ប្រជាកសិករមួយចំនួននៅខេត្តបាត់ដំបង បានលើកឡើងថា តម្លៃស្រូវឆ្នាំនេះប្រមូលផលបានតិចនិងតម្លៃចុះថោកប្រហែលជា៣០០រៀលក្នុង១គីឡូ ខណៈកសិករនៅបណ្ដាខេត្តភាគខាងត្បូង កំពុងតែលក់បានថ្លៃជាងឆ្នាំមុន។
វ័យជាង៥០ឆ្នាំ ជាអ្នកភូមិវាលទ្រា ឃុំអូតាគី ស្រុកថ្មគោល ខេត្តបាត់ដំបង លោក ហឿន ហឿប និយាយថា នៅឆ្នាំនេះ គាត់ជួលស្រែអ្នកភូមិប្រហែលជា៣០ហិកតាសម្រាប់ធ្វើស្រែ ប៉ុន្តែស្រូវនៅតំបន់នោះ ឈ្មួញទិញតម្លៃប្រហែលជា១ពាន់រៀលក្នុងមួយគីឡូក្រាម បើធៀបនឹងឆ្នាំមុនមានការថយចុះប្រហែលជា២០០ទៅ៣០០រៀលក្នុងមួយគីឡូក្រាម។
លោកបន្តថា ស្រូវធ្លាក់ថ្លៃដោយសារបញ្ហាជំនន់ទឹកភ្លៀងជន់លិច ការបិទច្រកព្រំដែន ដែលរារាំងដល់ឈ្មួញបរទេសមកទិញជាដើម។ ករណីនេះ ធ្វើឱ្យរូបគាត់ជួបបញ្ហាប្រឈមនិងខាតច្រើននៅក្នុងឆ្នាំនេះ។
លោក ហឿន ហឿប ប្រាប់ថា៖ «ប៉ះពាល់ហើយ ទឹកជំនន់វាលិចផង អត់បានច្រូតខ្លះផង ធ្វើបន្តទៅវិញ មិនសង្ឃឹមថាមានទឹកឬអត់ទៀតទេ ប្អូន! ខ្ញុំជួលស្រែគេច្រើនដែរ ប្រហែលជា៣០ហិកតា វាខូចអស់ប្រហែលជាពាក់កណ្តាល នៅសល់បានតិចទៀត វាសល់ពីទឹកលិចមក ១ហិកតាបានប្រហែល១តោនជាង គិតថ្លៃជី អត់រួចខ្លួនផង»។
លោក យាំ ជួយ រស់នៅភូមិបាវិល១ ឃុំបាវិល ស្រុកបាវិល ខេត្តបាត់ដំបង និយាយថា ដើម្បីឱ្យប្រជាកសិករមានកម្លាំងដាំស្រូវសម្រាប់ទ្រទ្រង់ជីវភាពសមរម្យបាន លុះត្រាតម្លៃស្រូវលក់បាន១៣០០រៀលក្នុងមួយគីឡូ។
លោក យាំ ជួយ និយាយថា៖ «បើតម្លៃដែលគេចង់បានទូទៅទាំងអស់គ្នាសម្រាប់កសិករចន្លោះពី១២០០រៀល ទៅ១៣០០រៀលក្នុង១គីឡូ កសិករគាត់សប្បាយចិត្តហើយ។ បើបានថ្លៃ ស្រូវយើងផលិតបានត្រឹម ២តោន ៣តោន វាអាចសល់បានខ្លះ ចំណេញខ្លះ។ តែបើស្រូវគាត់ធ្វើបានតែ១តោនជាងក្នុងមួយហិកតា គាត់ប្រឈមនឹងការខាតច្រើនណាស់»។
ចំណែកកសិករនៅខេត្តកណ្តាលឯណោះវិញ វ័យជាង៤០ឆ្នាំ អ្នកស្រី សែន រី រស់នៅភូមិពោធិ៍អណ្តែត ឃុំព្រែកស្តី ស្រុកកោះធំ និយាយថា ស្រូវឆ្នាំនេះលក់បានតម្លៃប្រហែលជា១២០០រៀលក្នុងមួយគីឡូក្រាម បើធៀបនឹងឆ្នាំមុន ថ្លៃជាង៤០០រៀលក្នុង១គីឡូក្រាម។ ប៉ុន្តែអ្នកស្រីថា តម្លៃនេះលក់បានតែក្នុងស្រុកតែប៉ុណ្ណោះ មិនមានឈ្មួញវៀតណាមមកទិញដូចឆ្នាំមុននោះទេ។
កសិករនៅស្រុកកោះធំម្នាក់ទៀត វ័យជាង៥០ឆ្នាំ អ្នកស្រី ម៉ៃ ស្រឹង និយាយថា គាត់និងកសិករមួយចំនួនទៀតនៅក្នុងភូមិ សប្បាយរីករាយនៅពេលដែលតម្លៃស្រូវឆ្នាំនេះលក់បានថ្លៃជាងឆ្នាំមុនរហូតដល់៤០០រៀលក្នុង១គីឡូក្រាម។ អ្នកស្រីចង់ឱ្យតម្លៃនេះ ថេររហូតដល់ខែ៤ ដែលបញ្ចប់ការប្រមូលផលក្នុងរដូវប្រាំងខាងមុខនេះ។
