មន្ត្រីសុខាភិបាល និងអាជ្ញាធររាជធានី-ខេត្តមួយចំនួន កំពុងបន្តរកអ្នកដែលប៉ះពាល់អ្នកជំងឺកូវីដ១៩ ក្នុងព្រឹត្តិការណ៍សហគមន៍ ២៨វិច្ឆិកា និងបានបាញ់ថ្នាំសម្លាប់មេរោគនៅទីតាំងមួយចំនួន ដែលអ្នកជំងឺនិងអ្នកពាក់ព័ន្ធបានទៅ ស្របពេលក្រសួងសុខាភិបាលបន្តរកឃើញអ្នកឆ្លងជំងឺកូវីដ១៩ថ្មីបន្ថែមទៀត។
អនុប្រធានមន្ទីរសុខាភិបាលខេត្តកណ្ដាល លោក គាម ពិសិដ្ឋ មានប្រសាសន៍នៅថ្ងៃពុធនេះថា នៅក្នុងខេត្តនេះមានអ្នកឆ្លងកូវីដ១៩ ចំនួន៣នាក់ ដែលពួកគាត់ជាបុគ្គលិកហាង Zando និង Pedro ខណៈអ្នកប៉ះពាល់ផ្ទាល់និងប្រយោលចំនួន៦៩នាក់ ត្រូវបានមន្ត្រីសុខាភិបាលយកសំណាកទៅធ្វើតេស្ត និងតម្រូវឱ្យធ្វើចត្តាឡីស័ក។
លោកបន្តថា បច្ចុប្បន្ន មន្ទីរសុខាភិបាលកំពុងស្រាវជ្រាវរកអ្នកប៉ះពាល់ប្រយោលបន្តទៀត និងធ្វើការបាញ់ថ្នាំសម្លាប់មេរោគនៅទីតាំងដែលអ្នកជំងឺបានទៅនិងស្នាក់នៅផងដែរ។
លោកថា៖ «អ្នកប៉ះពាល់ យើងកំពុងស្វែងរកទៀត ដូចថា គាត់ជាអ្នកមកផ្ទះមែន ប៉ុន្តែគ្រួសារគាត់បានប៉ះពាល់គាត់ហើយ គ្រួសារបានចេញទៅទិញអីនៅជិតខាងអីទៀត យើងកំពុងស្រាវជ្រាវបន្ត។ ទីតាំង ពេលយើងយកគាត់មកធ្វើចត្តាឡីស័កអ៊ីចឹង នៅម្ដុំភូមិនិងផ្ទះរបស់គាត់ យើងបាញ់ថ្នាំ»។
នៅខេត្តកណ្តាលនេះដែរ មេប៉ុស្តិ៍ឃុំបឹងខ្យា លោក ព្រីង រដ្ឋា បានឱ្យដឹងថា អាជ្ញាធរខេត្តបានសម្រេចបិទ«ផ្សារបឹងខ្យា»ជាបណ្ដោះអាសន្ន ដោយសារអ្នកជំងឺកូវីដ១៩ម្នាក់បានទៅផ្ទះនិងទៅផ្សារនោះ កាលពីថ្ងៃទី២៨ ខែវិច្ឆិកា ឆ្នាំ២០២០។
ចំណែកមេប៉ុស្តិ៍ឃុំព្រែកស្លែង ខេត្តកណ្តាល លោក នី ប៊ុនថន ឱ្យដឹងដែរថា អាជ្ញាធរក៏បានបិទ«វត្តវិហារក្រាស់»ជាបណ្តោះអាសន្ន និងតម្រូវឱ្យព្រះសង្ឃចំនួន៦អង្គ និងពលរដ្ឋ១០នាក់ទៀត ធ្វើចត្តាឡីស័ក ដោយសារឪពុកអ្នកជំងឺកូវីដ១៩ម្នាក់បានទៅទីនោះ។
ប្រធានមន្ទីរសុខាភិបាលខេត្តកំពង់ឆ្នាំង លោក ប្រាក់ វ៉ុន មានប្រសាសន៍ថា មន្ទីរនិងអាជ្ញាធរខេត្ត បានបាញ់អាល់កុលសម្លាប់មេរោគនៅបរិវេណផ្សារក្រោម ក្រោយពីមានអ្នកលក់ដូរនៅក្នុងផ្សារនេះបានជិះរថយន្តឈ្នួលជាមួយលោកយាយនិងប្អូនស្រីរបស់អ្នកជំងឺកូវីដ១៩ម្នាក់ ឈ្មោះ ស្រៀន គឹមស្រុន ដែលជាអ្នកទៅហាង Zando កាលពីថ្ងៃទី២៧ ខែវិច្ឆិកា។
លោកថា៖ «យើងបាញ់ថ្នាំនៅផ្សារ [ផ្សារក្រោម] ជាវិធានការទប់ស្កាត់ជាមុនទេ»។
លោក ប្រាក់ វ៉ុន បន្តថា បច្ចុប្បន្ននេះ ប្អូនស្រីនិងលោកយាយដែលបានប៉ះពាល់ផ្ទាល់ជាមួយអ្នកជំងឺកូវីដ១៩ ត្រូវបានដាក់ឱ្យធ្វើចត្តាឡីស័កនៅមន្ទីរបង្អែកខេត្ត ខណៈអ្នកប៉ះពាល់ក្នុងព្រឹត្តិការណ៍សហគមន៍ ២៨វិច្ឆិកា ក្នុងខេត្តនេះ សរុបមានចំនួន៥៦នាក់។ ប៉ុន្តែលទ្ធផលតេស្តរបស់ពួកគេយ៉ាងណានោះ លោកនៅមិនទាន់បានទទួលព័ត៌មាននៅឡើយ។
