មន្ត្រីនគរបាលខេត្តកំពង់ឆ្នាំង អះអាងថា គិតមកដល់រសៀលថ្ងៃសុក្រនេះ តុលាការបានសម្រេចឃុំខ្លួនអ្នកផលិតស្រា-ស ៣នាក់ នៅពន្ធនាគារខេត្តជាបណ្តោះអាសន្ន ខណៈមនុស្ស៣នាក់ទៀត កំពុងកសាងសំណុំរឿងបញ្ជូនទៅតុលាការ ក្រោយពីមានករណីសង្ស័យពុលស្រា-ស បណ្តាលឱ្យមនុស្សជាង ១០នាក់ស្លាប់ និងជាង១០០នាក់ទៀតឈឺ។
កាលពីថ្ងៃទី២៨ ខែវិច្ឆិកា ឆ្នាំ២០២០ មានករណីសង្ស័យពុលស្រា-ស បានកើតឡើងអំឡុងពេលអ្នកភូមិជាច្រើននាក់ចូលរួមកំដរបុណ្យសពមួយកន្លែង ស្ថិតក្នុងឃុំខ្លុងពពក ស្រុកទឹកផុស ខេត្តកំពង់ឆ្នាំង។
ក្រោយមក នៅថ្ងៃទី០១ ខែធ្នូ អាជ្ញាធរខេត្តកំពង់ឆ្នាំង បានសម្រេចបិទកន្លែងផលិតនិងចែកចាយស្រា-ស និងស្រាថ្នាំបណ្តោះអាសន្នជាច្រើនទីតាំង បន្ទាប់ពីមនុស្សស្លាប់ និងធ្លាក់ខ្លួនឈឺជាបន្តបន្ទាប់។
អ្នកនាំពាក្យស្នងការដ្ឋាននគរបាលខេត្តកំពង់ឆ្នាំង លោក អៀរ ប៊ុនធឿន ប្រាប់វីអូឌីនៅថ្ងៃសុក្រនេះថា គិតត្រឹមថ្ងៃនេះ មានមនុស្ស៣នាក់ហើយដែលត្រូវបានតុលាការបញ្ជូនទៅឃុំខ្លួនបណ្តោះអាសន្ននៅពន្ធនាគារ និងមានមនុស្ស៣នាក់បន្ថែមទៀតត្រូវបានសមត្ថកិច្ចកំពុងរៀបចំសំណុំរឿងបញ្ជូនទៅតុលាការ ក្រោយពីរកឃើញថា ពួកគេផលិតស្រាមិនគោរពទៅតាមបច្ចេកទេសនិងតាមស្តង់ដារគុណភាព។
លោកបន្ថែមថា៖ «ដោយសារការផលិតរបស់គាត់ អត់ត្រូវតាមបច្ចេកទេសមាត្រដ្ឋានដែលបានកំណត់ច្បាស់លាស់ ដូចជាមេតាណុលហ្នឹងវាមានច្រើនហួសកម្រិត»។
អ្នកនាំពាក្យរូបនេះ ឱ្យដឹងទៀតថា ប្រតិបត្តិការចុះពិនិត្យកន្លែងផលិតនិងចែកចាយស្រាទូទាំងខេត្ត គិតត្រឹមម៉ោង៥ល្ងាច ថ្ងៃទី២ ខែធ្នូ ឆ្នាំ២០២០ គឺអាជ្ញាធរបានបិទទីតាំងផលិតស្រា-ស ចំនួន៣៤៦កន្លែង និងបិទកន្លែងចែកចាយបន្តចំនួន៥៤៣កន្លែង ខណៈប្រតិបត្តិការចុះពិនិត្យក្នុងរយៈពេលពីរថ្ងៃចុងក្រោយនេះ នៅមិនទាន់បានបូកបញ្ចូលនៅឡើយ។
លោកថា អាជ្ញាធរនឹងបន្តចុះបិទទីតាំងផលិតស្រា-សដែលមិនត្រូវតាមបច្ចេកទេសនិងគុណភាពទាំងនោះរហូតទាល់តែអស់ ហើយអ្នកផលិតស្រាមិនគោរពទៅតាមស្តង់ដារ នឹងប្រឈមផ្លូវច្បាប់។
អ្នកនាំពាក្យសាលាដំបូងខេត្តកំពង់ឆ្នាំង លោក ឡុង ស៊ីថា មានប្រសាសន៍ថា មនុស្ស៣នាក់ ដែលបញ្ជូនទៅឃុំខ្លួនបណ្តោះអាសន្ននោះ ត្រូវតុលាការចោទប្រកាន់ពីបទ «ធ្វើពាណិជ្ជកម្ម និងផលិតម្ហូបអាហារមានជាតិពុល និងមនុស្សឃាតដោយអចេតនា» តាមមាត្រា១៨ និង ៦៣ នៃច្បាប់ស្តីពីការគ្រប់គ្រងគុណភាព សមត្ថភាពផលិតផលទំនេញនិងសេវា និងមាត្រា២០៧ នៃក្រមព្រហ្មទណ្ឌ។
លោកបន្ថែមថា៖ «សម្រាប់ការជាប់ពន្ធនាគារនិងផាកពិន័យ ខ្ញុំមិនដឹងទេ វាជាសិទ្ធិសម្រេចរបស់ចៅក្រម»។
