សមត្ថកិច្ចជំនាញ ក្នុងរយៈពេលពេញមួយឆ្នាំ២០២០ បានបង្ក្រាបបទល្មើសគ្រឿងញៀនជាង១ម៉ឺនករណី ក្នុងនោះបានចាប់ខ្លួនមនុស្សជាង២ម៉ឺននាក់ និងគ្រឿងញៀនជាង៣ពាន់គីឡូក្រាម ដែលចំនួនបទល្មើសនេះមានការកើនឡើងជាងឆ្នាំមុន។
យោងតាមរបាយការណ៍របស់នាយកដ្ឋានប្រឆាំងគ្រឿងញៀននៃក្រសួងមហាផ្ទៃ ដែលវីអូឌីទទួលបានកាលពីថ្ងៃទី០៧ ខែមករា ឆ្នាំ២០២១ ឱ្យដឹងថា ក្នុងឆ្នាំ២០២០នេះ សមត្ថកិច្ចជំនាញ បង្ក្រាបបទល្មើសគ្រឿងញៀនសរុប ១០ ៤៦១ ករណី និងរឹបអូសបានវត្ថុតាងគ្រឿងញៀនចំនួន ៣ ១៨៩ គីឡូក្រាម និងសារធាតុគីមីផ្សំចំនួន ៥ ០២៥ គីឡូក្រាម។
របាយការណ៍បន្តថា ក្នុងប្រតិបត្តិការបង្ក្រាបនោះ សមត្ថកិច្ចក៏បានចាប់ខ្លួនមនុស្សដែលពាក់ព័ន្ធគ្រឿងញៀនចំនួន ២១ ៥៦៦ នាក់ (ជនបរទេស ៣៨៩ នាក់) ក្នុងនោះ អ្នកដែលពាក់ព័ន្ធនឹងការជួញដូរ កែច្នៃ រក្សាទុក និងដាំដុះចំនួន ១២ ៧៣៩ នាក់ និងអ្នកប្រើប្រាស់ចំនួន ៨ ៨២៧ នាក់។
ក្រៅពីនោះ របាយការណ៍ថា សមត្ថកិច្ចជំនាញក៏បានរឹបអូសវត្ថុតាងពាក់ព័ន្ធនឹងបទល្មើសគ្រឿងញៀនមួយចំនួនដែរ រួមមាន រថយន្តចំនួន ១៦០ គ្រឿង, ម៉ូតូ ២ ៨៣១ គ្រឿង, ទូរសព្ទ ៨ ៦១២ គ្រឿង, ជញ្ជីង ៥៧៩ គ្រឿង, អាវុធខ្លី ៣២ ដើម, អាវុធវែង ២៦ ដើម រួមនឹងវត្ថុតាងមួយចំនួនទៀត។
តួលេខប្រចាំឆ្នាំ២០២០ ដែលផ្តល់ដោយនាយកដ្ឋានប្រឆាំងគ្រឿងញៀននេះ បានបង្ហាញពីការកើនឡើងប្រមាណ៤ដងនៃគ្រឿងញៀនដែលរឹបអូសបាន និងកើនឡើងប្រមាណ៥ភាគរយនៃចំនួនមនុស្សដែលត្រូវបានចាប់ខ្លួន បើធៀបនឹងឆ្នាំ២០១៩។
កាលពីឆ្នាំ២០១៩ សមត្ថកិច្ចជំនាញបង្ក្រាបគ្រឿងញៀន បានចំនួន ៩ ៨០៦ ករណី ឃាត់ខ្លួនមនុស្ស ២០ ៤៩០ នាក់ (ជនបរទេស ៤៤៧ នាក់) និងរឹបអូសគ្រឿងញៀនបានជាង ៧៥០ គីឡូក្រាម ដែលចំនួននេះកើនឡើងជិត ៣០% ទៅហើយបើធៀបនឹងឆ្នាំ២០១៨ នេះបើយោងតាមរបាយការណ៍អាជ្ញាធរជាតិប្រឆាំងគ្រឿងញៀនឆ្នាំ២០១៩។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធិ មានប្រសាសន៍ថា ក្នុងឆ្នាំនេះដែរ សមត្ថកិច្ចក៏បានបង្ក្រាបទីតាំងផលិតគ្រឿងញៀនចំនួន៥កន្លែង និងឃ្លាំងមួយកន្លែងក៏ត្រូវបានសមត្ថកិច្ចធ្វើការរឹបអូស ខណៈដែលឈ្មួញបានយកទីតាំងទាំងនោះដើម្បីផលិតគ្រឿងញៀន។
