អាជ្ញាធរជាតិអប្សរា អះអាងថា គ្មានស្វាមួយក្បាលណាស្លាប់នោះឡើយនៅក្នុងប្រតិបត្តិការមួយ ដែលស្ថាប័នមួយនេះបញ្ជាក់ថា ដើម្បីប្រមូលស្វាកាចៗមួយចំនួនយកទៅព្រលែងនៅក្នុងមណ្ឌលថែរក្សាសត្វព្រៃ។
ក្រុមមន្ត្រីអាជ្ញាធរអប្សរា បានចុះចាប់ស្វាជាច្រើនក្បាលនៅក្នុងតំបន់រមណីយដ្ឋានប្រវត្តិសាស្ត្រអង្គរកាលពីថ្ងៃអង្គារកន្លងមកនេះ ដែលជំរុញឱ្យផ្ទុះការរិះគន់ចំពោះចំណាត់ការបែបនេះរបស់ពួកគេ។
ក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះ អាជ្ញាធរជាតិអប្សរា បកស្រាយថា ក្រុមការងារបានប្រើកាំភ្លើងបាញ់ដាក់ថ្នាំសណ្ដំ ដើម្បីចាប់ស្វាកាចទាំងនោះ ហើយថា បច្ចេកទេសនេះមិនបណ្ដាលឱ្យស្វាស្លាប់នោះឡើយ។
អាជ្ញាធរជាតិអប្សរានិយាយថា៖ «ក្នុងពេលបច្ចុប្បន្ននេះ សត្វស្វាទាំងនោះកំពុងត្រូវធ្វើចត្តាឡីស័កនៅឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ មុនយកទៅព្រលែងក្នុងព្រៃធម្មជាតិ»។
អាជ្ញាធរមួយនេះ អះអាងថា មានតែស្វា ១៦ក្បាលប៉ុណ្ណោះ ត្រូវបានចាប់យកពីតំបន់ប្រាសាទបាយ័ន ហើយថា ស្វាដស្លូតវិញ មិនត្រូវបានចាប់យកចេញពីតំបន់អង្គរនោះឡើយ។
ប្រភពដដែល បញ្ជាក់ថា ក្រុមមន្ត្រីរបស់ខ្លួនបានសម្រេចចាប់ស្វាកាចៗទាំងនោះ បន្ទាប់ពីស្វាទាំងនោះបានផ្លាស់ប្ដូរលក្ខណៈពីធម្មជាតិរបស់ខ្លួនក្លាយទៅជាសត្វកាច ចេះដណ្ដើមចំណី និងបានបង្ករបួសស្នាមដល់ភ្ញៀវទេសចរជាតិ អន្តរជាតិ និងបានធ្វើឱ្យជ្រុះថ្មប្រាសាទជាយថាហេតុផងដែរ។
លោក ថោ ម៉ៅ អាយុ៤១ឆ្នាំ ដែលប្រាប់ថាជាមគ្គុទេសក៍ទេសចរណ៍នៅតំបន់រមណីយដ្ឋានអង្គរ បានឱ្យដឹងថា ក្រុមមន្ត្រីអាជ្ញាធរបានចាប់ទាំងស្វាស្លូត ស្វាចាស់ៗ និងកូនស្វាតូចៗផងដែរ ហើយលោកថា ការអនុវត្តនេះខុសពីសេចក្ដីប្រកាសព័ត៌មានកាលពីថ្ងៃចន្ទ ដែលនិយាយថា ចាប់តែស្វាកាចៗប៉ុណ្ណោះ។
បុរសរូបនិយាយទៀតថា លោកបានយល់ព្រមចង្អុលបង្ហាញទៅក្រុមមន្ត្រីនូវស្វាកាចៗ ប៉ុន្តែ លោកថា អាជ្ញាធរបែរជាមិនសួរនាំរូបលោកនោះឡើយ នៅពេលចុះទៅអនុវត្តនោះ ហើយទាំងមិនអនុញ្ញាតិឱ្យលោកចូលក្បែរទីតាំងចាប់ទៀតផង។
បុរសរូបនេះអះអាងថា លោកឃើញសត្វស្វាមួយក្បាលធ្លាក់ពីលើដើមឈើកម្ពស់ប្រហែល ២០ម៉ែត្រមកលើថ្ម ក្រោយពីត្រូវបានបាញ់ឱ្យសន្លប់ ហើយលោកហៅទង្វើអាជ្ញាធរថា គ្មានការទទួលខុសត្រូវចំពោះរឿងនេះនោះទេ។
បុរសរូបនេះ អះអាងទៀតថា លោកបានឃើញស្វា ២ក្បាលក្នុងចំណោម ១៦ក្បាល ត្រូវបានបាញ់ឱ្យសន្លប់ ហើយធ្លាក់ពីលើដើមឈើប៉ះមកនឹងថ្ម។ លោកបន្ថែមទៀតថា តាំងពីមានការតវ៉ាមកមកថ្ងៃម្សិលមិញនេះ ពុំទាន់ឃើញមានអាជ្ញាធរចុះចាប់ទៀតនោះទេ។
