ការបាត់បង់យ៉ាងធំនៃចំនួនភ្ញៀវទេសចរអន្តរជាតិចូលមកកម្ពុជា ការធ្លាក់ចុះនៃការនាំចេញផលិតផលកាត់ដេរ និងការថមចុះនៃវិស័យសំណង់ និងអចលនទ្រព្យ ត្រូវបានចាត់ទុកជាកត្តាធំបំផុតនៃការធ្លាក់ចុះកំណើនសេដ្ឋកិច្ចកម្ពុជានៅឆ្នាំ២០២០នេះ ដែលឡោមព័ទ្ធទៅដោយវិបត្តិបណ្ដាលមកពីការឆ្លងរីករាលដាលនៃជំងឺកូវីដ១៩។
កត្តាដែលជំរុញឱ្យសេដ្ឋកិច្ចកម្ពុជាដាំក្បាលចុះនេះ ត្រូវបានលើកឡើងនៅក្នុងសេចក្ដីប្រកាសព័ត៌មាននៅថ្ងៃនេះរបស់ធនាគារជាតិនៃកម្ពុជា ដែលបង្ហាញថា កំណើនសេដ្ឋកិច្ចកម្ពុជានៅឆ្នាំនេះ បានធ្លាក់ចុះច្រើនជាងការរំពឹងទុកទៅទៀត។
កំណើនសេដ្ឋកិច្ចកម្ពុជា ត្រូវបានប៉ាន់ស្មានកាលពីដើមឆ្នាំថា នឹងធ្លាក់ចុះដក១.៩ភាគរយនៅក្នុងឆ្នាំនេះ ដែលប្រហាក់ប្រហែលគ្នានឹងរបាយការណ៍ធនាគារពិភពលោក បានព្យាករថា សេដ្ឋកិច្ចកម្ពុជានៅឆ្នាំនេះ នឹងធ្លាក់ចុះដល់ដក២ភាគរយ មុននឹងវិលត្រឡប់ទៅរកកំណើន៤ភាគរយវិញនៅឆ្នាំខាងមុខ។
ធនាគារកណ្ដាលកម្ពុជា អះអាងថា ការធ្លាក់ចុះនៃកំណើនសេដ្ឋកិច្ចកម្ពុជា ដោយសារតែការដាំក្បាលចុះនៃវិស័យទាំងបីសំខាន់ មានវិស័យទេសចរណ៍ ការនាំចេញផលិតកាត់ដេរ និងវិស័យសំណង់ ដែលរងគ្រោះដោយសារតែការឆ្លងរីករាលនៃជំងឺកូវីដ១៩នៅក្នុងឆ្នាំនេះ។
បើតាមធនាគារជាតិនៃកម្ពុជា វិស័យទាំងបីនេះ បានចូលរួមចំណែកធំបំផុតដល់ទៅ ២ភាគ៣នៃកំណើនរីកលូតលាស់នៃសេដ្ឋកិច្ចកម្ពុជានៅក្នុងរយៈពេល ២ទសវត្សរ៍ចុងក្រោយមកនេះ ក្នុងនោះការនាំចេញផលិតផលកាត់ដេរ មានចំណែកដល់ ៧០ភាគរយនៃទំហំនាំចេញសរុបរបស់កម្ពុជាទៅកាន់ទីផ្សារអន្តរជាតិ។
ខណៈដែលវិស័យទាំងបីរងគ្រោះ ធនាគារកណ្ដាលអះអាងថា វិស័យកសិកម្ម និងហិរញ្ញវត្ថុ បែរជាអាចរក្សាបានកំណើនជាវិជ្ជមានរបស់ខ្លួន ហើយបានចូលរួមចំណែកកាត់បន្ថយការធ្លាក់ចុះយ៉ាងគំហុកនៃកំណើនសេដ្ឋកិច្ចកម្ពុជាទាំងមូល។
បើតាមហ្វេសប៊ុករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន កាលពីសប្ដាហ៍មុន ការនាំចេញផលិតផលកសិ-ឧស្សាហកម្ម ៦មុខរបស់កម្ពុជានៅឆ្នាំនេះ សុទ្ធតែកើនឡើយ។ កសិផលទាំង៦មុខនោះ មានដំឡូងមី ស្វាយចន្ទី ស្វាយ ចេកអំបូងលឿង ម្រេច និងមៀនប៉ៃលិន ដែលការនាំចេញកសិផលទាំង៦មុខនេះ មានតម្លៃសរុបដល់ទៅជាង ២,៣២១លានដុល្លារ។
របាយការណ៍របស់សហព័ន្ធស្រូវអង្ករកម្ពុជា បង្ហាញថា កម្ពុជានាំចេញអង្ករដល់ទៅជាង ៦០ម៉ឺនតោទៅកាន់ទីផ្សារអន្តរជាតិនៅក្នុងរយៈពេល ១១ខែកន្លងមកនេះ ដោយកើនឡើងខ្ទង់ ១៧ភាគរយ បើធៀបរយៈពេលដូចគ្នាកាលពីឆ្នាំមុន៕