លោកបន្តថា៖ «មានមេខ្លោង [ជួញដូរគ្រឿងញៀន] នៅក្នុងប្រទេស ប៉ុន្តែចំពោះមេខ្លោងអន្តរជាតិ ទាល់តែមានចំណាត់ការជាមួយប្រទេសដែលមានការពាក់ព័ន្ធ»។
នាយកមជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀន លោក វ៉េត វាល់ដា បានថ្លែងថា ការកើនឡើងនៃករណីគ្រឿងញៀន ក៏បានធ្វើឱ្យមជ្ឈមណ្ឌលនេះកើនឡើងនូវចំនួនអ្នកមកបន្សាបគ្រឿងញៀនដែរ ជាពិសេសនៅត្រីមាសទី២ និងទី៣ នៃឆ្នាំ២០២០។
លោកបន្តថា មជ្ឈមណ្ឌលបច្ចុប្បន្នមានអ្នកជំងឺជាង២០០នាក់ ខណៈដែលមជ្ឈមណ្ឌលនេះផ្ទុកអ្នកជំងឺបានត្រឹមតែ២៥០ទៅ៣០០នាក់ប៉ុណ្ណោះ។
នាយកមជ្ឈមណ្ឌលរូបនេះបន្ថែមថា នៅពេលដែលយុវជនសេពគ្រឿងញៀន ចាប់ផ្ដើមចូលទៅបន្សាបគ្រឿងញៀននៅក្នុងមជ្ឈមណ្ឌលនេះដំបូង ពួកគេមានអាការបែកពពុះមាត់ មិនងងុយគេង និងតែងរករឿងមនុស្សនៅជុំវិញខ្លួន ដែលទាំងនេះជាបញ្ហាប្រឈមមួយរបស់ក្រុមការងាររបស់លោកផងដែរ។
លោក អ៊ិនសីក ស៊ីម (Inshik Sim) មន្ត្រីវិភាគគ្រឿងញៀនខុសច្បាប់នៃអង្គការសហប្រជាជាតិ បានលើកឡើងនៅក្នុងសារអេឡិចត្រូនិច (អ៊ីម៉ែល) ប្រាប់វីអូឌីថា ការកើនឡើងនូវបទល្មើសគ្រឿងញៀនេះ អាចជាភស្តុតាងបានចង្អុលបង្ហាញថា និន្នាការឆ្ពោះទៅរកការប្រើប្រាស់ថ្នាំញៀនដែលមានតម្លៃថោកនិងសម្បូរបែប បានរីករាលដាលនៅពាសពេញប្រទេសកម្ពុជា។
លោកថា៖ «ការកើនឡើងនៃការរឹបអូសនិងការចាប់ខ្លួន ត្រូវបានគេសង្កេតឃើញនៅទូទាំងប្រទេសក្នុងតំបន់អាស៊ីអាគ្នេយ៍ មានន័យថា តំបន់នេះមិនអាចទប់ទល់នឹងការកើនឡើងនៃការផលិតគ្រឿងញៀនខុសច្បាប់និងគម្រោងរបស់ឧក្រិដ្ឋជននោះទេ»។
អ្នកវិភាគរូបនេះបានបន្តទៀតថា ក្រុមឧក្រិដ្ឋជនកំពុងតែជំរុញឱ្យថ្នាំមានតម្លៃថោកដើម្បីចូលទៅក្នុងទីផ្សារ ស្របពេលដែលប្រសិទ្ធភាពនៃការទប់ស្កាត់ទុកជាមុន ហាក់មិនទាន់បានឆ្លើយតបគ្រប់គ្រាន់នៅឡើយ៕