ក្រសួងអប់រំ ហាមឃាត់សកម្មភាពកីឡានិងការហាត់ប្រាណគ្រប់ប្រភេទនៅក្នុងបរិវេណពហុកីឡដ្ឋានអូឡាំពិក ដោយថា ទីតាំងមួយនេះនឹងត្រូវប្រើជាកន្លែងប្រមូលមនុស្សសម្រាប់ធ្វើតេស្តសុខភាពនៅសប្ដាហ៍ក្រោយនេះ។
ក្រសួងអប់រំ បានប្រកាសឱ្យដឹងបែបនេះនៅក្នុងសេចក្ដីជូនដំណឹងរបស់ខ្លួននៅថ្ងៃនេះ ប្រាប់ទៅស្ថាប័នកីឡាចំណុះឱ្យក្រសួងនិងប្រាប់ទៅមហាជនទូទៅ។
ក្រសួងបានប្រកាសថា ក្រសួងសុខាភិបាលនឹងយកបរិវេណពហុកីឡដ្ឋានជាតិអូឡាំពិកសម្រាប់ប្រមូលសំណាករបស់មនុស្សជាច្រើន ដែលពាក់ព័ន្ធនឹងករណីឆ្លងក្នុងសហគមន៍ ២៨វិច្ឆិកាកន្លងមកនេះ ដែលការធ្វើតេស្តដ៏ធំនេះ នឹងធ្វើចាប់ពីថ្ងៃទី៧ ដល់ថ្ងៃទី១២ ខែធ្នូ ឬនៅសប្ដាហ៍ក្រោយនេះ។
ក្រសួងក៏បានណែនាំទៅដល់បុគ្គលិកអប់រំដែលបម្រើការងារនៅក្នុងបរិវេណពហុកីឡដ្ឋានអូឡាំពិកនេះឱ្យបំពេញការងារពីចម្ងាយតាមអនឡាញ។
កម្ពុជាបានស្ថិតក្នុងក្ដីបារម្ភពីការឆ្លងរីករាលដាលនៃជំងឺកូវីដ១៩ ចាប់តាំងពីសប្ដាហ៍មុនមក បន្ទាប់ពីការរកឃើញករណីឆ្លងក្នុងសហគមន៍ជាលើកដំបូងនៅលើស្ត្រីវ័យ៥៦ឆ្នាំ ដែលជាភរិយារបស់អគ្គនាយកពន្ធនាគារ លោក ឆែម សាវុធ កាលពីថ្ងៃទី២៨ ខែវិច្ឆិកា ជាអ្វីដែលរដ្ឋាភិបាលបានហៅករណីនេះថា «ព្រឹត្តិការណ៍២៨វិច្ឆិកា»។
គិតមកដល់ថ្ងៃនេះ ក្រសួងសុខាភិបាល បានរកឃើញមនុស្ស២៣នាក់ហើយ ក្នុងនោះមានកុមារវ័យ៣ឆ្នាំម្នាក់ផងដែរ បានឆ្លងជំងឺកូវីដ១៩ បន្ទាប់ពីពួកគេពាក់ព័ន្ធនឹងព្រឹត្តិការណ៍២៨វិច្ឆិកា៕
