មេនគរបាលខេត្តព្រះសីហនុ បានឱ្យដឹងថា មនុស្ស៨នាក់ដែលត្រូវបានចាប់ខ្លួនក្រោយជាប់ពាក់ព័ន្ធនឹងអំពើហិង្សាក្នុងជម្លោះដីធ្លីមួយកន្លែងនៅឃុំអូរឧកញ៉ាហេង ស្ថិតក្នុងស្រុកព្រៃនប់ កំពុងស្ថិតក្រោមការសាកសួរបន្តពីសំណាក់សមត្ថកិច្ចនៅឡើយរហូតមកដល់ថ្ងៃនេះ។
ស្នងការនគរបាលខេត្តព្រះសីហនុ លោក ជួន ណារិន ប្រាប់វីអូឌីនៅថ្ងៃអង្គារនេះថា មនុស្ស៨នាក់ដែលសមត្ថកិច្ចចាប់ខ្លួនកាលពីម្សិលមិញពាក់ព័ន្ធជម្លោះដីធ្លីនោះ មិនត្រូវបានអនុញ្ញាតឱ្យដោះលែងនោះឡើយ ដោយបន្តស្ថិតក្រោមការសាកសួរពីសំណាក់សមត្ថកិច្ចនៅឯអធិការដ្ឋានស្រុកព្រៃនប់នៅថ្ងៃនេះទៀត ហើយសមត្ថកិច្ចកំពុងបន្តស្រាវជ្រាវចាប់ជនបង្កបន្ថែមទៀត។
មេនគរបាលខេត្តព្រះសីហនុរូបនេះ អះអាងថា មនុស្ស៨នាក់ដែលឃាត់ខ្លួនមានទាំងពីរភាគីជម្លោះ ប៉ុន្តែលោកបញ្ជាក់ថា អ្នកដែលឃាត់ខ្លួនមកសាកសួរនោះ មិនមែនសុទ្ធតែជាជនសង្ស័យនោះទេ។ លោកបន្ថែមថា ព្រឹត្តិការណ៍ប៉ះទង្គិចគ្នានោះបានបណ្តាលឱ្យរងរបួសទាំងសងខាង និងខូចខាតរថយន្តមួយគ្រឿង។
លោក ជួន ណារិន ប្រាប់ថា៖ «អ៊ីចឹងទេ ក្នុងនាមយើងជាសមត្ថកិច្ច យើងឈរជាអាជ្ញាកណ្តាល ដើម្បីថ្លឹងថ្លែងរកភាពយុត្តិធម៌ជូនចំពោះជនរងគ្រោះ។ អ៊ីចឹងយើងនឹងពង្រីកធ្វើការស៊ើបអង្កេតទៅលើជនដៃដល់ និងជនអ្នកបង្ក និងអ្នកញុះញង់ទាំងសងខាង។ អ្នកណាពាក់ព័ន្ធនឹងសកម្មភាពហ្នឹង យើងនឹងអនុវត្តតាមច្បាប់»។
អធិការនគរបាលស្រុកព្រៃនប់ លោក ហួ យ៉ៃ សុំមិនធ្វើអធិប្បាយលើរឿងនេះទេ ដោយប្រាប់ថា កំពុងជាប់រវល់ប្រជុំដោះស្រាយករណីនេះ។
អធិការដ្ឋាននគរបាលស្រុកព្រៃនប់ បានផ្សព្វផ្សាយលើទំព័រហ្វេសប៊ុករបស់ខ្លួនថា កាលពីថ្ងៃម្សិលមិញ មានករណីហិង្សាដោយចេតនារវាងកូនចៅឧកញ៉ា ភឺន ផល្លា និងប្រជាពលរដ្ឋ បណ្តាលឱ្យរងរបួសទាំងសងខាងនិងខូចខាតឡានមួយគ្រឿង ដែលហេតុការណ៍នោះកើតឡើងនៅភូមិអូរឧកញ៉ាហេង។
អធិការដ្ឋាននគរបាលស្រុកព្រៃនប់បញ្ជាក់ថា ភាគីឧកញ៉ា ភឺន ផល្លា រងរបួសស្រាលចំនួន២នាក់ និងភាគីខាងប្រជាពលរដ្ឋរងរបួសមធ្យមចំនួន៣នាក់ ក្នុងនោះស្ត្រីម្នាក់បានរងរបួសក្រោមភ្នែកខាងស្តាំ។
