ក្រសួងធនធានទឹក និងឧតុនិយម ឱ្យដឹងថា អាកាសធាតុនៅកម្ពុជានឹងចុះត្រជាក់ក្រោម២០អង្សារ ចាប់ពីថ្ងៃស្អែក ដល់ថ្ងៃទី១៧ ខែមករា ដោយថា បណ្ដាលមកពីទ្រនុងសម្ពាធនៅភាគខាងជើងធ្លាក់ចុះ ដែលនាំមកនូវធាតុត្រជាក់ពីតំបន់ស៊ីប៊ីរី ប្រទសរុស្ស៊ី បូកជាមួយនឹងខ្យល់មូសុងឦសានខ្លាំង។
ក្នុងសេចក្តីប្រកាសព័ត៌មានបន្ថែមពីស្ថានភាពអាកាសធាតុ ចុះថ្ងៃទី៨ ខែមករា ឆ្នាំ២០២១ ក្រសួងធនធានទឹក និងឧតុនិយម ឱ្យដឹងថា តំបន់វាលទំនាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ សៀមរាប និងខេត្តកំពង់ធំ ខេត្តស្វាយរៀង ព្រៃវែង កណ្ដាល កំពង់ស្ពឺ និងខេត្តតាកែវ សីតុណ្ហភាពនឹងចុះត្រជាក់នៅរង្វង់ ១៣ ដល់ ១៥ អង្សារសេ។ មានតែរាជធានីភ្នំពេញមួយប៉ុណ្ណោះ ដែលក្រសួងបញ្ជាក់ថាមានសីតុណ្ហភាព១៦អង្សារ។
សម្រាប់តំបន់ជួរភ្នំដងរែក និងខ្ពង់រាបភាគឦសាន ដែលរួមមាន ខេត្តរតនគិរី មណ្ឌលគិរី ឧត្តរមានជ័យ ព្រះវិហារ និងខេត្តពោធិ៍សាត់ អាកាសធាតុនឹងចុះត្រជាក់ចន្លោះពី ១១ ទៅ ១៣ អង្សារសេ លាយឡំជាមួយខ្យល់ខ្លាំង ខណៈតំបន់សមុទ្រ ខេត្តកំពត ខេត្តកែប ខេត្តព្រះសីហនុ និងកោះកុង អាកាសធាតុនឹងចុះនៅក្នុងរង្វង់ ១៧ ដល់ ១៩ អង្សារសេ ជាពិសេសនៅថ្ងៃទី១២ ផ្ទៃសមុទ្រនឹងមានខ្យល់បក់ខ្លាំង រួមជាមួយរលកខ្ពស់ៗ។
ជាមួយគ្នានេះដែរ ក្រសួងក៏បានណែនាំឱ្យកងទ័ពនិងពលរដ្ឋដែលរស់នៅនិងឈរជើងនៅតំបន់ជួរភ្នំដងរែក ខ្ពង់រាបភាគឦសាន្ត និងតាមសមុទ្រ ឱ្យបង្កើនការយកចិត្តទុកដាក់ថែរក្សាសុខភាព និងបង្កើនការប្រុងប្រយ័ត្នខ្ពស់ចំពោះអាកាសធាតុចុះត្រជាក់និងខ្យល់ខ្លាំងនេះផងដែរ៕
