ស្ត្រីម្នាក់បានប្តឹងមន្ត្រីយោធាថ្នាក់ឧត្តមសេនីយ៍មួយរូបទៅសាលាដំបូងខេត្តកំពង់ស្ពឺ ដោយចោទមន្ត្រីយោធារូបនោះថា បានប្រើហិង្សានិងគំរាមសម្លាប់ទៅលើរូបគាត់។
ក្នុងបណ្តឹងដែលដាក់ទៅសាលាដំបូងខេត្តកំពង់ស្ពឺ កាលពីថ្ងៃទី២៥ ខែមករា ឆ្នាំ២០២១ អ្នកស្រី ឌួង ហេម៉ាលីស ដែលអះអាងថាជាភាគីជនរងគ្រោះ បានប្តឹងមន្ត្រីយោធាឋានៈជាឧត្តមសេនីយ៍ទោ[ផ្កាយពីរ] និងមានតួនាទីជានាយរងទីចាត់ការអភិវឌ្ឍន៍អគ្គបញ្ជាការ នៃក្រសួងការពារជាតិ លោក សូយ ចាន់សឿន ទៅអយ្យការអមសាលាដំបូងខេត្តកំពង់ស្ពឺ ដោយចោទប្រកាន់ពីបទ «ប្រើអំពើហិង្សាដោយមានស្ថានទម្ងន់ និងបង្ខាំងមនុស្សដោយខុសច្បាប់»។
បណ្តឹងដដែលបានឱ្យដឹងទៀតថា មន្ត្រីយោធាឈ្មោះ សូយ ចាន់សឿន បានប្រើអំពើហិង្សាលើស្ត្រីរងគ្រោះ កាលពីថ្ងៃទី២២ ខែមករា ឆ្នាំ២០២១ ខណៈដែលស្ត្រីរូបនោះកំពុងជិះរថយន្តតាមផ្លូវជាមួយមន្ត្រីយោធារូបនោះ ទៅលេងផ្ទះមិត្តភក្តិរបស់គាត់នៅខេត្តកំពង់ស្ពឺ។
អ្នកស្រី ឌួង ហេម៉ាលីស អាយុ៤១ឆ្នាំ និងមានមុខរបរជាពាណិជ្ជករ បានរៀបរាប់ក្នុងបណ្តឹងទៀតថា មន្ត្រីយោធារូបនោះបានវាយទៅលើអ្នកស្រី និងបានដកកាំភ្លើងខ្លីភ្ជង់គំរាមបាញ់បំបាក់ជើងនិងបាញ់សម្លាប់ នៅតាមផ្លូវតាំងពីនៅរាជធានីភ្នំពេញ ឆ្លងកាត់ខេត្តកណ្តាល រហូតដល់ខេត្តកំពង់ស្ពឺ។
ស្ត្រីរូបនេះបន្តថា ពេលទៅដល់ខេត្តកំពង់ស្ពឺ លោក សូយ ចាន់សឿន បានបង្ខាំងអ្នកស្រីក្នុងផ្ទះកូនចៅរបស់ខ្លួនជាច្រើនម៉ោង មុនពេលមានការអន្តរាគមន៍ពីសំណាក់អាជ្ញាធរខេត្ត ដើម្បីរំដោះអ្នកស្រីចេញពីផ្ទះនោះយកទៅព្យាបាលនៅមន្ទីរពេទ្យ។
បើយោងតាមបណ្តឹងដដែលនេះ គឺជនរងគ្រោះបានទាមទារឱ្យមានការចាប់ខ្លួននិងឃុំខ្លួនមន្ត្រីយោធារូបនោះទៅតាមផ្លូវច្បាប់ ហើយទាមទារសំណងថ្លៃព្យាបាលចំនួន១លានដុល្លារ និងប្រាក់សំណងជំងឺចិត្ត១លានដុល្លារផងដែរ។
អ្នកស្រី ឌួង ហេម៉ាលីស មានប្រសាសន៍ប្រាប់វីអូឌីនៅពុធនេះថា អ្នកស្រីបានស្គាល់និងរាប់អានគ្នាជាមួយលោក សូយ ចាន់សឿន ជាច្រើនឆ្នាំហើយ តាមរយៈការរកស៊ីជាមួយគ្នា ដោយអ្នកស្រីជាអ្នកផ្តត់ផ្គង់សម្ភារសំណង់ផ្សេងៗទៅឱ្យមន្ត្រីយោធារូបនោះ។
ស្ត្រីរងគ្រោះបន្តថា ដើមចមដែលបណ្តាលឱ្យកើតអំពើហិង្សានោះ ដោយសារអ្នកទាំងពីរនិយាយទាស់ពាក្យសម្តីបន្តិចបន្តួច ពាក់ព័ន្ធការផ្ដល់យោបល់ផ្លូវច្បាប់ជុំវិញករណីប្ដឹងផ្ដល់គ្នាលើរឿងដីធ្លីមួយកន្លែង។
