ខណៈដែលលោក កឹម សុខា បួងសួងឱ្យមានការបង្រួបបង្រួមជាតិនោះ មេបក្សប្រឆាំងលោក សម រង្ស៊ី ដែលកំពុងរស់នៅឯក្រៅប្រទេស បានផ្ញើសារជូនពរឱ្យមានការផ្លាស់ប្ដូរទៅគោរពតាមឆន្ទៈប្រជាពលរដ្ឋ ប៉ុន្តែ លោកនាយករដ្ឋមន្ត្រី ហ៊ុន សែន វិញ បានផ្ញើសារពិសេសឆ្លើយតបនឹងការផ្ទុះឡើងនៃការឆ្លងជំងឺកូវីដ១៩នៅក្នុងចំណោមពលករខ្មែរដែលវិលត្រឡប់ពីប្រទេសថៃ។
នៅលើទំព័រហ្វេសប៊ុករបស់លោកនៅថ្ងៃចុងក្រោយនៃឆ្នាំ២០២០ លោក កឹម សុខា មេដឹកនាំគណបក្សប្រឆាំងដែលកំពុងប្រឈមមុខនឹងការចោទប្រកាន់ពីបទ«ក្បត់ជាតិ»នោះ រំពឹងថា ឆ្នាំថ្មីនឹងនាំមកនូវការបង្រួបង្រួមជាតិ និងឯកភាពជាតិ ជំនួសឆ្នាំចាស់ដែលញាំញីទៅដោយវិបត្តិបណ្ដាលមកពីជំងឺរាតត្បាត និងបញ្ហាអយុត្តិធម៌នានា។
លោក កឹម សុខា សរសេរថា៖ «សូមឱ្យឆ្នាំថ្មី២០២១នេះ នាំមកនូវការបង្រួបបង្រួមជាតិ ឯកភាពជាតិ សាមគ្គីជាតិ ដែលនឹងផ្ដល់នូវសន្តិភាព ស្ថិរភាពរឹងមាំ ភាពសុខដុមរមនា ភាពកក់ក្ដៅជូនដល់ប្រជាពលរដ្ឋខ្មែរយើង ដើម្បីកសាងវាសនាអនាគតថ្លៃថ្នូរ សម្បូររុងរឿង»។
ក្នុងសារដដែលនោះ លោក កឹម សុខា ក៏បានបួងសួងឱ្យជំងឺរាតត្បាត និងបញ្ហានានាដែលបង្កឱ្យមនុស្សឈឺចាប់ និងរងគ្រោះដោយអយុត្តិធម៌នោះ រលត់រលាយទៅតាមឆ្នាំចាស់ដែលកន្លងផុតទៅនេះ។
លោក កឹម សុខា បានរៀបរាប់បន្តលើទំព័រហ្វេសប៊ុករបស់លោកថា៖ «សូមកុំធ្វើឱ្យអ្នកដទៃឈឺចាប់ដោយសារមហិច្ឆិតារបស់ខ្លួន និងសូមចែករំលែកសេចក្ដីស្រឡាញ់រាប់អានដើម្បីសេចក្ដីសុខទាំងអស់គ្នា សេចក្ដីសុខរបស់អ្នក គ្រួសារអ្នក ប្រទេសជាតិអ្នក និងពិភពលោក»។
ពេញមួយឆ្នាំ២០២០កន្លងទៅនេះ ពិភពលោកទាំងមូលរួមទាំងកម្ពុជាផងដែរ បានប្រឈមមុខនឹងការរាតត្បាតនៃជំងឺកូវីដ១៩ ដែលជំរុញឱ្យបញ្ហានានាកើតឡើងជាបន្តបន្ទាប់។ របាយការណ៍របស់អង្គការសុខភាពនៅត្រឹមថ្ងៃទី២៧ ខែធ្នូកន្លងមកនេះ បង្ហាញថា មនុស្សដល់ទៅ ៧៩.២លាននាក់នៅទូទាំងពិភពលោក បានឆ្លងវីរុសកូរ៉ូណា ក្នុងនោះមនុស្សជាង ១.៧លាននាក់ហើយ បានស្លាប់ដោយសារតែជំងឺរាតត្បាតនេះ គិតចាប់តាំងពីជំងឺនេះបានផ្ទុះឡើង។
សម្រាប់កម្ពុជាវិញ មនុស្សដល់ទៅ ៣៧៨នាក់ហើយត្រូវបានរកឃើញឆ្លងមេរោគផ្លូវដង្ហើមមួយនេះចាប់តាំងពីវាត្រូវបានរកឃើញលើកដំបូងនៅកម្ពុជាកាលពីខែមករាឆ្នាំមុនមក ប៉ុន្តែ អ្នកជំងឺ ៣៦២នាក់ ត្រូវបានព្យាបាលជាសះស្បើយ។
ការឆ្លងរាតត្បាតនៃមេរោគផ្លូវដង្ហើមនេះ ក៏បង្ខំឱ្យដំណើរការសវនាការជំនុំជម្រះសំណុំរឿង«ក្បត់ជាតិ»ដែលចោទទៅលោក កឹម សុខា នោះ ត្រូវបានពន្យារពេលផងដែរកាលពីពាក់កណ្ដាលខែមីនាឆ្នាំមុន បន្ទាប់ពីបើកសវនាការជំនុំជម្រះជាបន្តបន្ទាប់ចាប់ពីថ្ងៃទី១៥ ខែមករា។ កាលបរិច្ឆេទនៃការបើកដំណើរការសវនាការសំណុំរឿងនេះឡើងវិញ មិនទាន់ត្រូវបានតុលាការកំណត់នៅឡើយទេ។
