តុលាការខេត្តក្រចេះ បានសម្រេចឃុំខ្លួនអ្នកសារព័ត៌មាន៣នាក់ជាបណ្តោះអាសន្ននៅពន្ធនាគារ ពាក់ព័ន្ធនឹងបទចោទ កំហែងយក ឆបោក និងបទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ។
ក្នុងដីកាបង្គាប់ឱ្យឃុំខ្លួនរបស់ចៅក្រមស៊ើបសួរសាលាដំបូងខេត្តក្រចេះ លោក ម៉េង តូនី កាលពីថ្ងៃទី១ ខែធ្នូ ឆ្នាំ២០២០ បានបង្គាប់ឱ្យសមត្ថកិច្ចត្រូវធ្វើការនាំខ្លួនអ្នកសារព័ត៌មានទាំងនោះទៅពន្ធនាគារខេត្ត ហើយប្រធានពន្ធនាគារត្រូវទទួលឃុំខ្លួនជនទាំងនោះរហូតមានបទបញ្ជាថ្មីសម្រេចផ្សេងពីនេះ។
ក្នុងដីកាដដែលបញ្ជាក់ថា ជនដែលត្រូវបានឃុំខ្លួននោះ ត្រូវបានដាក់ឱ្យស្ថិតនៅក្រោមការពិនិត្យពីបទ កំហែងយក ឆបោក និងបទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ ដែលប្រព្រឹត្តនៅភូមិខ្នាច ឃុំថ្មី ស្រុកចិត្របុរី ខេត្តក្រចេះ កាលពីថ្ងៃ២៩ ខែវិច្ឆិកា ឆ្នាំ២០២០នេះ។
វីអូឌី មិនអាចសុំការបំភ្លឺបន្ថែមពីចៅក្រមស៊ើបសួរ លោក ម៉េង តូនី បានទេនៅរសៀលថ្ងៃនេះ។
រីឯស្នងការរងនៃស្នងការដ្ឋាននគរបាលខេត្តក្រចេះ លោក ភួង សុភ័ណ្ឌ បានប្រាប់វីអូឌីនៅថ្ងៃនេះថា កាលពីថ្ងៃទី១ ខែធ្នូ ឆ្នាំ២០២០ អ្នកសារព័ត៌មានចំនួន៣រូបត្រូវបានឃាត់ខ្លួន រួមមាន ឈ្មោះ ហួត ដាវី ឈ្មោះ ឃឹម ផល្លី ដែលជាអ្នកសារព័ត៌មាន «កូនខ្មែរម្ចាស់ប្រទេស» និងឈ្មោះ ហ៊ិះ ហ៊ីន អ្នកសារព័ត៌មានស៊ើបអង្កេត។ លោកថា ក្រោយការចាប់ខ្លួន អ្នកទាំង៣នាក់ត្រូវបានបញ្ជូនទៅសាលាដំបូងខេត្តក្រចេះ និងឃុំខ្លួនក្នុងពន្ធនាគារជាបណ្តោះអាសន្ន ដើម្បីរង់ចាំចំណាត់ការច្បាប់របស់តុលាការ។
លោកមានប្រសាសន៍ថា៖ «តាមបញ្ជារបស់ព្រះរាជអាជ្ញា ខ្ញុំឃាត់គាត់បញ្ជូនទៅតុលាការ អញ្ចឹងមានអ្វីយើងសួរទៅខាងអយ្យការ។ ក្នុងដីកាឃុំរបស់គាត់ ចៅក្រមចោទគាត់ បទល្មើសក្នុងហ្នឹងមានហើយ បញ្ជូនទៅ គេឃុំក្នុងហ្នឹងអស់ហើយ ផុតពីនីតិវិធីខាងខ្ញុំហើយ»។
នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា លោក ណុប វី មានប្រសាសន៍ថា អ្នកសារព័ត៌មានមួយចំនួនប្រកបវិជ្ជាជីវៈត្រឹមត្រូវ និងខ្លះទៀតមិនបានប្រកបវិជ្ជាជីវៈត្រឹមត្រូវនោះទេ។ ប៉ុន្តែលោកថា មុននឹងចោទប្រកាន់លើអ្នកសារព័ត៌មាន តុលាការត្រូវធ្វើការស៊ើបអង្កេតឱ្យបានគ្រប់ជ្រុងជ្រោយ ដើម្បីកុំឱ្យប៉ះពាល់ដល់សេរីភាពអ្នកសារព័ត៌មានដែលប្រកបវិជ្ជាជីវៈត្រឹមត្រូវ។
លោកមានប្រសាសន៍ថា៖ «យើងឃើញហើយចំនួនអ្នកសារព័ត៌មានដែលត្រូវបានចាប់ខ្លួន ចោទប្រកាន់ ជាពិសេសអ្នកដែលបម្រើការងារនៅតាមខេត្ត ហើយវាក៏ផ្នែកមួយឆ្លុះបញ្ចាំងថា បងប្អូនអ្នកសារព័ត៌មាន គាត់នៅមានការយល់ដឹងតិចតួច អំពីការអនុវត្តក្រមសីលធម៌ វិជ្ជាជីវៈ។ នៅក្នុងករណីហ្នឹង គឺការមិនបានអនុវត្តវិជ្ជាជីវៈបានត្រឹមត្រូវ ដែលបង្កគ្រោះថ្នាក់នេះ ក៏វាអាចជាការគំរាមកំហែងដល់ការអនុវត្តការងាររបស់បងប្អូនអ្នកសារព័ត៌មានផ្សេងទៀតដែរ»។
បន្ថែមពីនេះ លោក ណុប វី ស្នើទៅអ្នកសារព័ត៌មានទាំងអស់ ត្រូវធ្វើការងាររបស់ខ្លួនប្រកបដោយវិជ្ជាជីវៈត្រឹមត្រូវនិងមានក្រមសីលធម៌ល្អ ដើម្បីកុំឱ្យប៉ះពាល់ដល់កិត្តិយសអ្នកសារព័ត៌មានដែលមានវិជ្ជាជីវៈ ប៉ះពាល់ដល់សង្គម និងខ្លួនឯងជាដើម។
របាយការណ៍សេរីភាពសារព័ត៌មានពិភពលោក ឆ្នាំ២០១៩ ដែលចេញដោយអង្គការអ្នកកាសែតគ្មានព្រំដែន បានចាត់ចំណាត់ថ្នាក់សេរីភាពសារព័ត៌មានកម្ពុជា ១៤៣ លើ ១៨០ ដែលបានធ្លាក់ចុះជាបន្តបន្ទាប់ ចាប់តាំងពីឆ្នាំ២០១៧មក ខណៈឆ្នាំ២០១៧ កម្ពុជាទទួលបានចំណាត់ថ្នាក់១៣២៕
