ប្រជាពលរដ្ឋមួយចំនួនរស់នៅក្នុងស្រុកស្អាងខេត្តកណ្តាលលើកឡើងថា ពួកគាត់ជួបការលំបាកដោយមិនមានកន្លែងទុកដាក់សំរាមឱ្យបានត្រឹមត្រូវ មានតែការគរដុត និងអ្នកខ្លះទៀតទម្លាក់ចោលក្នុងទឹកទន្លេបាសាក់។
ប្រជាពលរដ្ឋដែលក្រុមការងារយើងបានសាកសួរថ្លែងថា ពួកគាត់មិនបានយល់ពីការបែងចែក និងការទុកដាក់សំរាមឱ្យបានត្រឹមត្រូវទេគឺចោលតាមទម្លាប់តាំងពីដូនតា។
លោក រិន ជាពលរដ្ឋម្នាក់រស់នៅ ភូមិកោះខ្សាច់ទន្លា ស្រុកស្អាង ខេត្តកណ្តាល បាននិយាយថា នៅក្នុងភូមិនេះ មិនមានរថយន្តដឹកជញ្ជូនសំរាមទេ ហើយអាជ្ញាធរក៏មិនបានរៀបចំកន្លែងទុកដាក់ឱ្យបានត្រឹមត្រូវដែរ។ លោកថា ដោយសារគ្មានជម្រើស អ្នកខ្លះយកទៅគរទុកក្បែរច្រាំងទន្លេឬ ចាក់បណ្តែតទឹកទន្លេ។
លោក រិន៖«សំរាមខ្លះជួនកាលគេយកចាក់ចូលក្នុងទន្ល ខ្លះគេដាក់នៅកៀនច្រាំងគេដុត ខ្លះទម្លាក់ទន្លេ ខែទឹកគេទម្លាក់ទន្លេ»។
លោក រិន បន្តថា សំរាមចោលក្នុងទន្លេមានគ្រប់ប្រភេទ ហើយរូបគាត់ពេលយកគោឱ្យចុះផឹកទឹក និងលាងទឹកក្នុងទន្លេ ក៏ធ្លាប់មុតជើងជាមួយអំបែងកែវ។
ពលរដ្ឋរស់នៅភូមិក្បាលកោះម្នាក់ទៀត អ្នកស្រីអែម លើកឡើងថា ជាទម្លាប់អ្នកភូមិកន្លែងគាត់រស់នៅក៏ចោលសំរាមក្នុងទន្លេ អ្នកនៅលើខ្សែទឹកក៏ចោលសំរាមក្នុងទន្លេ។ ពេលខ្លះសំរាមអ្នកចោលលើខ្សែទឹកមកគរពូននៅចំណុចភូមិពួកគាត់រស់នៅ។
អ្នកស្រី អែម៖«ជាទូទៅដុតវា ហើយប្រមូលបោះចោលបណ្តែតទឹកទៅ [ ] ម៉ាវិកមុនទឹកឡើង សំរាមហៀមកពេញ នាំគ្នាកាយសំរាម គេបោះចោលពីលើៗមក យើងនៅចំកណ្តាលកោះសំរាមមក ទើៗយើងចេះតែរើចោយទៅ វាមិនមែនអណ្តែតទៅអស់ណា យើងឃើញយើងរុញចោលទៅ វាចេះតែអណ្តែតទៅទៀត»។
អ្នកស្រីអែម ថ្លែងថា រូបគាត់ និងអ្នកភូមិនៅពេលនេះ មិនហ៊ានបរិភោគទឹកទន្លេដូចមុនទៀតទេ។
អ្នកស្រី អែម«ខ្ញុំបារម្ភ អីឡូវមិនដែលហូបទឹកទន្លេទេ ពីមុនហូបតែទឹកទន្លេ ឥឡូវមិនដែលហូបទេ បើលេងទម្លាក់មកស្អីៗជុំទិស អណ្តែតមក ចាំមើលៗថង់ប៉ុនៗណាណី ណាច្រកប៉ាវច្រកអីទម្លាក់ពីលើមកម៉ង ប៉ុណ្ណាណី»។
