កំពុងនៅផ្ទះតែម្នាក់ឯង លោក រ៉ាត់ រត្នមុនី បច្ចុប្បន្ននេះ ព្យាយាមបន្លប់ភាពអផ្សុករបស់គាត់ ដោយតាមដានព័ត៌មាន អានសៀវភៅ និងរំឭកពីការប្រើប្រាស់កុំព្យូទ័រ។ មើលទៅគាត់ហាក់ដូចជានឹកវត្ថុទាំងនេះណាស់ ក្រោយពីគាត់ត្រូវបានជាប់ពន្ធនាគារអស់រយៈពេល២ឆ្នាំ ដោយគ្រាន់តែការងារបកប្រែឱ្យទូរទស្សន៍រុស្ស៊ី RT ក្នុងការផលិតវីដេអូឯកសារមួយស្តីពីការជួញដូរមនុស្សនៅកម្ពុជា។
លោកថា៖ «ឥលូវកំពុងរៀនប្រើឡើងវិញ។ បន្ទាប់ចេញមក ចង់ភ្លេចអស់»។
លោក រ៉ាត់ រត្នមុនី អាយុ៤៩ឆ្នាំ ពេលនេះមានសេរីភាពមែន ក្រោយពីត្រូវបានដោះលែងពីពន្ធនាគារកាលពីថ្ងៃទី១១ ខែធ្នូ ឆ្នាំ២០២០ កន្លងទៅ។ ប៉ុន្តែសុបិនអាក្រក់នៅតែតាមញាំញីរូបគាត់ ដោយមិនអស់ចិត្តថា ហេតុអ្វីបានជាគាត់ត្រូវជាប់គុកដោយគ្រាន់តែធ្វើការបកប្រែឱ្យអង្គភាពសារព័ត៌មានបរទេស។
ទណ្ឌកម្មទៅលើរូបលោក ក្រោមបទចោទរបស់តុលាការថា គាត់ញុះញង់ឱ្យមានការរើសអើង ត្រូវបានរងការរិះគន់ពីសំណាក់សកម្មជនសិទ្ធិមនុស្សក្នុងនិងក្រៅប្រទេស ថាជាការគាបសង្កត់ទៅលើសេរីភាពក្នុងការនិយាយស្តី។
លោក រត្នមុនី ក៏បានលើកឡើងផងដែរថា៖ «ជារឿងដែលអយុត្តិធម៌ ហើយជារឿងដែលយើងស្មានមិនដល់ មិនអាចទទួលយកបានដល់អ៊ីចឹង! ព្រោះខ្ញុំប្រាកដថា ធ្វើអីតាមច្បាប់តាមទម្លាប់ទៅណា ខ្ញុំព្យាយាមណាស់។ ដល់អ៊ីចឹង! នៅពេលដែលមានរឿងទៅដល់ជាចាប់ដាក់គុក យើងទទួលយកមិនបាន វាពិបាកណាស់!»
កាលពីខែតុលា ឆ្នាំ២០១៩ អង្គការលើកលែងទោសអន្តរជាតិ Amnesty International បានចេញសេចក្តីប្រកាសមួយដោយបានចាត់ទុកការការចាប់ខ្លួននិងចោទប្រកាន់លោក រត្នមុនី ជាការបំភិតបំភ័យរបស់រដ្ឋាភិបាលទៅលើអ្នកដែលបើកកកាយការរំលោភសិទ្ធិមនុស្សនៅកម្ពុជា។
Amnesty International លើកឡើងថា៖ «វាជាក់ស្ដែងណាស់ដែលថា អាជ្ញាធរចង់យកករណីលោក រត្នមុនី ធ្វើជាឧទាហរណ៍សម្រាប់បំភិតបំភ័យទៅលើអ្នកផ្សេងទៀតដែលបានបើកបង្ហាញការរំលោភសិទ្ធិមនុស្សនៅកម្ពុជា»។
រឿង«ម្ដាយខ្ញុំលក់ខ្ញុំ» ត្រូវបានផលិតឡើងដោយស្ថានីយទូរទស្សន៍រុស្ស៊ី Russia Today និងបានចេញផ្សាយនៅលើទូរទស្សន៍ និង YouTube របស់ RT នៅថ្ងៃទី១៥ ខែតុលា ឆ្នាំ២០១៨។ រឿងនេះជាភាពយន្តឯកសារមួយដែលនិយាយពីក្មេងស្រីខ្មែរម្នាក់ត្រូវបានម្ដាយរបស់ខ្លួនលក់ទៅឱ្យភ្ញៀវដើម្បីបម្រើផ្លូវភេទ យកលុយមកផ្គត់ផ្គង់គ្រួសារដែលកំពុងប្រឈមនឹងបញ្ហាជីវភាព បច្ចុប្បន្ន វីដេអូនេះទទួលបានការទស្សនាជិត២លានដងនៅលើ YouTube Channel របស់ RT។
