សាលាដំបូងខេត្តកំពត នៅព្រឹកថ្ងៃពុធនេះ បានសម្រេចឱ្យស៊ើបអង្កេតឡើងវិញលើសំណុំរឿងបាក់រលំអគារកម្ពស់៧ជាន់ នៅខេត្តកែប កាលពីមួយឆ្នាំមុន។
កាលពីថ្ងៃទី៣ ខែមករា ឆ្នាំ២០២០ មានករណីបាក់រលំអគារមួយកន្លែង ស្ថិតនៅក្បែរវត្តសមាធិ ក្រុងកែប ខេត្តកែប បណ្តាលឱ្យមនុស្ស៣៦នាក់ស្លាប់ ក្នុងនោះមានកុមារ៦នាក់ និងបណ្តាលឱ្យមនុស្ស២៣នាក់ផ្សេងទៀតរងរបួសធ្ងន់និងស្រាល។
នៅព្រឹកនេះ តុលាការខេត្តកំពត បានប្រកាសសេចក្តីសម្រេចនៅចំពោះមុខមេធាវីតំណាងជនរងគ្រោះចំនួន៤រូប និងជនរងគ្រោះ៥រូប ប៉ុន្តែអវត្តមានម្ចាស់សំណង់អគារ។
នៅចំពោះមុខអ្នកចូលរួម ចៅក្រមសាលាដំបូងខេត្តកំពត លោក ម៉ែន វណ្ណៈ បានប្រកាសឱ្យមានការស៊ើបអង្កេតឡើងវិញលើសំណុំរឿងនេះ។
ចំណែកជនរងគ្រោះដែលចូលរួមស្តាប់ការសម្រេចក្តីលើសំណុំរឿងនេះ បានស្នើឱ្យតុលាការពន្លឿននីតិវិធី ដើម្បីឱ្យពួកគាត់ទទួលបាននូវយុត្តិធម៌ឆាប់ៗ៕
