ក្រសួងសុខាភិបាល អះអាងថា អគ្គនាយកដ្ឋានពន្ធនាគារ និងក្រសួងសុខាភិបាល បានតាមដាននិងពិនិត្យសុខភាពអ្នកជាប់ឃុំឃាំងយ៉ាងយកចិត្តទុកដាក់ អំឡុងពេលដែលកម្ពុជាកំពុងប្រឈមនឹងការឆ្លងរាលដាលជំងឺកូវីដ១៩។
ការបំភ្លឺរបស់ក្រសួងសុខាភិបាល ធ្វើឡើងបន្ទាប់ពីអង្គការលើកលែងទោសអន្តរជាតិ និងអង្គការការពារសិទ្ធិមនុស្សលីកាដូ កាលពីថ្ងៃទី០៩ ខែធ្នូ ឆ្នាំ២០២០ បានចេញសេចក្តីថ្លែងការណ៍រួមមួយ ដោយបង្ហាញការព្រួយបារម្ភចំពោះហានិភ័យនិងភាពប្រឈមរបស់អ្នកជាប់ពន្ធនាគារ ខណៈកម្ពុជាកំពុងឆ្លងរាលដាលជំងឺកូវីដ១៩។
ក្រៅពីបង្ហាញក្ដីបារម្ភ ក្រុមអង្គការសង្គមស៊ីវិលទាំងនេះបានទទូចឱ្យរដ្ឋាភិបាលចាត់វិធានការ មួយចំនួន ដើម្បីការពារសិទ្ធិទទួលបានសេវាសុខភាពរបស់អ្នកជាប់ឃុំក្នុងពន្ធនាគារ និងទាមទារឱ្យមានការដោះលែងអ្នកទោសមួយចំនួនផងដែរ។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃនេះ ឱ្យដឹងថា ចាប់តាំងពីផ្ទុះព្រឹត្តិការណ៍ «សហគមន៍ ២៨ វិច្ឆិកា» មក អគ្គនាយកដ្ឋានពន្ធនាគារ និងក្រសួងផ្ទាល់ បានស្រាវជ្រាវរកអ្នកពាក់ព័ន្ធក្នុងព្រឹត្តិការណ៍សហគមន៍នេះនៅពន្ធនាគារហើយ។
ក្រសួងបន្តថា បើទោះបីជារបាយការណ៍អគ្គនាយកដ្ឋានពន្ធនាគារ បង្ហាញថា មិនមានអ្នកប៉ះពាល់នឹង «ព្រឹត្តិការណ៍សហគមន៍ ២៨វិច្ឆិកា» ណាម្នាក់ មានការប្រាស្រ័យទាក់ទងជាមួយអ្នកជាប់ឃុំឃាំងក៏ដោយ ក៏ក្រសួងនិងអគ្គនាយកដ្ឋានពន្ធនាគារ បានយកចិត្តទុកដាក់តាមដានសុខភាពអ្នកជាប់ឃុំឃាំងជាប្រចាំយ៉ាងហ្មត់ចត់ ទាំងស្ថានភាពជំងឺផ្តាសាយធំ និងជំងឺកូវីដ១៩ ដោយមិនរើសអើងអ្នកជាប់ពន្ធនាគារឡើយ។
ក្រសួងសុខាភិបាល៖ «ការផ្ទុះឡើងជំងឺផ្តាសាយធំនៅមណ្ឌលអប់រំកែប្រែទី១ នៅថ្ងៃទី០៩ ខែធ្នូ ឆ្នាំ២០២០មក ក្រសួងសុខាភិបាលបានចាត់មន្ត្រីក្រម ឆ្លើយតបបន្ទាន់ ចុះជាបន្ទាន់ទៅកាន់មណ្ឌលអប់រំកែប្រែទី១ នៅយប់ថ្ងៃទី០៩ និងនៅព្រឹកថ្ងៃទី១០ ខែធ្នូ ឆ្នាំ២០២០ ដើម្បីពិនិត្យមើលស្ថានភាពសុខភាពអ្នកជាប់ឃុំឃាំងដោយផ្ទាល់ ហើយរបាយការណ៍របស់អគ្គនាយកដ្ឋានពន្ធនាគារ មណ្ឌលអប់រំកែប្រែទី១ ជាផ្លូវការបានបង្ហាញថា មិនមានករណីជំងឺផ្តាសាយធំក្នុងចំណោមអ្នកជាប់ឃុំឃាំងនៅទីនោះឡើយ»។
ក្រសុខាភិបាល បញ្ជាក់ថា ចាប់ពីថ្ងៃទី០១ ដល់ថ្ងៃទី១០ ខែធ្នូ ឆ្នាំ២០២០ មណ្ឌលអប់រំកែប្រែទី១ មិនមានករណីជំងឺផ្តាសាយធំ ដែលមានការសង្ស័យថា ជាប់ពាក់ព័ន្ធនឹងការចម្លងវីរុសកូវីដ-១៩ ទាំងក្នុងចំណោមមន្ត្រីចំនួន៣៥៤នាក់ និងអ្នកជាប់ឃុំឃាំង៧ ៦០៨នាក់នោះទេ។
គួរបញ្ជាក់ថា កន្លងមក លោក ឆែម សាវុធ អគ្គនាយកនៃអគ្គនាយកដ្ឋានពន្ធនាគារ ត្រូវបានធ្វើតេស្តឃើញវិជ្ជមានកូវីដ១៩ ក្នុងព្រឹត្តិការណ៍សហគមន៍២៨វិច្ឆិកា គឺសប្តាហ៍តែមួយ ក្រោយពេលដែលលោកបានចុះទៅពន្ធនាគារព្រៃស រាជធានីភ្នំពេញ។
ក្នុងរូបថតដែលបង្ហោះលើទំព័រហ្វេសប៊ុកផ្លូវការរបស់អគ្គនាយកដ្ឋានពន្ធនាគារ នៅថ្ងៃទី២៣ ខែវិច្ឆិកា គេបានឃើញរូបលោកកំពុងឈរលើកដៃក្បែរជនជាប់ឃុំអង្គុយជាជួរ ដោយពុំមានពាក់ម៉ាស់នោះទេ។
បើតាមក្រសួងសុខាភិបាល ឱ្យដឹងថា គិតចាប់តាំងពីថ្ងៃទី២៨ ខែវិច្ឆិកា ដល់ថ្ងៃទី១០ ខែធ្នូ ឆ្នាំ២០២០ កម្ពុជារកឃើញឆ្លងជំងឺកូវីដ១៩ ក្នុងព្រឹត្តិការណ៍ «សហគមន៍ ២៨វិច្ឆិកា» ចំនួន៤០នាក់ ក្នុងនោះ ស្រី១៩នាក់ និងប្រុស២១នាក់៕