មួយវិញទៀត ការចាប់ខ្លួនលោក រត្នមុនី ក៏បានបង្កើននូវចំហាយរងារភ័យខ្លាចនៅក្នុងចំណោមសហគមន៍អ្នកសារព័ត៌មានកម្ពុជាផងដែរ។
នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា ហៅកាត់ថា Camboja លោក ណុប វី ចាត់ទុកការចោទប្រកាន់និងផ្តន្ទាទោសលើលោក រត្នមុនី ដោយតុលាការនេះ គឺជារឿងអយុត្តិធម៌មួយ។ លោកបន្ថែមថា ករណីនេះនឹងធ្វើឱ្យប៉ះពាល់ដល់អ្នកសារព័ត៌មានផ្សេងទៀតក្នុងការអនុវត្តវិជ្ជាជីវៈរបស់ខ្លួន។
លោក ណុប វី មានប្រសាសន៍ថា៖ «ការកាត់ទោសគាត់ [លោក រ៉ាត់ រត្នមុនី] វាធ្វើឱ្យមានភាពភ័យខ្លាចសម្រាប់អ្នកដែលគាត់ហ៊ានធ្វើសេចក្តីរាយការណ៍រឿងសង្គមផ្សេងៗហ្នឹង។ គឺគាត់នឹងមិនហ៊ានធ្វើសេចក្តីរាយការណ៍រឿងទាំងអស់ហ្នឹងទេ ព្រោះដូចករណីរបស់លោក រ៉ាត់ រត្នមុនី អ៊ីចឹង។ យើងដឹងហើយថា នៅពេលដែលមានការចោទប្រកាន់ គាត់ត្រូវបានគេយកទៅដាក់នៅពន្ធនាគារ ហើយគាត់ត្រូវបានគេសម្រេចឱ្យមានទោសដោយគាត់គ្រាន់តែជា Fixer [ជំនួយការ] របស់អ្នកកាសែតបរទេស។ ទីពីរ គាត់គ្រាន់តែដើរតួនាទីក្នុងការរាយការណ៍ពីព័ត៌មានទាំងអស់ហ្នឹង»។
សម្រាប់លោក ណុប វី ការចាប់អ្នកកាសែតឃុំខ្លួននិងចោទប្រកាន់តាមផ្លូវតុលាការ គឺមិនមែនជាជម្រើសល្អទេដល់សេរីភាពសារព័ត៌មាន។
លោកបន្ថែមថា៖ «ជារួម យើង [រដ្ឋាភិបាល] ពិនិត្យមើលព័ត៌មាន ពិនិត្យមើលរឿងទាំងអស់ហ្នឹង ចាត់ឱ្យមានការស៊ើបអង្កេតឱ្យបានស៊ីជម្រៅថែមទៀត មើលថា តើករណីនៃការសរសេរហ្នឹងវាត្រឹមត្រូវឬមិនត្រឹមត្រូវ? ហើយបើត្រឹមត្រូវ រដ្ឋាភិបាលត្រូវចាត់វិធានការដោះស្រាយហើយ។ ហើយបើក្នុងករណីអ្នកកាសែតសរសេរមិនត្រឹមត្រូវនៅត្រង់កម្រិតណា ឱ្យគ្នាធ្វើការកែតម្រូវទៅ»។
បើទោះបីលោក រត្នមុនី មានសេរីភាពវិញមែន តែគាត់នៅតែមានឈ្មោះប្រឡាក់ថា ធ្លាប់ជាប់ពន្ធនាគារ។ បច្ចុប្បន្ន លោកនិងមេធាវីរបស់លោកកំពុងព្យាយាមសម្អាតឈ្មោះរបស់គាត់ តាមរយៈការដាក់ពាក្យប្ដឹងទាស់ទៅនឹងសេចក្តីសម្រេចនិងការចោទប្រកាន់របស់តុលាការសាលាដំបូង។ បច្ចុប្បន្ន ពាក្យប្តឹងទាស់នេះកំពុងស្ថិតនៅក្នុងដៃតុលាការឧទ្ធរណ៍រាជធានីភ្នំពេញនៅឡើយ។