អ្នកស្រី ម៉ៃ ស្រឹង និយាយថា៖ «លក់បានថ្លៃ កសិករយើងមានកម្លាំងចិត្ត តែថោកមានកម្លាំងឯណាធ្វើទៀត បានតម្លៃថេរអ៊ីចឹងរហូត គុណហើយ! តែយើងមានលុយទៅ ប្រទេសជាតិយើងក៏ជឿនលឿនទៅមុខទៀតដែរ»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ថា ស្រូវនៅបាត់ដំបងដែលមានតម្លៃថោក ដោយសារតែស្រូវទាំងនោះដួលនិងត្រាំទឹក ធ្វើឱ្យខូចគុណភាព ហើយលោកថា រីឯស្រូវនៅបណ្តាខេត្តជាប់វៀតណាមនាពេលបច្ចុប្បន្ននេះ មានតម្លៃខ្ពស់ដោយសារតែទិន្នផលស្រូវល្អ មិនត្រាំទឹក និងងាយស្រួលដឹកជញ្ជូនទៅវៀតណាម។
លោក វេង សាខុន មានប្រសាសន៍ថា៖ «និយាយរួម ប៉ែកតាកែវ កំពត ស្វាយរៀង ព្រៃវែង វាអត់មានបញ្ហា ព្រោះកន្លងទៅនេះ វាអត់ប៉ះពាល់ទឹកជំនន់តិចតួចបំផុត ហើយស្រូវវាល្អឆ្នាំនេះ ហើយគេផលិតស្រូវ គឺពូជរបស់វៀតណាម ហើយវៀតណាមគេទិញយកទៅវិញ។ អ៊ីចឹងហើយបានវាតម្លៃល្អ គ្រាន់តែលើកដាក់ឡានបើកតែមួយភ្លែតដល់វៀតណាមបាត់ហើយ»។
នាយិកាមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា សេដាក (CEDAC) អ្នកស្រី តុង ចាន់ធាង ប្រាប់ថា តម្លៃស្រូវធ្លាក់ចុះនៅខេត្តបាត់ដំបង ដោយសារតែការដឹកជញ្ជូនទៅលក់នៅវៀតណាមឆ្ងាយពីតំបន់ដាំដុះនោះ ហើយឈ្មួញថៃមិនសូវទិញពីកសិករខ្មែរនោះទេ។
ចំណែកស្រូវនៅស្រុកកោះធំឡើងថ្លៃ អាចមកពីកត្តាដឹកជញ្ជូនជិត ពីព្រោះកន្លែងកសិករដាំដុះនៅមិនឆ្ងាយពីព្រំដែនកម្ពុជា-វៀតណាមនោះទេ។
ទោះជាបែបនេះក្តី អ្នកស្រីជំរុញទៅប្រជាកសិករទាំងអស់ ត្រូវដាំដុះស្រូវសិរីរាង្គ និងតាមបច្ចេកទេស ដោយបង្កើតជាសហគមន៍ ទើបទទួលបានទិន្នផលខ្ពស់និងលក់បានថ្លៃជាដើម។
អ្នកស្រី តុង ចាន់ធាង មានប្រសាសន៍ថា៖ «ជាបទពិសោធន៍ សម្រាប់អង្គការសេដាក ដែលធ្វើការជាមួយកសិករកន្លងមក យើងគាំទ្រកសិករផលិតស្រូវសិរីរាង្គ គាត់បានអនុវត្តទៅតាមគោលការណ៍បច្ចេកទេសច្បាស់លាស់ មានការបញ្ជាក់ពីគុណភាពសិរីរាង្គពិតប្រាកដ ហើយអ្នកទិញគាត់ឱ្យតម្លៃមួយថេរ បានន័យថា ឧទាហរណ៍ តម្លៃស្រូវស្ងួត ១គីឡូ ១៦០០រៀល ស្រូវសើម តម្លៃ១៣០០រៀលក្នុង១គីឡូ ប៉ុន្តែកសិករតម្រូវឱ្យធ្វើតាមគោលការណ៍បច្ចេកទេស តាមស្តង់ដារច្បាស់លាស់»។
តាមសេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជា កាលពីថ្ងៃទី០៣ ខែវិច្ឆិកា បានឱ្យដឹងថា គិតត្រឹមរយៈពេល១០ខែ ឆ្នាំ២០២០នេះ បរិមាណអង្ករនាំចេញរបស់កម្ពុជាមានចំនួនជាង៥៣ម៉ឺនតោន ដែលមានការកើនឡើង១៧,១១ភាគរយ បើប្រៀបធៀបនឹងរយៈពេល១០ខែដូចគ្នានឹងឆ្នាំ២០១៩។
ចំណែកប្រាក់ចំណូលដែលកម្ពុជាទទួលបានពីការនាំចេញអង្ករទៅក្រៅប្រទេសក្នុងរយៈពេល១០ខែឆ្នាំនេះ មានការកើនឡើងជិត៤៧លានដុល្លារ ដែលកំណើននេះស្មើនឹង១៥ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ២០១៩៕