អធិការដ្ឋាននគរបាលស្រុកឱ្យដឹងថា ដើមចមដែលបណ្តាលឱ្យអំពើហិង្សានេះកើតឡើងដោយសារកូនចៅរបស់លោកឧកញ៉ា ភឺន ផល្លា ចុះហាមឃាត់ប្រជាពលរដ្ឋមិនឱ្យសាងសង់ផ្ទះលើដីកំពុងមានជម្លោះ។
ពលរដ្ឋរស់នៅភូមិអូរឧកញ៉ាហេង លោក រឹម សាឡែន ដែលឃើញហេតុការណ៍នេះ ប្រាប់វីអូឌីថា កូនចៅប្រហែល២០នាក់របស់លោកឧកញ៉ា ភឺន ផល្លា ប្រដាប់ដោយកាំភ្លើង ចម្ពាមកៅស៊ូ ដែកទីប និងកាំបិត បានជិះឡានទៅវាយលើប្រជាពលរដ្ឋមុន ដែលបណ្តាលឱ្យអ្នកភូមិឃើញហេតុការណ៍នេះ ខឹងសម្បា ហើយបានឃាត់រថយន្តនិងគប់ដុំថ្មតបតវិញ។
លោក រឹម សាឡែន អះអាងថា អ្នកភូមិរាប់រយគ្រួសារបានទិញដីបន្តពីពលរដ្ឋផ្សេងទៀត ដើម្បីសង់លំនៅឋាននិងបង្កបង្កើនផលនៅតំបន់ព្រៃស្មាច់ ស្ថិតក្នុងឃុំអូរឧកញ៉ាហេង តាំងពីឆ្នាំ១៩៩៣ រហូតមកដល់បច្ចុប្បន្ន ដោយមានការទទួលស្គាល់ការរស់នៅពីអាជ្ញាធរមូលដ្ឋានថែមទៀត។
លោកបន្តថា ទើបតែនៅឆ្នាំ២០២០នេះ លោកឧកញ៉ា ភឺន ផល្លា និងជាមេបញ្ជាការកងពលតូចលេខ «ង៧០» មកអះអាងថា ដីតំបន់នោះជារបស់ខ្លួន និងបានប្រើកូនចៅឱ្យមកដេញពលរដ្ឋចេញនិងមិនសាងសង់លំនៅឋានទៅវិញ។
លោក រឹម សាឡែន និយាយថា៖ «ប្រជាជនគាត់រស់នៅរាប់ឆ្នាំហើយ ហើយក្រុមឧកញ៉ា ភឺន ផល្លា ចុះមកហាមឃាត់ប្រជាជនមិនឱ្យធ្វើផ្ទះ ហើយប្រកែកចុះប្រកែកឡើង បានបាញ់ ហើយតេហៅគ្នាមកសុទ្ធតែម៉ូតូ សុទ្ធតែឡាន មានគ្នា២០នាក់ជាង មកបាញ់ប្រជាជនពេញណាពេញណី»។
ពាក់ព័ន្ធករណីនេះ វីអូឌី មិនទាន់អាចរកការទំនាក់ទំនងពីលោក ភឺន ផល្លា ដើម្បីសុំការបញ្ជាក់នៅឡើយទេនៅថ្ងៃអង្គារនេះ។
វីអូឌី ក៏បានព្យាយាមស្វែងរកការបញ្ជាក់ពីមេបញ្ជាការកងពលតូចលេខ៧០ លោក ម៉ៅ សុផាន់ ផងដែរ ប៉ុន្តែទូរសព្ទរបស់លោកមិនអាចទាក់ទងបាននោះឡើយ។
អ្នកនាំពាក្យបញ្ជាការដ្ឋានកងទ័ពជើងគោក លោក ម៉ៅ ផល្លា បានប្រាប់ថា លោកមិនបានដឹងពីហេតុការណ៍ប៉ះទង្គិចគ្នាក្នុងជម្លោះដីធ្លីនៅស្រុកព្រៃនប់នោះឡើយ ហើយលោកប្រាប់ថា លោក ភឺន ផល្លា មិនមែនជាមេបញ្ជាការរងកងពលតូចលេខ ៧០ ឬ «ង៧០» នោះឡើយ។
លោក ម៉ៅ ផល្លា ប្រាប់ថា៖ «អូ! ខ្ញុំអត់បានទទួលព័ត៌មានផងបង សុំទោសណា! ដូចជាមិនមានទេ! ឈ្មោះហ្នឹងអត់មានទេ!»
