តម្លៃនៃការនាំចេញផលិតផលកសិកម្ម រួមមាន ស្រូវអង្ករ ផលិតកម្មសត្វ និងព្រៃឈើក្នុងឆ្នាំ២០២០ មានតម្លៃប្រមាណ៤ពាន់៣៧លានដុល្លារ កើនជាង៥រយលានដុល្លារបើធៀបនឹងឆ្នាំ២០១៩។
យោងតាមរបាយការណ៍បូកសរុបតម្លៃកសិកម្ម និងការនាំចេញក្នុងឆ្នាំ២០២០ ក្រសួងកសិកម្ម បានបង្ហាញពីកំណើននៃការនាំចេញជាបន្តបន្ទាប់លើសឆ្នាំមុនៗ បើទោះបីសកលលោកប្រឈមនឹងវិបត្តិសកលកូវីដ១៩យ៉ាងណាក្ដី។
ការនាំចេញក្នុងឆ្នាំ២០២០កន្លងទៅ ក្រសួងថា ផលិតផលអង្ករមានតម្លៃប្រមាណ៥៣៨លានដុល្លារ ស្រូវមានតម្លៃ៧២៣លានដុល្លារ ដែលមានកំណើនប្រមាណ១១,៤០ភាគរយ បើធៀបនឹងឆ្នាំមុន។
ចំណែកតម្លៃផលិតផលកសិកម្មមិនមែនស្រូវអង្ករ រួមមាន ដំឡូងមី ស្វាយចន្ទី ស្វាយ ចេកអំបូងលឿង តាង៉ែន ម្រេច និងដំណាំរួមផ្សំផ្សេងទៀតវិញ ក្រសួងថា មានតម្លៃប្រមាណ២ពាន់១៧០លានដុល្លារ ខណៈតម្លៃនាំចេញផលិតផលសាច់សត្វ ជលផល ព្រៃឈើ និងផលិតផលកៅស៊ូសម្រាប់ឆ្នាំ២០២០ មានតម្លៃប្រមាណ៦០៥លានដុល្លារអាមេរិក។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ប្រាប់វីអូឌីនៅថ្ងៃអង្គារនេះថា តម្លៃសរុបនៃការនាំចេញឆ្នាំនេះ មានតម្លៃប្រមាណ៤ពាន់៣៧លានដុល្លារអាមេរិក កើនលើសឆ្នាំមុនប្រមាណ៥រយលានដុល្លារ។ លោកបន្ថែមថា តម្លៃនៃការនាំចេញនេះ បានកើនឡើងជាបន្តបន្ទាប់ចាប់តាំងពីឆ្នាំ២០១៨មក។
លោកបានថ្លែងថា៖ «ប្រាកដណាស់ ឱ្យតែយើងបាននាំចេញ ប្រាក់ចំណូលគឺបានធ្លាក់មកដល់ដៃប្រជាជនរបស់យើង ទាំងកសិករ ទាំងអ្នកធ្វើជំនួញ ហើយនិងរបរពាក់ព័ន្ធនឹងជំនួញនៃការនាំចេញហ្នឹង និងការកែច្នៃ។ នេះជាអ្វីដែលមោទកភាពដែលយើងទទួលបានប្រាក់ចំណូល»។
លោករដ្ឋមន្ត្រី ក៏បានបញ្ជាក់ផងដែរថា បើទោះបីពិភពលោកកំពុងប្រឈមនឹងបញ្ហានៃជំងឺកូវីដ១៩ក្ដី ក៏វាពុំបានធ្វើឱ្យប៉ះពាល់ដល់សង្វាក់ផលិតកម្មកសិកម្មរបស់កម្ពុជានោះទេ។
លោកមានប្រសាសន៍យ៉ាងដូច្នេះថា៖ «ទន្ទឹមនឹងប្រទេសគេលែងធ្វើអីកើត កំពុងតែចាប់មនុស្សធ្វើចត្តាឡីស័ក កម្ពុជាមានលទ្ធភាពធ្វើ ដោយសារតែនៅជនបទ ការរស់នៅរបស់យើង គម្លាតសង្គមពីផ្ទះមួយទៅផ្ទះមួយ ពីចម្ការផ្សេងៗគ្នា គាត់នៅធ្វើបំពេញភារកិច្ចបាន។ រីឯដំណើរការនៃការនាំចេញរបស់យើងកាន់តែប្រសើរឡើង តាមរយៈការកសាងហេដ្ឋារចនាសម្ព័ន្ធពីមួយឆ្នាំទៅមួយឆ្នាំកាន់តែល្អ ទន្ទឹមនឹងយើងកំពុងស្វះស្វែងរកទីផ្សារ មានចេក ស្វាយ អីជាដើម កាន់តែពង្រីកទីផ្សារ រួមទាំងស្រូវអង្ករផងដែរ»។