អ្នកស្រី ជិត សុផល រស់នៅក្នុងភូមិស្វាយតានី ឃុំស្វាយប្រទាល អ្នកស្រីធ្វើរបងជុំវិញដីការពារកុំឱ្យសំរាមអណ្តែតតាមទឹកចូលក្នុងខែវស្សា ប៉ុន្តែការពារមិនជាប់ទេ។ អ្នកស្រីបន្តថា ពេលទឹកស្រកវិញរូបគាត់ធ្វើដោយផ្ទាល់ និងជួលគេឱ្យជួយប្រមូលសំរាមដែលអណ្តែតចូលលើដីរបស់គាត់ ។
អ្នកស្រី ជិត សុផល៖«តែដល់ខែប្រាំងមក ខ្ញុំមានទាញទ្វារបើកចេញចូល ជួលគេដុត បើមិនដុតមិនជួលគេធ្វើ សំរាមច្រើន សំរាមហូរមក មួយប៉េៗមកហ្មង ពេលរីងទឹកទៅ មានគំនរ សំរាមនោះមួយដុំ នោះមួយដុំ »។
អ្នកស្រីបន្ថែមថា អ្នកស្រីព្រួយបារម្ភចំពោះការបោះចោលសំរាម ដែលសំអាតតែក្នុងផ្ទះរបស់ខ្លូនឯង ហើយយកទៅបោះចោលនៅកន្លែងដទៃដោយមិនគិតពីអ្នកផ្សេង អ្នកស្រីចង់ឱ្យប្រជាពលរដ្ឋចូលរួមយល់ដឹងនិងអនុវត្តន៍ទាំងអស់គ្នា។
មេឃុំស្វាយប្រទាលលោក នួន សឿន មានប្រសាសន៍ថា អាជ្ញាធរឃុំកំពុងរៀបចំរបាយការណ៍ចំនួនពលរដ្ឋរស់នៅក្នុងឃុំ ដើម្បីរៀបចំផែនការទុកដាក់សំរាមឱ្យបានត្រឹមត្រូវ។ លោកបន្តថា អាជ្ញាធរឃុំកំពុងរង់ចាំរថយន្ត និងរ៉ឺម៉កដឹកសំរាម ដែលផ្តល់ឱ្យដោយក្រសួងបរិស្ថាន។
លោក នួន សឿន ថ្លែងថា អាជ្ញាធរមានការលំបាកក្នុងការពន្យល់ពលរដ្ឋពីការបែងចែកនិងទុកដាក់សំរាម ព្រោះរថយន្តដឹកសំរាមមិនទាន់មកដល់។
លោក នួន សឿន ៖«បើសិនជាមានអង្គការចូលមកពន្យល់ខ្ញុំអរគុណ បើយើងពន្យល់មុនដំណើរការ យើងពិបាកពន្យល់គេដែរ បើគេសួមកវិញ ឪឡូវឡានសំរាម យកថ្ងៃណា យើងឆ្លើយអត់ទាន់រួច ពីការបែងចែកសំរាម»។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានមានប្រសាន៍ថាបើសំណល់ប្លាស្ទិចរលាយ វានិងបង្កើតជាមីក្រូប្លាស្ទិចដែលជាសារធាតុតូចៗរលាយចេញពីប្លាស្ទិច និងក្លាយទៅជាសារធាតុពុល ដែលប៉ះពាល់ដល់ជីវចម្រុះផ្សេងៗ ដូចជាសត្វត្រីនិងរុក្ខជាតិផ្សេងៗទៀត។
លោកបញ្ជាក់ថា សំរាមដែលបង្កើតឡើងនៅប្រទេសកម្ពុជាក្នុងមួយថ្ងៃមានជាង១ម៉ឺនតោន។ លោកបន្តថា ការកាត់បន្ថយសំរាមមានតែប្រជាពលរដ្ឋទប់ស្តាត់ការប្រើប្រាស់ប្លាស្ទិចនិងញែកសំរាមទៅតាមប្រភេទដើម្បីកាត់បន្ថយសំរាមដោយសំរាមសរីរាង្គអាចធ្វើជាជីកំប៉ុស្តិ៍ ប្លាស្ទិចអាចប្រើប្រាស់ឡើងវិញឬកែច្នៃ និងសំណល់គ្រោះថ្នាក់ត្រូវការគ្រប់គ្រងឱ្យបានល្អ៕
អត្ថបទដោយ នង ម៉ៃចរីយា
