្ងៃទី២៥ ខែវិច្ឆិកា ឆ្នាំ២០២០ បានឱ្យដឹងថា អ្នកដែលឆ្លងជំងឺកូវីដ១៩ ដែលរកឃើញថ្មីនោះ ជាបុរសជនជាតិនេប៉ាល់ អាយុ៣៧ឆ្នាំ បានធ្វើដំណើរមកពីប្រទេសនេប៉ាល់ ទៅដូហា និងបន្តជើងហោះហើរនៅប្រទេសកូរ៉េខាងត្បូង មកដល់កម្ពុជា កាលពីថ្ងៃទី១១ ខែវិច្ឆិកា។
ក្រសួងបញ្ជាក់ថា៖ «អ្នកជំងឺរូបនេះ ធ្លាប់មានវិជ្ជមានវីរុសកូវីដ១៩ កាលពីនៅប្រទេសនេប៉ាល់ នៅថ្ងៃទី១៩ ខែតុលា ឆ្នាំ២០២០ និងបានធ្វើចត្តាឡីស័កចំនួន១៤ថ្ងៃនៅពេលនោះ។ នៅថ្ងៃទី២ និងទី៨ ខែវិច្ឆិកា ឆ្នាំ២០២០ គាត់បានធ្វើតេស្តឡើងវិញ ដោយទទួលបានលទ្ធផលអវិជ្ជមានវីរុសកូវីដ១៩ទាំងពីរលើក»។
ដោយឡែក សម្រាប់អ្នកជាសះស្បើយពីជំងឺកូវីដ១៩វិញ ក្រសួងថា ជាបុរសជនជាតិខ្មែរ អាយុ ៣៤ឆ្នាំ បានធ្វើដំណើរមកពីប្រទេសជប៉ុន មកដល់កម្ពុជា នៅថ្ងៃទី២៦ ខែតុលា ឆ្នាំ២០២០ និងបុរសជនជាតិអាមេរិកកាំង អាយុ ៦៥ឆ្នាំ មកពីសហរដ្ឋអាមេរិក មកដល់កម្ពុជា កាលពីថ្ងៃទី១៣ ខែវិច្ឆិកា ឆ្នាំ២០២០ ហើយពួកគេត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។
បើតាមក្រសួងសុខាភិបាល គិតត្រឹមម៉ោង៧ព្រឹកថ្ងៃទី២៥ ខែវិច្ឆិកា ឆ្នាំ២០២០ កម្ពុជា បានរកឃើញអ្នកឆ្លងជំងឺកូវីដ១៩សរុបចំនួន ៣០៧នាក់ ក្នុងនោះព្យាបាលជាសះស្បើយចំនួន ២៩៨នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ៩នាក់៕