នៅពេលសាកសួរថា តើលោក ភឺន ផល្លា ជាមន្ត្រីយោធាបម្រើការនៅអង្គភាពណានោះ អ្នកនាំពាក្យអគ្គបញ្ជាការដ្ឋានកងយោធពលខេមរភូមិន្ទ លោក ថោង សូលីម៉ូ សុំមិនបកស្រាយទេ ហើយបង្វែរឱ្យសួរទៅអ្នកនាំពាក្យកងទ័ពជើងគោកវិញ។
អ្នកនាំពាក្យរងនៃក្រសួងការពារជាតិ លោក អ៊ុន សុវណ្ណ ប្រាប់ថា លោកមិនទាន់អាចបញ្ជាក់បានទេអំពីឈ្មោះមន្ត្រីយោធារូបនេះ ប៉ុន្តែលោកប្រាប់ថា លោកនឹងឆែកមើលឈ្មោះមន្ត្រីយោធារូបនេះនៅថ្ងៃស្អែកនេះ។
នៅពេលសាកសួរថា តើក្រសួងការពារនឹងមានវិធានការយ៉ាងណាទៅលើមន្ត្រីយោធាដែលជាប់ពាក់ព័ន្ធនឹងវិវាទដីធ្លីជាមួយប្រជាពលរដ្ឋនោះ អ្នកនាំពាក្យរូបនេះប្រាប់ថា មន្ត្រីយោធាទាំងអស់ ត្រូវតែគោរពតាមលក្ខន្តិកៈនៃកងយោធពលខេមរភូមិន្ទ ប៉ុន្តែលោកមិនបញ្ជាក់លម្អិតនោះឡើយ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ប្រាប់វីអូឌីតាមតេឡេក្រាមកាលពីម្សិលមិញថា លោក ភឺន ផល្លា មានជម្លោះដីធ្លីជាមួយប្រជាពលរដ្ឋចំនួនពីរភូមិ ស្ថិតក្នុងឃុំឧកញ៉ាហេង មានភូមិអូរតាសេក និងភូមិអូរឧកញ៉ាហេង។
អ្នកនាំពាក្យរូបនេះ អះអាងថា ពាក់ព័ន្ធជម្លោះដីធ្លីនេះ គឺរដ្ឋបាលខេត្តព្រះសីហនុបានចាត់ក្រុមការងារចម្រុះចុះអង្កេតស្រាវជ្រាវដោយយកចិត្តទុកដាក់ តាំងពីថ្ងៃទី១១ ខែកញ្ញា ឆ្នាំ២០២០ ដើម្បីធ្វើការបូកសរុបលទ្ធផលនៃការអង្កេតស្រាវជ្រាវជូនថ្នាក់ដឹកនាំពិនិត្យនិងសម្រេច។ លោកថា លទ្ធផលអង្កេតស្រាវជ្រាវរបស់ក្រុមការងារចម្រុះរដ្ឋបាលខេត្ត នឹងត្រូវធ្វើការបូកសរុបបញ្ចប់នាពេលខាងមុខនេះដែរ។
