ក្រសួងអប់រំបានអនុញ្ញាតឱ្យដំណើរការឡើងវិញនូវសកម្មភាពកីឡា និងការលេងកីឡាដើម្បីសុខភាព ដែលការសម្រេចនេះបានកើតឡើងក្រោយពីការបិទបញ្ចប់នៃព្រឹត្តិការណ៍ឆ្លងក្នុងសហគមន៍។
ក្នុងសេចក្ដីជូនដំណឹងនៅថ្ងៃនេះ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានអនុញ្ញាតឱ្យអនុញ្ញាតឱ្យបើកដំណើការឡើងវិញនូវអាជីវកម្មក្លឹបហាត់ប្រាណ ការលេងកីឡាដើម្បីសុខភាព ការប្រកួតកីឡាអាជីព និងការប្រមូលហ្វឹកហាត់របស់ក្រុមកីឡាករជម្រើសជាតិសម្រាប់ឈានទៅការប្រកួតកីឡាស៊ីហ្គេមលើកទី៣១នៅឆ្នាំក្រោយដែលគ្រោងធ្វើនៅវៀតណាម និងព្រឹត្តិការណ៍ស៊ីហ្គេមឆ្នាំ២០២៣ ដែលគ្រោងធ្វើនៅកម្ពុជា។
បើទោះបីអនុញ្ញាតឱ្យបើកដំណើរការឡើងវិញក្ដី ក្រសួងបានក្រើនរំឭកឱ្យអនុវត្តតាមវិធានការសុវត្ថិភាពសុខភាពដែលណែនាំដោយក្រសួងសុខាភិបាល ដូចជា រក្សាគម្លាត រក្សាអនាម័យជាប្រចាំជាដើម។
ក្រសួងអប់រំបានសម្រេចបែបនេះ បន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសបិទបញ្ចប់ព្រឹត្តិការណ៍ឆ្លងក្នុងសហគមន៍២៨វិច្ឆិកាកាលពីថ្ងៃពុធកន្លងមកនេះ។
មនុស្ស ៤១នាក់ ត្រូវបានរកឃើញឆ្លងជំងឺកូវីដ១៩ បន្ទាប់ពីពួកគេពាក់ព័ន្ធនឹងករណីឆ្លងក្នុងសហគមន៍ ដែលត្រូវបានរកឃើញកាលពីថ្ងៃទី២៨ ខែវិច្ឆិកាកន្លងមកនេះ។ ក្រសួងសុខាភិបាលបានប្រកាសថា អ្នកជំងឺ ៣៩នាក់ក្នុងចំណោមអ្នកឆ្លងសហគមន៍ ៤១នាក់ ត្រូវបានព្យាបាលជាសះស្បើយហើយ ខណៈអ្នកជំងឺ ២នាក់ទៀត កំពុងបន្តស្ថិតក្រោមការព្យាបាលនៅឡើយ៕
