ប្រជាពលរដ្ឋជាអ្នកដំណើរ និងអ្នករស់នៅក្បែរៗរង្វង់មូលចោមចៅក្នុងរាជធានីភ្នំពេញបានបង្ហាញពីការព្រួយបារម្ភ ចំពោះសុខភាព និងបញ្ហាលំបាកផ្សេងៗដោយសារដីហុយ។
ពលរដ្ឋម្នាក់ដែលរស់នៅម្តុំរង្វង់មូលចោមចៅ លោក ស៊ុ វុទ្ធី បានរៀបរាប់ថា ពលរដ្ឋនៅម្តុំនោះមានការលំបាកទាំងការរស់នៅ ធ្វើដំណើរ និង ប្រកបរបរផ្សេងៗ។ លោក ស៊ុ វុទ្ធី បង្ហាញការព្រួយបារម្ភខ្លាំងចំពោះសុខភាពក្មេងដែលត្រូវពាក់ម៉ាស់ជាប្រចាំទោះនៅផ្ទះក៏ដោយ។
លោក សៀន សីហា ដែលតែងតែធ្វើដំណើរជាប្រចាំឆ្លងកាត់រង្វង់មូលចោមចៅ ដោយពេលខ្លះ ធ្វើដំណើរតាមផ្លូវជាតិលេខ៤ និងពេលខ្លះធ្វើដំណើរតាមផ្លូវជាតិលេខ៣។ លោកថា ពេលធ្វើដំណើរតាមម៉ូតូម្តងៗ គាត់ត្រូវពាក់ម៉ាស់ និង ពាក់វ៉ែនតា ដើម្បីការពារកុំឱ្យដីចូលភ្នែក និង ច្រមុះ ។
ទាំងប្រជាពលរដ្ឋ អ្នកដំណើរ និង អ្នកប្រកបអាជីវកម្មនៅតំបន់នោះអំពាវនាវដល់អាជ្ញាធរពាក់ព័ន្ធ ឱ្យពន្លឿនដោះស្រាយបញ្ហានេះឱ្យបានឆាប់។
ជុំវិញបញ្ហានេះ ចៅសង្កាត់ចោមចៅ២ លោក វ៉ា សារ៉ង មានប្រសាសន៍ថា អាជ្ញាធរបានដឹងបញ្ហានេះ ហើយក៏កំពុងតែដោះស្រាយដែរ។ លោកបន្តថា អាជ្ញាធរបានប្រើប្រាស់រថយន្តដឹកទឹក ស្រោចតាមតំបន់នោះជាប្រចាំដើម្បីកុំឱ្យហ៊ុយប៉ះពាល់ពលរដ្ឋ។
នៅម្តុំរង្វល់មូលចោមចៅ រួមទាំងផ្លូវជាតិលេខ៣ និងលេខ៤ ផងកំពុងស្ថិតនៅក្នុងដំណើរការសាងសង់សំណង់ផ្សេងៗក្នុងគម្រោងរបស់រដ្ឋ ហើយផ្លូវទាំងនេះក៏មានការមមាញឹកក្នុងការធ្វើដំណើរ និងដឹកជញ្ជូនទំនិញ មានទាំងទំនិញក្នុងស្រុក និងទំនិញដឹកចេញដឹកចូលទៅកាន់កំពង់ផែ នាំចេញនិងនាំចូលក្នុងប្រទេសផង៕
អត្ថបទដោយ ឈឹម សុភទ្ទ