ប្រធានសហព័ន្ធស្រូវអង្ករកម្ពុជា និងជាប្រធានសហព័ន្ធម្រេច ឧកញ៉ា សុង សារ៉ន មានប្រសាសន៍ថា ការនាំចេញផលិតផលកសិកម្មរបស់កម្ពុជា នៅឆ្នាំ២០២០កន្លងទៅ ប្រព្រឹត្តបានល្អប្រសើរ ដោយសារតម្រូវការពិភពលោកកើនឡើង ក្នុងពេលដែលប្រឈមនឹងបញ្ហាកូវីដ១៩ ខណៈមនុស្សលែងចេញពីផ្ទះ ត្រូវការទិញស្បៀងបម្រុងទុក ស្របពេលដែលកម្ពុជារកបានទីផ្សារអន្តរជាតិបានជាបន្តបន្ទាប់។
លោកបន្ថែមថា៖ «ប្រសិនបើកម្ពុជាយើងក្ដោបនូវយុទ្ធសាស្ត្រការដាំដុះនូវចីរភាពនិងសុវត្ថិភាព ខ្ញុំជឿថា វិស័យកសិកម្មយើងនឹងអាចរីកចម្រើនបន្តទៀត ជាពិសេសទាក់ទងនឹងការនាំចេញ»។
ទីប្រឹក្សាឯករាជ្យផ្នែកកសិកម្ម លោក សម វិទូ មានប្រសាសន៍ថា វិបត្តិពិភពលោកឆ្នាំ២០២០ ជាការបង្ហាញថា វិស័យកសិកម្មគឺជាវិស័យដែលរដ្ឋាភិបាលត្រូវតែយកចិត្តទុកដាក់ឱ្យបានខ្លាំងបន្ថែមទៀត ស្របពេលដែលវិស័យផ្សេងទៀតកំពុងប្រឈមនឹងវិបត្តិ។ លោកបន្តថា វិស័យកសិកម្មកំពុងរក្សាកំណើនបានយ៉ាងល្អ។
លោកថា៖ «ឆ្នាំ២០២០ ជាឆ្នាំដែលល្អសម្រាប់វិស័យកសិកម្ម ព្រោះយើងឃើញថា នៅវិស័យផ្សេងៗត្បិតតែមានថយចុះ តែសម្រាប់កសិកម្មគឺមិនមានការធ្លាក់ចុះទេ ដែលធ្វើឱ្យកម្ពុជាយើងមានកម្លាំងក្នុងការប្រកួតប្រជែង ជាពិសេសសម្រាប់ផលិតផលកសិកម្មសម្រាប់ការហូបចុកនិងការស្ដុកទុកសម្រាប់វិស័យផ្សេងដែលត្រូវការ។ អ៊ីចឹងវាជាចំណុចដែលល្អមួយដើម្បីឱ្យកសិករយើងទុកចិត្តបន្ថែមក្នុងការផលិត»។
ដើម្បីធ្វើឱ្យវិស័យកសិកម្មកាន់តែរីកចម្រើនថែមទៀត លោកឱ្យជាយោបល់ថា រដ្ឋាភិបាលគួរយកចិត្តទុកដាក់ទៅលើការអភិវឌ្ឍហេដ្ឋារចនាសម្ព័ន្ធ បង្កើតឱ្យមានសិប្បកម្មនិងឧស្សាហកម្មកែច្នៃផលិតផលកសិកម្មឱ្យបានច្រើន បង្កើនបច្ចេកវិទ្យាកសិកម្មឱ្យខ្លាំងក្លា ថ្លៃទឹកភ្លើងចុះថោក ជាពិសេសគឺការផ្ដល់ហិរញ្ញប្បទានដែលមានការប្រាក់ទាបដល់ពលរដ្ឋ។
លោកបន្ថែមថា៖ «ធ្វើយ៉ាងណាឱ្យថ្លៃដើមនៃការផលិតហ្នឹងវាទាប អ៊ីចឹងកសិករគាត់អាចមានការប្រកួតប្រជែងខ្ពស់ ហើយបច្ចេកវិទ្យាហ្នឹងក៏ត្រូវមានការយកចិត្តទុកដាក់ដែរ។ យើងគួររៀនសូត្រពីប្រទេសជិតខាងយើងផងដែរ ដើម្បីឱ្យបច្ចេកវិទ្យាយើងហ្នឹងអាចដើរទាន់សម័យកាល»។
កាលពីថ្ងៃទី១៤ ខែកក្កដា ឆ្នាំ២០២០ ក្នុងពិធីសំណេះសំណាលមួយនៅមជ្ឈមណ្ឌលស្រាវជ្រាវ និងអភិវឌ្ឍន៍កសិកម្ម ក្នុងស្រុកពាមរក៍ ខេត្តព្រៃវែង លោកនាយករដ្ឋមន្ត្រី ហ៊ុន សែន បានថ្លែងថា វិបត្តិកូវីដ១៩ បានប៉ះពាល់ជាខ្លាំងដល់វិស័យទេសចរណ៍និងឧស្សាហកម្ម។ តែសម្រាប់វិស័យកសិកម្មវិញ លោកថា មិនត្រឹមតែមិនប៉ះពាល់នោះទេ ប៉ុន្តែថែមទាំងផ្ដល់ឱ្យនូវភាពខ្លាំងក្លាដល់វិស័យនេះកាន់តែខ្លាំង។
លោកបានគូសបញ្ជាក់នៅថ្ងៃនោះថា រដ្ឋាភិបាលបានផ្លាស់ប្ដូរទិសដៅមកកាន់វិស័យកសិកម្មក្នុងពេលមានវិបត្តិកូវី១៩ ដើម្បីឱ្យវិស័យនេះកាន់តែរីកលូតលាស់ខ្លាំងឡើងថែមទៀត៕