លោក ឃាង ភារម្យ ប្រាប់ថា៖ «ដើម្បីចៀសវាងនូវបាតុភាពផ្សេងៗដែលអាចកើតឡើងក្នុងសំណុំរឿងវិវាទនេះ រដ្ឋបាលខេត្តព្រះសីហនុបានស្នើឱ្យភាគីពាក់ព័ន្ធនិងប្រជាពលរដ្ឋទាំងអស់ ត្រូវរក្សាស្ថានភាពដើមលើទីតាំងដីវិវាទជាបណ្តោះអាសន្ន ហើយចៀសវាងរាល់ការធ្វើសកម្មភាពផ្សេងៗដែលបង្កការរាំងស្ទះ ធ្វើឱ្យយឺតយូរដល់ដំណើរការអង្កេតស្រាវជ្រាវ»។
នាយករងអង្គការការពារសិទ្ធិមនុស្សលីកាដូ លោក អំ សំអាត បានឱ្យដឹងថា បញ្ហាជម្លោះដីធ្លីនៅខេត្តព្រះសីហនុ គឺជាក្តីបារម្ភមួយ ដោយសារកន្លងមក បញ្ហាជម្លោះដីធ្លីនៅក្នុងខេត្តនេះបានកើតមានអំពើហិង្សាជាបន្តបន្ទាប់ និងឈានដល់ផ្ទុះអាវុធបណ្តាលឱ្យមនុស្សរងរបួសនិងពិការរហូតមកដល់សព្វថ្ងៃផងដែរ។
អ្នកការពារសិទ្ធិមនុស្សរូបនេះ បានស្នើឱ្យអាជ្ញាធរធ្វើការស្រាវជ្រាវនិងស៊ើបអង្កេតឱ្យបានហ្មត់ចត់ចំពោះករណីហិង្សានេះ ដោយស្វែងរកចាប់ខ្លួនជនដៃដល់និងអ្នកនៅពីក្រោយយកទៅដាក់ទោសតាមច្បាប់ ដើម្បីផ្តល់យុត្តិធម៌ជូនជនរងគ្រោះ។
លោក អំ សំអាត មានប្រសាសន៍ថា៖ «សមត្ថកិច្ចត្រូវតែចាត់វិធានការផ្លូវច្បាប់ ជាពិសេសទៅលើជនដែលបង្កអំពើហិង្សានិងបង្កឱ្យមនុស្សរងរបួសហ្នឹង ដើម្បីទប់ស្កាត់អំពើហិង្សាហ្នឹងបន្តទៅទៀត។ ហើយមួយទៀត បញ្ហាដីធ្លីហ្នឹង ត្រូវតែមានការស៊ើបអង្កេតស្រាវជ្រាវនិងដោះស្រាយឱ្យបានឆាប់ កុំអូសពេលបន្លាយយូរដែលបង្កឱ្យបញ្ហាហ្នឹងកើតមានកាន់តែធ្ងន់ធ្ងរបន្តទៅទៀត»។
មន្រ្តីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះសីហនុ លោកស្រី ជៀប សុធារី មានប្រសាសន៍ថា មួយរយៈចុងក្រោយនេះ ជម្លោះដីធ្លីនៅខេត្តព្រះសីហនុផ្ទុះឡើងខ្លាំង ជាពិសេសនៅឃុំបិតត្រាំង ឃុំរាម និងនៅសង្កាត់លេខ១។ លោកស្រីបន្តថា ក្នុងឆ្នាំ២០២០នេះ អាជ្ញាធរខេត្តនៅពុំទាន់ដោះស្រាយបញ្ហាដីធ្លីនេះបានល្អប្រសើរនៅឡើយទេ៕
