មន្ត្រីនគរបាលខេត្តកំពង់ឆ្នាំង អះអាងថា មនុស្ស៩នាក់ត្រូវបានបញ្ជូនទៅតុលាការ ពាក់ព័ន្ធនឹងករណីមនុស្សស្លាប់ដោយសង្ស័យពុលស្រា-ស នៅស្រុកទឹកផុស ខេត្តកំពង់ឆ្នាំង ប៉ុន្តែមន្ត្រីតុលាការថា មានតែមនុស្ស៦នាក់ប៉ុណ្ណោះដែលត្រូវបានបញ្ជូនទៅនិងត្រូវចោទប្រកាន់។
ប្រធានមន្ទីរសុខាភិបាលខេត្តកំពង់ឆ្នាំង លោក ប្រាក់ វ៉ុន អះអាងថា ចាប់តាំងពីថ្ងៃទី២៦ ខែវិច្ឆិកាមក មានមនុស្ស១៥នាក់បានស្លាប់ និងជាង១០០នាក់បានឈឺ ដោយសង្ស័យថាពុលស្រា-ស ស្ថិតនៅស្រុកទឹកផុស ខេត្តកំពង់ឆ្នាំង។
ស្នងការនគរបាលខេត្តកំពង់ឆ្នាំង លោក ខូវ លី ប្រាប់វីអូឌីនៅថ្ងៃអង្គារនេះថា នគរបាលបានបញ្ជូនមនុស្ស៩នាក់ទៅតុលាការ ពាក់ព័ន្ធនឹងករណីមនុស្សស្លាប់ដោយសារពុលស្រានៅស្រុកទឹកផុសនេះ។
លោកបន្ថែមថា៖ «យើងបានកសាងសំណុំរឿងបញ្ជូនទៅតុលាការ៩នាក់ មានស្រី៤នាក់ ប៉ុន្តែតុលាការដោះលែងប៉ុន្មាន ឃុំប៉ុន្មាន ឃុំប៉ុន្មាន ខ្ញុំអត់ដឹងទេ»។
ស្នងការរូបនេះបញ្ជាក់ថា រហូតមកដល់ថ្ងៃនេះ អាជ្ញាធរបានចុះពិនិត្យនិងផ្អាកអាជីវកម្មផលិតស្រា-ស ចំនួន៥១៥កន្លែង និងកន្លែងចែកចាយបន្ត ចំនួន១១៥កន្លែង។
ទោះយ៉ាងណា អ្នកនាំពាក្យសាលាដំបូងខេត្តកំពង់ឆ្នាំង លោក ឡុង ស៊ីថា មានប្រសាសន៍ថា មានមនុស្សតែ៦នាក់ប៉ុណ្ណោះដែលបានបញ្ជូនទៅតុលាការ ពាក់ព័ន្ធករណីពុលស្រានៅស្រុកទឹកផុសនេះ ក្នុងនោះ មនុស្ស៥នាក់ត្រូវបានបញ្ជូនទៅឃុំខ្លួនបណ្តោះអាសន្ន និងម្នាក់ទៀតធ្លាក់ខ្លួនឈឺ តម្រូវឱ្យសម្រាកព្យាបាលនៅមន្ទីរពេទ្យសិន រង់ចាំការសាកសួរនៅពេលក្រោយ។
លោកថា អ្នកដែលត្រូវបានចាប់ខ្លួននិងឃុំខ្លួននោះ គឺដោយសារតែពួកគេផលិតស្រា-សមានជាតិមេតាណុលហួសកម្រិតអនុញ្ញាត។
អ្នកនាំពាក្យរូបនេះ បញ្ជាក់ទៀតថា អ្នកទាំង៥ដែលសម្រេចឃុំខ្លួនបណ្តោះអាសន្ននោះ ត្រូវបានចោទប្រកាន់ពីបទ «ធ្វើពាណិជ្ជកម្ម និងផលិតម្ហូបអាហារមានជាតិពុល និងមនុស្សឃាតដោយអចេតនា» តាមមាត្រា១៨ និង ៦៣ នៃច្បាប់ស្តីពីការគ្រប់គ្រងគុណភាព សមត្ថភាពផលិតផលទំនិញនិងសេវា និងមាត្រា២០៧ នៃក្រមព្រហ្មទណ្ឌ។
លោកបន្ថែមថា៖ «បច្ចុប្បន្ន មាន៥នាក់ត្រូវបានឃុំខ្លួន និងម្នាក់នៅមន្ទីរពេទ្យ»។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានផ្សព្វផ្សាយលើហ្វេសប៊ុករបស់ខ្លួន កាលពីថ្ងៃទី១ ខែធ្នូ ឆ្នាំ២០២០ ថាពាក់ព័ន្ធមនុស្សស្លាប់និងឈឺដោយសង្ស័យពុលស្រានៅខេត្តកំពង់ឆ្នាំង ស្ថាប័ននេះបានយកសំណាកទៅពិនិត្យ ក្នុងនោះ សំណាកមួយចំនួនរកឃើញថា មានផ្ទុកសារធាតុមេតាណុលចន្លោះពី ១០,៥ ទៅ ១៧,២៥ ភាគរយ ដែលវាលើសពីកម្រិតអនុញ្ញាតឱ្យប្រើដែលមានត្រឹមតែ ០,១៥ ភាគរយប៉ុណ្ណោះ។
អគ្គនាយកដ្ឋាននេះ អះអាងថា កាលណាអ្នកផលិត ប្រើប្រាស់ជាតិមេតាណុលលើសកម្រិតអនុញ្ញាតនៅក្នុងស្រា នឹងធ្វើឱ្យមនុស្សដែលទទួលទានអាចស្លាប់បាន៕