ប្រធានមន្ទីរសុខាភិបាលខេត្តកំពង់ឆ្នាំង លោក ប្រាក់ វ៉ុន បានឱ្យដឹងថា អ្នកភូមិស្លាប់ពាក់ព័ន្ធនឹងការផឹកស្រាស នៅឯស្រុកទឹកផុស ចាប់តាំងពីថ្ងៃទី២៦ ខែវិច្ឆិកាមក សរុបជាង ១០នាក់ បន្ទាប់ពីមន្ត្រីសុខាភិបាលបានចុះទៅស្រាវជ្រាវនៅតាមភូមិនានា។
អភិបាលខេត្តកំពង់ឆ្នាំង លោក ឈួរ ច័ន្ទឌឿន មានប្រសាសន៍ថា រហូតមកដល់ថ្ងៃសុក្រនេះ ពុំមានមនុស្សឈឺនិងស្លាប់ដោយពុលស្រាទៀតឡើយ។
អភិបាលខេត្តរូបនេះ បញ្ជាក់ថា ករណីអាជ្ញាធរបិទកន្លែងផលិតស្រានិងចរាចរណ៍ស្រានេះ គឺពុំទាន់កំណាត់ថ្ងៃឱ្យបើកវិញទេ ដោយរង់ចាំការត្រួតពិនិត្យផ្លូវច្បាប់ គុណភាព និងបច្ចេកទេសសិន។
លោកបន្ថែមថា៖ «ករណីយើងបិទនេះ គឺយើងបិទទាំងអស់ អ្នកលក់ក៏យើងបិទដែរ មូលហេតុយើងបិទ ដោយសារស្រាមានជាតិពុល យើងខ្លាចវាប្រឈម អ៊ីចឹងយើងបិទទាំងអស់ អត់ឱ្យលក់ អត់ឱ្យផលិតទៀតទេ រង់ចាំការត្រួតពិនិត្យចប់សព្វគ្រប់សិន ហើយបានយើងប្រជុំថា តើធ្វើយ៉ាងម៉េច? ដោះស្រាយយ៉ាងម៉េចតទៅទៀត ឥលូវយើងអត់ទាន់ដឹងទេ»។
មន្ត្រីកម្មវិធីនៅមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាព លោក ហេង គីមហុង បានគាំទ្រចំពោះចំណាត់ការរបស់អាជ្ញាធរ ចំពោះអ្នកផលិតស្រា-សដែលមិនគោរពតាមស្តង់ដារបច្ចេកទេសនិងគុណភាពនេះ។ ប៉ុន្តែលោកស្នើឱ្យមានវិធានការបន្ថែមចំពោះអាជ្ញាធរមូលដ្ឋានដែលបណ្តែតបណ្តោយឱ្យមានការផលិតនិងចែកចាយស្រា-ស ដែលគ្មានស្តង់ដាររហូតបណ្តាលឱ្យមានមនុស្សស្លាប់នេះដែរ។
លោកបន្ថែមថា៖ «ខ្ញុំក៏ស្នើឱ្យមានការឃាត់ខ្លួនចំពោះអ្នកបំពេញមុខងារសាធារណៈពាក់ព័ន្ធរឿងនេះ ពីបទធ្វេសប្រហែស ពីព្រោះខ្ញុំយល់ថា ការផលិតនេះ មិនមែនអាជ្ញាធរមូលដ្ឋានមិនដឹងទេ គឺប្រាកដណាស់ថា ពួកគាត់បានដឹងថាមានការផលិតស្រានៅក្នុងមូលដ្ឋានរបស់ពួកគាត់។ អ៊ីចឹងវាសុទ្ធសឹងតែពាក់ព័ន្ធជាមួយភាពធ្វេសប្រហែសរបស់អាជ្ញាធរមូលដ្ឋាន»។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានផ្សព្វផ្សាយលើហ្វេសប៊ុករបស់ខ្លួន កាលពីថ្ងៃទី១ ខែធ្នូ ឆ្នាំ២០២០ ថា ពាក់ព័ន្ធមនុស្សស្លាប់និងឈឺដោយសង្ស័យពុលស្រានៅខេត្តកំពង់ឆ្នាំង ស្ថាប័ននេះបានយកសំណាកទៅពិនិត្យដោយសំណាកមួយចំនួនរកឃើញថា មានផ្ទុកសារធាតុមេតាណុលចន្លោះពី ១០,៥ ទៅ ១៧,២៥ ភាគរយ ដែលវាលើសពីកម្រិតអនុញ្ញាតឱ្យប្រើ ដែលមានត្រឹមតែ ០,១៥ ភាគរយប៉ុណ្ណោះ។ អគ្គនាយកដ្ឋាននេះ អះអាងថា កាលណាអ្នកផលិត ប្រើប្រាស់ជាតិមេតាណុលលើសកម្រិតអនុញ្ញាតនៅក្នុងស្រា នឹងធ្វើឱ្យមនុស្សដែលទទួលទានអាចស្លាប់បាន៕