អ្នកស្រីអះអាងថា លោក សូយ ចាន់សឿន បានប្រើអំពើហិង្សាលើអ្នកស្រីចំនួន៣ដង ខណៈអ្នកស្រីកំពុងជិះឡានជាមួយគ្នាទៅខេត្តកំពង់ស្ពឺ បណ្តាលឱ្យអ្នកស្រីរងរបួសធ្ងន់ត្រង់ភ្នែកទាំងសងខាង ដើមទ្រូង កញ្ចឹងក និងក្រោមចង្កា ជាដើម។
អ្នកស្រីបន្ថែមថា៖ «គាត់ [លោក សូយ ចាន់សឿន] វាយភ្នែកខ្ញុំទាំងសងខាង គាត់វាយយកៗតែម្តង។ ឥលូវភ្នែកខ្ញុំចាប់ដើមស្រវាំងហើយ ពេទ្យថាបើខ្ញុំទំនេរ ឱ្យខ្ញុំទៅពិនិត្យ ប៉ុន្តែខ្ញុំអត់ហ៊ានទៅទេ ពីព្រោះឥលូវខ្ញុំមិនដឹងថាគាត់នៅឯណាទេឥលូវនេះ។ ខ្ញុំបារម្ភមែនទែន ព្រោះគាត់មានអាវុធ ខ្លាចគាត់មោបាំងទៅ គាត់មកធ្វើបាបយើង»។
មន្ត្រីយោធាដែលរងការចោទប្រកាន់ លោក សូយ ចាន់សឿន មានប្រសាសន៍ថា លោកពិតជាបានធ្វើដំណើរទៅលេងផ្ទះមិត្តភក្តិ និងឆ្លៀតពេលមើលដីធ្លីនៅកំពង់ស្ពឺ ជាមួយអ្នកស្រី ឌួង ហេម៉ាលីស ពិតមែន ប៉ុន្តលោកបានច្រានចោលចំពោះការចោទប្រកាន់ដែលថា លោកប្រើហិង្សានិងបង្ខាំងមនុស្សខុសច្បាប់។
លោកអះអាងថា អ្នកស្រី ឌួង ហេម៉ាលីស រងរបួសដោយសារអ្នកស្រីយកក្បាលទៅបោកនឹងជញ្ជាំងឡាន ហើយព្យាយាមហក់ចេញពីក្នុងឡានទាំងកំពុងបើកលឿន ខណៈលោកព្យាយាមឃាត់មិនឱ្យហក់ចេញ។
លោក សូយ ចាន់សឿន បានចោទវិញថា ករណីអ្នកស្រី ឌួង ហេម៉ាលីស ប្តឹងទៅតុលាការនេះ គឺមានចេតនាចង់បានលុយរបស់លោក និងចង់បំផ្លាញកិត្តិយសរបស់លោកតែប៉ុណ្ណោះ។
លោកបន្ថែមថា៖ «ករណីនាងប្តឹង ខ្ញុំមិនខ្លាច […] ខ្ញុំមានជម្លោះជាមួយនាង ដោយសារនាងបោកឡានឪពុកធម៌របស់ខ្ញុំ ខ្ញុំបានសួរនាំនាងថា ថ្ងៃណាមានលុយសងឪពុកធម៌ខ្ញុំ។ ដល់វាបែកការដោយសារខ្ញុំសួរនាំរឿងហ្នឹង វាខឹងច្រឡោតតោតតូង។ តើខ្ញុំយកនាងហ្នឹងទៅធ្វើទារុណកម្មដើម្បីអី ខ្ញុំ១០០គីឡូ បើខ្ញុំវាយនាងមែន ប្រហែលបាក់ឆ្អឹង បែកមុខខ្ទេចខ្ទីអស់ហើយ។ ការពិតវាយកក្បាលទៅបោកនឹងកញ្ចក់ឡាន ហើយវារកលោតពីលើឡាន ហើយប្រតាយប្រតប់ចាប់នាងឱ្យអង្គុយស្ងៀមទេ។ ខ្ញុំមិនបានវាយនាងទេ»។
អធិការរងស្រុកភ្នំស្រួច លោក ម៉ែន សុខេន មានប្រសាសន៍ថា កាលពីថ្ងៃទី២២ ខែមករា ឆ្នាំ២០២១ ស្ត្រីជនរងគ្រោះ បានផ្ញើសារតាមប្រព័ន្ធតេឡេក្រាមទៅលោក ដោយប្រាប់ថា មានករណីបង្ខាំងនិងធ្វើទារុណកម្មមនុស្សនៅផ្ទះពលរដ្ឋម្នាក់ នៅភូមិចំការចេក ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