អ្នកជំងឺកូវីដ១៩ម្នាក់ ឈ្មោះ អិត កុម៉ាល់ ដែលបានចូលហាង Zando និងត្រូវបានក្រសួងប្រកាសថា វិជ្ជមានមេរោគកូវីដ១៩ ក្នុងចំណោមមនុស្ស៤នាក់ដែលបានរកឃើញកាលពីថ្ងៃម្សិលមិញ បានប្រាប់វីអូឌីនៅថ្ងៃនេះថា លោកចាប់ផ្ដើមឈឺផ្ដាសាយនៅថ្ងៃទី១ ដល់ថ្ងៃទី៤ ខែធ្នូ ហើយក៏បានជាទៅវិញ ហើយលោកក៏មិនបានចាប់អារម្មណ៍ថា ខ្លួនមានផ្ទុកជំងឺកូវីដ១៩នោះទេ។
លោកបន្តថា៖ «កាំមេរ៉ា [ក្នុងហាង Zendo] ចាប់រូបបងជាប់ បន្ទាប់ពីឃើញបងទៅធ្វើតេស្តសំណាកនៅមន្ទីរពេទ្យរុស្ស៊ី ប៉ុន្តែគេមិនធ្វើឱ្យ ដោយសារលទ្ធផលធ្វើតេស្តបុគ្គលិកនិងអ្នកចូលហាងនោះមិនទាន់បង្ហាញថា មានកើត។ តែល្ងាចថ្ងៃដដែល លទ្ធផលបង្ហាញថា មានអ្នកកើតកូវីដ១៩ ព្រឹកឡើងថ្ងៃចន្ទ ខ្ញុំទៅធ្វើតេស្ត ហើយចេញលទ្ធផលមកមានឆ្លងកូវីដ១៩»។
ពាក់ព័ន្ធនឹងករណីនេះដែរ ក្រសួងសុខាភិបាល កាលពីយប់ថ្ងៃម្សិលមិញ បានស្នើដល់ប្រជាពលរដ្ឋដែលបានទៅទិញទំនិញនៅហាង Zando ផ្លូវត្រសក់ផ្អែម និង Pedro នៅផ្លូវព្រះសីហនុ រាជធានីភ្នំពេញ រួសរាន់ទៅធ្វើចត្តាឡីស័កនៅសណ្ឋាគារសុខាភ្នំពេញ ដោយការចំណាយទាំងអស់ជាបន្ទុករបស់រាជរដ្ឋាភិបាល។
ការស្នើនេះ ធ្វើឡើងបន្ទាប់ពីក្រសួងបានរកឃើញក្នុងពេលថ្មីៗនេះថា មានបុគ្គលិកនិងអ្នកទៅហាងទាំងពីរនេះបានឆ្លងជំងឺកូវីដ១៩ជាបន្តបន្ទាប់ ដែលគិតមកដល់ព្រឹកថ្ងៃពុធនេះ មានមនុស្សចំនួន៣៨នាក់ហើយត្រូវបានរកឃើញថា បានឆ្លងជំងឺកូវីដ១៩ ក្នុងព្រឹត្តិការណ៍សហគមន៍២៨វិច្ឆិកា។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា គិតមកដល់ថ្ងៃនេះ អ្នកខ្វះលទ្ធភាពធ្វើចត្តាឡីស័កដោយខ្លួនឯង មានចំនួន៥៨នាក់។ ចំណែកអ្នកដែលបានទៅហាង Zando និង Pedro បានទៅធ្វើចត្តាឡីស័កនៅសណ្ឋាគារសុខាភ្នំពេញ ចំនួន៣៧នាក់ ហើយក៏មានអ្នកផ្សេងទៀតកំពុងទាក់ទងទៅទៀតផងដែរ។
លោកថា៖ «សូមបងប្អូនជឿជាក់ថា នៅទីតាំង [សណ្ឋាគារសុខាភ្នំពេញ] នេះ ពិតជាល្អប្រសើរ ទី១ វាធ្វើឱ្យបងប្អូន បើសិនជាមានផ្ទុកមេរោគ បងប្អូនមិនចម្លងទៅអ្នកដទៃ ទី២ បងប្អូនមានទីតាំងមួយដែលធ្វើចត្តាឡីស័កដោយមានផាសុកភាពល្អ នេះជាការគិគគូររបស់ប្រមុខរាជរដ្ឋាភិបាល សូមបងប្អូនចូលរួម»។
បើតាមក្រសួងសុខាភិបាល គិតមកដល់ព្រឹកថ្ងៃនេះ កម្ពុជារកឃើញអ្នកឆ្លងជំងឺកូវីដ១៩ សរុប៣៥៥នាក់ ក្នុងនោះព្យាបាលជាសះស្បើយ ចំនួន៣០៧នាក់ និងកំពុងសម្រាកព្យាបាលនៅមន្ទីរពេទ្យ ចំនួន៤៧នាក់៕
