បុគ្គលិកចំនួន៣នាក់ ធ្វើការនៅសណ្ឋាគារ ឡឺ ម៉េរីឌាន អង្គរ (Le Meridien Angkor) ស្ថិតក្នុងខេត្តសៀមរាប មិនទាន់ទទួលបានសំណងនៅឡើយ ខណៈបុគ្គលិកផ្សេងទៀតទទួលយកសំណងទាំងបង្ខំចិត្ត ក្រោយសណ្ឋាគារនេះប្រកាសបិទអាជីវកម្មរបស់ខ្លួនបណ្តោះអាសន្ន។
ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា លោក ទូច កុសល ប្រាប់វីអូឌីនៅព្រហស្បតិ៍នេះថា ម្ចាស់សណ្ឋាគារ ឡឺ ម៉េរីឌាន អង្គរ (Le Meridien Angkor) បានប្រកាសបិទសណ្ឋាគាររបស់ខ្លួនជាបណ្តោះអាសន្ន កាលពីថ្ងៃទី២៣ ខែវិច្ឆិកា ឆ្នាំ២០២០ ក្រោមហេតុផលមានបញ្ហាផ្នែកសេដ្ឋកិច្ចដោយសារជំងឺកូវីដ-១៩។
ទោះយ៉ាងណា លោកយល់ថា ការប្រកាសបិទសណ្ឋាគារនេះជាបណ្តោះអាសន្ន មិនមែនជាហេុតផលដោយសារបញ្ហាជំងឺកូវីដទាំងស្រុងនោះទេ ប៉ុន្តែអាចជាចេតនាចង់លុបបំបាត់សហជីពនិងបញ្ចប់ការតវ៉ារបស់កម្មករ ខណៈសណ្ឋាគារនេះបានបញ្ឈប់បុគ្គលិក៣នាក់ មិនទាន់ដោះស្រាយចប់។
លោកបន្ថែមថា៖ «ដោយសារនៅទីនោះ កន្លងមក វាមានវិវាទអូសបន្លាយរហូតមកដល់ពេលនេះ គឺករណីបញ្ឈប់ថ្នាក់ដឹកនាំនិងសកម្មជនសហជីពស្រ្តីចំនួន៣នាក់ពីការងារ។ ហើយពួកគាត់នៅធ្វើការ បន្តការងារ អ៊ីចឹងខ្ញុំគិតថា រឿងបិទនេះ គេចង់ ទី១ ចេតនារបស់គេ គឺចង់រំលាយសហជីពចោល ទី២ គេចង់បញ្ចប់រឿងហ្នឹង កុំឱ្យមានការតវ៉ាទៀត»។
ថ្នាក់ដឹកនាំសហជីពនិងសកម្មជនសហជីពកម្មករនិយោជិតវិស័យទេសចរណ៍ នៃសណ្ឋាគារ ឡឺ ម៉េរីឌាន អង្គរ រួមមាន អ្នកស្រី ខាំ សុភ័ក្ត្រ អ្នកស្រី ឌឿម ឆៃយ៉ា និង អ្នកស្រី សុខ ណារ៉ែន ត្រូវម្ចាស់សណ្ឋាគារបញ្ឈប់ពីការងារជាបន្តបន្ទាប់ នៅថ្ងៃទី៩ និងទី១០ ខែកក្កដា ឆ្នាំ២០២០ ក្រោយពីអ្នកទាំង៣នាក់នោះបានដាក់សំណើទៅសណ្ឋាគារ ទាមទារលក្ខខណ្ឌការងារមួយចំនួនជូនបុគ្គលិកផ្សេងៗទៀត។
ក្រោយមក ចាប់ពីអំឡុងដើមខែសីហា ឆ្នាំ២០២០ បុគ្គលិកប្រមាណ៤០នាក់របស់សណ្ឋាគារនេះ បាននាំគ្នាឈរលើកបដាតវ៉ាមុខសណ្ឋាគារជាបន្តបន្ទាប់ ដើម្បីទាមទារទៅថៅកែឱ្យទទួលយកតំណាងពួកគេ៣នាក់ចូលបម្រើការងារវិញ។
ប្រធានគណៈកម្មការស្ត្រីនៃសហជីពកម្មករនិយោជិតវិស័យទេសចរណ៍ នៃសណ្ឋាគារ ឡឺ ម៉េរីឌាន អង្គរ អ្នកស្រី ឌឿម ឆៃយ៉ា និយាយថា ការបិទសណ្ឋាគារជាបណ្តោះអាសន្ននេះ ខាងម្ចាស់សណ្ឋាគារមិនបានដោះស្រាយសំណងជូនបុគ្គលិកត្រឹមត្រូវតាមច្បាប់ស្តីពីការងារឡើយ ជាពិសេស បុគ្គលិក៣នាក់ដែលជាថ្នាក់ដឹកនាំសហជីពក្នុងសណ្ឋាគារនេះ។