លោកបន្តថា ក្រោយទទួលបានដំណឹងនេះភា្លម លោកបានបញ្ជាកម្លាំងចុះទៅដល់កន្លែងកើតហេតុ និងបានសួរនាំជនរងគ្រោះ ដោយជនរងគ្រោះបានរៀបរាប់ថា នាងត្រូវបានលោក សូយ ចាន់សឿន ប្រើហិង្សាតាំងពីក្រុងតាខ្មៅរហូតដល់កំពង់ស្ពឺ។ លោកបន្ថែមថា បើតាមការសាកសួរ និងពិនិត្យទៅលើស្នាមរបួស គឺស្ត្រីរងគ្រោះពិតជារងអំពើហិង្សាពិតមែន ប៉ុន្តែពុំមានការបង្ខាំងនោះទេ។
លោកថា៖ «តាមការសាកសួរ គាត់ប្រាប់ថា គាត់ត្រូវបានជនសង្ស័យវាយតាំងពីខេត្តកណ្តាល រហូតមកដល់ផ្ទះពួកម៉ាកគាត់នៅកំពង់ស្ពឺ ដែលគាត់និងជនសង្ស័យធ្លាប់មកលេងជាមួយគ្នាពេលកន្លងមក។ ហើយពេលមកដល់ គាត់បានសុំបន្ទប់ម្ចាស់ផ្ទះដើម្បីសម្រាក ដើម្បីគេចផុតពីជនសង្ស័យ ហើយពេលកម្លាំងទៅដល់ បានហៅគាត់ឱ្យចេញមក។ ប៉ុន្តែគាត់មិនព្រមចេញពីបន្ទប់ទេ ដោយខ្លាចដៃគូគាត់ដែលមានកាំភ្លើង ខ្លាចគេគំរាមលើគាត់ទៀត ក៏គាត់មិនហ៊ានចេញពីក្នុងបន្ទប់រហូតអ៊ីចឹងទៅ។ ហើយគាត់បានឆាតទៅតាមតេឡេក្រាមទៅបងប្អូនគាត់ថា មានករណីបង្ខាំង ប៉ុន្តែករណីបង្ខាំងដូចជាមិនត្រូវទេ ប៉ុន្តែករណីហិង្សាបានកើតឡើងពិតប្រាកដមែន»។
វីអូឌី មិនអាចទាក់ទងសុំការឆ្លើយតបពីប្រធានលេខាធិការដ្ឋានរដ្ឋបាលសាលាដំបូងខេត្តកំពង់ស្ពឺ លោក ស៊ន វីរៈ និងអ្នកនាំពាក្យក្រសួងការពារជាតិ លោក ឈុំ សុជាតិ និងលោក អ៊ុន សុវណ្ណ បានទេ ដោយទូរសព្ទចូលច្រើនដង គ្មានអ្នកទទួល។
នាយករងអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា មួយរយៈចុងក្រោយនេះ លោកសង្កេតឃើញមានអំពើហិង្សាដែលបង្កដោយបុគ្គលជាកម្លាំងប្រដាប់អាវុធនោះ បានកើតឡើងជាច្រើនករណី ហើយជនបង្កតែងតែឆ្លើយយករួចខ្លួនដើម្បីគេចពីការទទួលខុសត្រូវ។
មន្ត្រីសិទ្ធិមនុស្សរូបនេះ ស្នើឱ្យមានការស៊ើបអង្កេតឱ្យបានច្បាស់លាស់ និងត្រូវចាប់ជនបង្កយកទៅផ្តន្ទាទោសទៅតាមផ្លូវច្បាប់ ដើម្បីកុំប៉ះពាល់ដល់កងកម្លាំងដែលល្អៗផ្សេងទៀត។
លោកបន្ថែមថា៖ «ការប្រព្រឹត្តនេះជាការទទួលខុសត្រូវរបស់បុគ្គលមែន ប៉ុន្តែវាជះឥទ្ធិពលធ្វើឱ្យប៉ះពាល់ដល់កិត្តិយសកេរ្តិ៍ឈ្មោះរបស់កងកម្លាំង។ អ៊ីចឹងទី១ ត្រូវអប់រំ ផ្សព្វផ្សាយបន្ថែម ទី២ រឹតបន្ដឹងការប្រើប្រាស់អាវុធ ទោះបីជាមានសិទ្ធិកាន់កាប់ក៏ដោយ ក៏មិនត្រូវយកអាវុធហ្នឹងទៅប្រើប្រាស់ខុសច្បាប់ដែរ។ មួយទៀត បើបុគ្គលណាប្រព្រឹត្តខុស មិនត្រូវអនុគ្រោះឬយោគយល់ទេ ត្រូវតែអនុវត្តទៅតាមផ្លូវច្បាប់ គឺត្រូវចាប់បញ្ជូនទៅតុលាការដើម្បីធ្វើការអនុវត្តតាមផ្លូវច្បាប់»៕