លោក កឹម សុខា អាយុ ៦៧ឆ្នាំ ត្រូវបានសមត្ថកិច្ចចាប់ខ្លួនកាលពីដើមខែកញ្ញា ឆ្នាំ២០១៧ ហើយចោទប្រកាន់ថា បានឃុបឃិតជាមួយរដ្ឋបរទេសមានបំណងផ្ដួលរំលំរដ្ឋាភិបាលស្របច្បាប់របស់លោកនាយករដ្ឋមន្ត្រី ហ៊ុន សែន ដែលការចោទប្រកាន់នេះ ត្រូវបានលោក កឹម សុខា បដិសេធចោល។
ចំណែកឯគណបក្សសង្គ្រោះជាតិដែលដណ្ដើមបានសំឡេងគាំទ្រស្ទើពាក់កណ្ដាលនៅក្នុងការបោះឆ្នោតឃុំសង្កាត់កាលពីឆ្នាំ២០១៧នោះ ត្រូវបានតុលាការកំពូលសម្រេចរំលាយចោល ហើយថ្នាក់ដឹកនាំជាន់ខ្ពស់រហូតដល់ ១១៨រូប រួមទាំង លោក សម រង្ស៊ី ផងដែរ ដែលជាដៃគូរបស់ដឹកនាំបក្សជាមួយលោក កឹម សុខា នោះ ត្រូវបានហាមឃាត់ធ្វើនយោបាយដល់ទៅ ៥ឆ្នាំ។
លោក សម រង្ស៊ី ដែលកំពុងរស់នៅឯក្រៅប្រទេសដើម្បីគេចពីចំណាត់ការរបស់តុលាការកម្ពុជានោះ ក៏បានផ្ញើសារជូនពរលើទំព័រហ្វេសប៊ុករបស់លោកនៅថ្ងៃនេះផងដែរ។
លោក សម រង្ស៊ី ផ្ញើសារជូនពរថា៖ «ជាពិសេស ខ្ញុំសូមប្រសិទ្ធពរជូនប្រទេសកម្ពុជា សូមឱ្យមាតុភូមិជាទីស្នេហារបស់យើងទាំងអស់គ្នា ទទួលបាននូវការផ្លាស់ប្ដូរជាវិជ្ជមាន ដូចអ្វីដែលប្រជារាស្ត្រខ្មែរប្រាថ្នាចង់បាន គឺការគោរពឆន្ទៈរបស់ប្រជារាស្ត្រ ដែលស្រឡាញសេរីភាព និងយុត្តិធម៌ ហើយចង់រស់នៅក្រោមរបបប្រជាធិបតេយ្យដ៏ពិតប្រាកដ បន្ទាប់ពីកម្ចាត់របបផ្ដាច់ការឱ្យបានជាស្ថាពរ»។
សម្រាប់លោកនាយករដ្ឋមន្ត្រី ហ៊ុន សែន វិញ លោកមិនបានផ្ញើសារជូនពរអ្វីនៅលើទំព័រហ្វេសប៊ុកផ្លូវការរបស់លោកទេ ប៉ុន្តែ ល្ងាចម្សិលមិញនេះ លោកបានចេញបញ្ជាឱ្យគ្រប់គ្រងឱ្យហ្មត់ចត់នូវពលករខ្មែរដែលវិលត្រឡប់ពីប្រទេសថៃវិញ។
មេដឹកនាំបក្សកាន់អំណាចរូបនេះ បានបញ្ជាបែបនេះ បន្ទាប់ពីក្រសួងសុខាភិបាលរកឃើញពលករខ្មែរ ២នាក់ឆ្លងជំងឺកូវីដ១៩ ក្រោយពីវិលត្រឡប់ពីប្រទេសថៃក្នុងរយៈពេលពីរបីថ្ងៃចុងក្រោយនេះ។
លោក ហ៊ុន សែន បានណែនាំឱ្យបញ្ឈប់ការដឹកជញ្ជូនពលករខ្មែរទៅកាន់ខេត្តនានា ប៉ុន្តែ ប្រាប់ឱ្យដាក់ពលករទើបវិលត្រឡប់ពីប្រទេសថៃនោះនៅដាច់ដោយឡែកនៅតាមមណ្ឌលចត្តាឡីស័កនានានៅតាមបណ្ដាខេត្តជាប់ព្រំដែនកម្ពុជា-ថៃ។ លោកនាយករដ្ឋមន្ត្រីបញ្ជាក់ថា ការធ្វើរបៀបនេះ គឺជួយទប់ស្កាត់ការឆ្លងរីករាលដាលណាមួយចូលទៅក្នុងសហគមន៍ជាថ្មី។
ថ្ងៃដំបូងនៃឆ្នាំថ្មីនេះ ក្រសួងសុខាភិបាលបានរកឃើញពលការិនីខ្មែរដល់ទៅ ១២នាក់បន្ថែមទៀត ឆ្លងជំងឺកូវីដ១៩ បន្ទាប់ពីពួកគេបានវិលត្រឡប់ពីប្រទេសថៃមកដល់កម្ពុជាវិញនៅចន្លោះថ្ងៃទី២៨ ដល់ថ្ងៃទី៣០ ខែធ្នូកន្លងមកនេះ ដែលធ្វើឱ្យចំនួនពលករខ្មែរឆ្លងជំងឺកូវីដ១៩ កើនឡើងដល់ ១៤នាក់ហើយ៕