ក្រសួងវប្បធម៌ និងវិចិត្រសិល្បៈ បានប្រកាសឱ្យបិទដំណើរការជាបណ្តោះអាសន្ន នូវរោងភាពយន្ត រោងសម្តែងសិល្បៈ និងសារមន្ទីរទូទាំងប្រទេស ដើម្បីចូលរួមទប់ស្កាត់ការរីករាលដាលជំងឺកូវីដ-១៩ ក្នុងសហគមន៍។
សេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈ នៅថ្ងៃទី៣០ ខែវិច្ឆិកានេះ ឱ្យដឹងថា ក្រសួងសម្រេចឱ្យផ្អាកការចូលទស្សនាសារមន្ទីរ ផ្អាកដំណើរការនូវរោងភាពយន្ត និងរោងសម្តែងសិល្បៈគ្រប់ប្រភេទទូទាំងប្រទេស រយៈពេល២សប្តាហ៍ជាបណ្តោះអាសន្ន ដោយអនុវត្តចាប់ពីថ្ងៃចន្ទ ទី៣០ ខែវិច្ឆិកា ឆ្នាំ២០២០នេះទៅ។
ក្រសួងបន្តថា ប្រធានមន្ទីរវប្បធម៌រាជធានី-ខេត្ត សាធារណជន សមាគមមគ្គុទេស្ទក៏ទេសចរណ៍ ទីភ្នាក់ងារទេសចរណ៍ ក្រុមហ៊ុនទេសចរណ៍ និងភ្ញៀវទេសចរជាតិ-អន្តរជាតិ អនុវត្តតាមការជូនដំណឹងនេះដោយស្មារតីទទួលខុសត្រូវខ្ពស់។
គួរបញ្ជាក់ថា នេះជាលើកទី៣ហើយ ដែលរាជរដ្ឋាភិបាល បានសម្រេចផ្អាកជាបណ្តោះអាសន្ននូវរោងភាពយន្ត រោងសម្តែងសិល្បៈ និងសារមន្ទីរ ក្រោយពីកម្ពុជារកឃើញករណីឆ្លងជំងឺកូវីដ១៩ កាលពីអំឡុងខែមីនា ឆ្នាំ២០២០ និងក្រោយមានព្រឹត្តិការណ៍៣វិច្ឆិកា ដែលរកឃើញមានករណីឆ្លងជំងឺកូវីដ១៩ ពីរដ្ឋមន្ត្រីការបរទេសហុងគ្រី ដែលបានមកបំពេញទស្សនកិច្ចផ្លូវការនៅកម្ពុជា កាលពីថ្ងៃទី៣ ខែវិច្ឆិកា៕
