អាជ្ញាធរខេត្តព្រះសីហនុ អះអាងថា សំណាកទាំងអស់ដែលត្រូវបានដឹកជញ្ជូនមកកាន់រាជធានីភ្នំពេញនោះ មិនបានខូចខាតនោះឡើយ បន្ទាប់ពីរថយន្តសង្គ្រោះបន្ទាន់ដែលដឹកជញ្ជូនសំណាកទាំងនោះ ក្រឡាប់ធ្លាក់ចេញពីផ្លូវនៅឯស្រុកកំពង់សីលាកាលពីថ្ងៃម្សិលមិញនេះ។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានប្រាប់វីអូឌីនៅថ្ងៃនេះថា រថយន្តសង្គ្រោះបន្ទាន់មួយ បានដឹកជញ្ជូនសំណាក និងសពបុរសបរទេសម្នាក់ ពីខេត្តព្រះសីហនុមករាជធានីភ្នំពេញកាលពីថ្ងៃម្សិលមិញនេះ ហើយបានក្រឡាប់ធ្លាក់ពីផ្លូវនៅតាមបណ្ដោយផ្លូវជាតិលេខ៤ ស្ថិតក្នុងស្រុកកំពង់សិលាកាលពីព្រឹកថ្ងៃម្សិលមិញនេះ។
អ្នកនាំពាក្យរូបនេះ បានអះអាងថា សំណាកចំនួន ៣ប្រអប់ មិនបានខូចខាតទេ ហើយត្រូវបានផ្ទេរតាមរថយន្តសង្គ្រោះបន្ទាន់មួយគ្រឿងទៀតបញ្ជូនមកដល់រាជធានីភ្នំពេញនៅក្នុងថ្ងៃម្សិលមិញនេះ។
លោក ឃាង ភារម្យ ប្រាប់ថា សំណាកនោះត្រូវបានរៀបចំទុកដាក់យ៉ាងល្អនៅក្នុងរថយន្តនោះ ហើយលោកថា មន្ត្រីសុខាភិបាលក៏បានរួមដំណើរក្នុងរថយន្តនោះផងដែរ ដើម្បីធានាសុវត្ថិភាពនៃសំណាកទាំងនោះ ប៉ុន្តែ លោកមិនអាចបញ្ជាក់ពីចំនួនមន្ត្រីសុខាភិបាលដែលរួមដំណើរនោះឡើយ។
ចំណែកអត្តសញ្ញាណសពដែលត្រូវបានដឹកជញ្ជូនតាមរថយន្តនោះ និងមូលហេតុនៃការស្លាប់របស់គាត់ លោក ភារម្យ ប្រាប់ថា លោកក៏មិនបានដឹងដែរ ប៉ុន្តែ លោកថា នោះគឺជាបុរសជនជាតិបរទេស។
ស្នងការនគរបាលខេត្តព្រះសីហនុ លោក ជួន ណារិន បានប្រាប់ថា រថយន្តសង្គ្រោះបន្ទាន់របស់មន្ទីរសុខាភិបាលខេត្តព្រះសីហនុ បានបុកគ្នាជាមួយរ៉ឺម៉កកង់បីនៅក្នុងភូមិសាស្ត្រឃុំកំពង់សិលា ដោយបណ្ដាលឱ្យបុរសម្នាក់ដែលបើកបររ៉ឺម៉កកង់បីដឹកផ្កាលក់ ស្លាប់បាត់បង់ជីវិត ហើយអ្នកបើកបររថយន្តសង្គ្រោះបន្ទាន់ បានគេចចេញពីកន្លែងកើតហេតុ។
មន្ត្រីនគរបាលរូបនេះ បានឱ្យដឹងទៀតថា សពដែលត្រូវបានដឹកជញ្ជូនតាមរថយន្តសង្គ្រោះនោះ គឺជាបុរសបរទេស ដែលបានលង់ទឹកសមុទ្រស្លាប់ ហើយត្រូវបានបញ្ជូនទៅតម្កល់ទុកនៅរាជធានីភ្នំពេញ ប៉ុន្តែ លោកថា សមត្ថកិច្ចមិនទាន់អាចកំណត់អត្តសញ្ញាណសពនោះបាននៅឡើយទេ។
លោក ជួន ណារិន ប្រាប់ថា៖ «សាកសពនោះគឺជាសាកសពអ្នកលង់ទឹក ហើយយើងយកទៅតម្កល់ទុកនៅរាជធានីភ្នំពេញ ជាជនជាតិបរទេស ប៉ុន្តែ យើងមិនទាន់កំណត់អត្តសញ្ញាណទេ។ គាត់អណ្តែតទើនៅកោះដំឡូង តំបន់ខាងក្រៅ។ យកទៅរាជធានីភ្នំពេញ ដើម្បីស្រាវជ្រាវបន្តទៀត»។
ស្នងការនគរបាលខេត្តព្រះសីហនុរូបនេះ បានឱ្យដឹងទៀតថា មន្ត្រីសុខាភិបាលម្នាក់ដែលរួមដំណើរក្នុងរថយន្តដឹកសំណាកនោះ មិនទទួលរងគ្រោះថ្នាក់អ្វីទេ ហើយរថយន្តសង្គ្រោះបន្ទាន់មួយទៀតរបស់មន្ទីរសុខាភិបាលខេត្តនេះ បានទៅផ្ទេរយកសំណាក ហើយដឹកបន្តទៅរាជធានីភ្នំពេញបានត្រឹមត្រូវ។
ប្រធានមន្ទីរសុខាភិបាលខេត្តព្រះសីហនុ អ្នកស្រីវេជ្ជបណ្ឌិត លឹម សាមាន បានបដិសេធប្រាប់ព័ត៌មានលម្អិតអំពីសំណាកដែលត្រូវបានដឹកជញ្ជូនតាមរថយន្តសង្គ្រោះនោះ ហើយបានប្រាប់ឱ្យសាកសួរទៅអ្នកនាំពាក្យរដ្ឋបាលខេត្តវិញ។
លោក ភារម្យ ប្រាប់ថា លោកមិនបានដឹងចំនួនពិតប្រាកដនោះឡើយ ប៉ុន្តែ លោកថា សំណាកទាំងនោះ ត្រូវបានប្រមូលពីភ្ញៀវទេសចរ និងធុរជន ឬអ្នកជំនួញបរទេស ដែលបានធ្វើដំណើរតាមជើងហោះហើរទៅដល់ខេត្តព្រះសីហនុ ដែលត្រូវបានតម្រូវឱ្យធ្វើចត្តាឡីស័យ ឬរក្សាខ្លួននៅដាច់ដោយឡែក១៤ថ្ងៃ និងត្រូវត្រួតពិនិត្យសុខភាព។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន ប្រាប់ថា អ្នកស្រីជាប់រវល់ប្រជុំ នៅពេលវីអូឌីទូរសព្ទទៅគាត់នៅរសៀលថ្ងៃនេះ៕