លោក ថោ ម៉ៅ និយាយថា៖«ក្រោយពេលត្រូវថ្នាំហើយក៏សន្លប់ ធ្លាក់ពីលើដើមឈើមក ដល់ពេលគាត់អត់បានយកអីត្រងទេ គាត់បាញ់ហើយទុកចោលដល់ទៅអ៊ីចឹងហើយ វាធ្លាក់មកវាត្រូវដុំថ្ម វាត្រូវថ្មអីក្រោមឮក្ដូង»។
ដោយគ្រាន់តែប្រាប់ថាជាអ្នកនាំភ្ញៀវដូចគ្នា ប៉ុន្តែមិនឈ្មោះដោយសារព្រួយបារម្ភពីសុវត្ថិភាពនោះ បុរសម្នាក់[U1] វ័យ៦០ឆ្នាំ អះអាងថា ក្រុមមន្ត្រីអាជ្ញាធរអប្សរាមិនស្គាល់ទេថា ស្វាមួយណាជាកូនមួយណាជាមេ មួយណាស្លូតឬកាចនោះទេ ហើយចេះតែចាប់តែផ្ដេសតែផ្ដាស។
លោកបន្តថា លោកក៏បានស្ទុះទៅមើល នៅពេលដែលលោកបានឃើញសត្វស្វាមួយក្បាលធ្លាក់ចុះពីដើមឈើ បន្ទាប់ពីត្រូវបានគេបាញ់ថ្នាំសន្លប់រួច។ នៅពេលទៅដល់ សត្វស្វានោះប្រហែលស្លាប់បាត់ហើយ ព្រោះក្បាលបោកទៅនឹងថ្ម និងចេញឈាម។
បុរសរូបនេះនិយាយថា៖ «វាស្លាប់បាត់ហើយ បើលើកមកទន់ក្បាលហើយហ្នឹង ខ្ញុំគិតថាមិនត្រូវថ្នាំទេព្រោះវាឡើងបែកក្បាលហូរឈាមហើយហ្នឹង»។
អ្នកនាំពាក្យអាជ្ញាធរជាតិអប្សារា លោក ឡុង កុសល អះអាងថា មកដល់ពេលនេះ ពុំមានសត្វស្វាណាមួយស្លាប់ ឬរងរបួសឡើយ។ លោក កុសល ប្រាប់ថា ក្រុមមន្ត្រីបានដាក់អន្ទាក់ និងបាញ់ថ្នាំសណ្ដំ ដើម្បីចាប់ស្វាទាំងនោះ។
នៅពេលត្រូវបានសាកសួរអំពីគ្រោះថ្នាក់ទៅលើស្វាក្រោយពេលត្រូវថ្នាំសណ្ដំ ហើយធ្លាក់ពីលើដើមឈើនោះ អ្នកនាំពាក្យរូបនេះ ប្រាប់ថា ទោះបីធ្លាក់ពីលើដើមឈើ ក៏វាមិនមានគ្រោះថ្នាក់អ្វីដែរ ព្រោះខាងមន្ត្រីជំនាញបានសិក្សារួចរាល់ហើយ។
លោក ឡុង កុសល និយាយថា៖«បងប្អូនយើងគាត់ចេះផុសទៅថាស្វាស្លាប់ ស្វាអត់ស្លាប់ទេ គឺដោយសារតែវាត្រូវថ្នាំនឹងវាសន្លប់»។
អនុប្រធានសមាគមមគ្គុទេសក៍ទេសចរណ៍អង្គរ លោក លាក់ សុកុន បានឱ្យដឹងថា វត្តមានរបស់សត្វស្វានៅតំបន់អង្គរ ក៏បង្កើតជាការទាក់ទាញដល់ភ្ញៀវទេសចរក្នុងស្រុក និងក្រៅស្រុកផងដែរ បន្ថែមទៅលើការទស្សនាប្រាង្គប្រាសាទបុរាណ។
លោក សុកុន បន្តទៀតថា អាជ្ញាធរមិនគួរយកស្វាទាំងនោះចេញពីតំបន់អង្គរឡើយ តែគួរជំនួសមកវិញនូវតំបន់អភិរក្សសត្វស្វានៅក្បែតំបន់ប្រាសាទដើម្បីថែរក្សាស្វាស្លូតទាំងនោះ ឱ្យរស់នៅតាមបែបធម្មជាតិ។
លោក លាក់ សុកុន និយាយថា៖ «ខ្ញុំថា យើងមានតំបន់មួយសម្រាប់អភិរក្សសត្វ ដែលកាចនៅក្បែរៗហ្នឹងទៅ ហើយសត្វដែលស្លូតឱ្យរស់នៅតាមធម្មជាតិហ្នឹងទៅ ខ្ញុំគិតថាអាចទាក់ទាញ ព្រោះគិតថា ជាប្រជាពលរដ្ឋខ្មែរយើង ហើយហ្នឹងភ្ញៀវអន្តរជាតិក៏គាត់ចូលចិត្តអ៊ីចឹងដែរ ចូលចិត្តទស្សនាសត្វហ្នឹងដែរ»៕