អ្នកស្រីបន្ថែមថា៖ «ពួកខ្ញុំបីនាក់ហ្នឹង វានៅជាប់គាំងត្រង់ថា ខាងក្រុមហ៊ុនគាត់អត់បានគិតគូរលុយរយៈពេលដែលគាត់បញ្ឈប់ខ្ញុំពីការងាររយៈពេល៤ខែហ្នឹងទេ អ៊ីចឹងពួកខ្ញុំនៅទាមទារប្រាក់ទាំងអស់ហ្នឹងមកវិញ បូកនឹងអត្ថប្រយោជន៍ផ្សេងៗ ដូចបុគ្គលិកផ្សេងៗទៀតដែរ»។
បើតាមអ្នកស្រី ឌឿម ឆៃយ៉ា ភាគីសណ្ឋាគារបានផ្តល់សំណងដល់បុគ្គលិកចំនួន៥ចំណុច មានអតីតភាពការងារមុនឆ្នាំ២០១៩ ប្រាក់អតីតភាពការងារឆ្នាំ២០២០ ប្រាក់ជួសឱ្យការជូនដំណឹងមុន ប្រាក់ជួសឱ្យការឈប់សម្រាកប្រចាំឆ្នាំ និងប្រាក់ឈ្នួលចុងក្រោយ ខណៈប្រាក់សំណងជំងឺចិត្តមិនត្រូវបានទូរទាត់ឱ្យឡើយ។
វិអូឌី មិនអាចសុំការឆ្លើយតបពីប្រធានទីផ្សារនិងផ្នែកលក់ នៃសណ្ឋាគារ ឡឺ ម៉េរីឌាន អង្គរ អ្នកស្រី ពូច អង្គឧសភាព និងថ្នាក់ដឹកនាំផ្សេងទៀតបានទេ ដោយទូរសព្ទចូលគ្មានអ្នកទទួល។ ប៉ុន្តែអ្នកស្រីបាននិយាយកាលពីដើមខែសីហាថា ក្រុមហ៊ុនសម្រេចបញ្ឈប់បុគ្គលិក៣នាក់នោះ ដោយសារពួកគេបានប្រព្រឹត្តខុសច្បាប់ និងធ្វើខុសគោលការណ៍របស់សណ្ឋាគារធ្ងន់ធ្ងរ។
ប្រធានមន្ទីរការងារខេត្តសៀមរាប លោក ច័ន្ទ សុខុមចិត្តា បានបញ្ជាក់ថា សណ្ឋាគារ ឡឺ ម៉េរីឌាន អង្គរ ពិតជាបានប្រកាសបិទទ្វារជាបណ្តោះអាសន្នពិតមែន ដោយសារអាជីវកម្មរកប្រាក់ចំណូលមិនបាន អំឡុងពេលមានការរាតត្បាតជំងឺកូវីដ១៩។
លោកបន្តថា បើទោះជាមានការបិទជាបណ្តោះអាសន្ន ប៉ុន្តែម្ចាស់សណ្ឋាគារបានសម្របសម្រួលដោះស្រាយសំណងជូនបុគ្គលិកអស់ហើយ នៅសល់តែបុគ្គលិក៣នាក់ដែលម្ចាស់សណ្ឋាគារបានបញ្ឈប់ពីការងារតែប៉ុណ្ណោះ។ លោកថា ករណីបុគ្គលិក៣នាក់នោះ គឺម្ចាស់សណ្ឋាគារកំពុងពិភាក្សាគ្នាថា ត្រូវផ្តល់សំណងដូចបុគ្គលិកផ្សេងទៀតឬអត់។
លោកបន្ថែមថា៖ «បុគ្គលិកដែលនៅធ្វើការងារហ្នឹង គឺគេបានទូរទាត់សំណងឱ្យទាំងអស់ ប៉ុន្តែសម្រាប់បុគ្គលិក៣នាក់ដែលតវ៉ា ដោយសារគាត់បញ្ឈប់មុនហ្នឹង បានសុំសំណងឱ្យបានដូចបុគ្គលិកដែលធ្វើការដែរ ឥលូវខាងក្រុមហ៊ុនគេកំពុងតែពិភាក្សាគ្នាលើរឿងនេះ»។
បើតាមក្រុមបុគ្គលិក សណ្ឋាគារ ឡឺ ម៉េរីឌាន អង្គរ មានបុគ្គលិកសរុបប្រមាណ១៥០នាក់៕