មេធាវីការពារក្ដីឱ្យលោក រត្នមុនី គឺលោកមេធាវី សំ ទិត្យសីហា មានប្រសាសន៍ថា រហូតមកដល់ពេលនេះគឺមានរយៈពេលប្រមាណ៤ខែហើយដែលតុលាការកំពូលបញ្ជូនសំណុំរឿងប្ដឹងទាស់របស់កូនក្ដីលោកទៅសាលាឧទ្ធរណ៍ដើម្បីដោះស្រាយ។
លោកមានប្រសាសន៍ថា៖ «បន្តទៀតគឺយើងមានតែដាក់ស្នើសុំឱ្យសាលាឧទ្ធរណ៍គាត់ពន្លឿននីតិវិធីធ្វើការរឿងហ្នឹង។ យើងអត់អាចធ្វើអីលើសពីហ្នឹងទេ! ព្រោះជាការបញ្ជូនពីតុលាការកំពូលមកវិញ។ ចំពោះដាក់ពេលណា ខ្ញុំអត់ទាន់ច្បាស់ទេ ដោយសារតែលោក រត្នមុនី ពេលគាត់ចេញ គាត់បានទាក់ទងតាមទូរសព្ទជាមួយខ្ញុំ ក៏ប៉ុន្ដែគាត់ទាក់ទងសុំអត្តសញ្ញាណបណ្ណ ហើយនិងប៉ាស្ព័រ [លិខិតឆ្លងដែន] គាត់។ តែត្រង់ថា គាត់ចង់ធ្វើអីបន្តទៀតយើងអត់ទាន់បានជួបគាត់។ អ៊ីចឹងយើងត្រូវតែគោរពតាមការសម្រេចចិត្តទៅលើអ្វីដែលគាត់ចង់ធ្វើទៅទៀតឬអត់ ព្រោះយើងត្រូវការជជែកជាមួយគាត់ដែរ ព្រោះទាក់ទងនឹងផលប្រយោជន៍របស់គាត់អ៊ីចឹងណា!»
VOD មិនអាចទាក់ទងសាលាឧទ្ធរណ៍រាជធានីភ្នំពេញ ដើម្បីបញ្ជាក់បន្ថែមបាននោះទេ។
លោក រត្នមុនី និយាយថា ពេលនេះជីវិតរបស់លោកហាក់ដូចជាត្រូវចាប់ផ្ដើមសារជាថ្មីក្នុងសភាពកណ្តោចកណ្តែងមួយ។ ការងារក៏គ្មាន ហើយប្រពន្ធកូនបានភៀសខ្លួនទៅប្រទេសថៃ ហើយលោកមិនដឹងថា ពេលណាទើបលោកអាចជួបជុំគ្រួសារវិញ ក្នុងសភាពការណ៍ដែលមានការរឹតត្បិតក្នុងការធ្វើដំណើរដោយសារតែបញ្ហាកូវីដ១៩ផង។
ភរិយាលោក រ៉ាត់ រត្នមុនី គឺអ្នកស្រី ឡុង គឹមហ៊ាង បានសម្រេចភៀសខ្លួនជាមួយកូនប្រុសទៅប្រទេសថៃ កាលពីខែឧសភា ឆ្នាំ២០១៩ ដោយបារម្ភពីសុវត្ថិភាពផ្ទាល់ខ្លួន បន្ទាប់ពីមានការឃ្លាំមើលសកម្មភាពនិងការរំខានជាបន្តបន្ទាប់ក្នុងពេលដែលអ្នកស្រីចេញមុខតវ៉ាមុខស្ថានទូតរុស្ស៊ីជារៀងរាល់សប្ដាហ៍ ដើម្បីស្នើសុំអន្តរាគមន៍ឱ្យមានការដោះលែងស្វាមីរបស់អ្នកស្រី។
អង្គការសហប្រជាជាតិទទួលបន្ទុកជនភៀសខ្លួនប្រចាំនៅប្រទេសថៃ (UNHCR Thailand) បានផ្ដល់ឋានៈជាជនភៀសខ្លួនដល់អ្នកស្រី ឡុង គឹមហ៊ាង និងកូនប្រុស នៅខែកញ្ញា ឆ្នាំ២០១៩។
លោក រត្នមុនី មានប្រសាសន៍ថា៖ «នឹកខ្លាំងមែនទែន ព្រោះពួកយើងអត់ធ្លាប់បែកគ្នាទេ។ ហើយខ្ញុំមានកូនតូច ដល់អ៊ីចឹងខ្ញុំស្រមៃពេលដែលគេកើតមកនៅអាយុជាង១ឆ្នាំហ្នឹង គឺនៅជាមួយខ្ញុំៗអ្នកមើល។ ឥលូវពេលដែលនឹក ទាញរូបថតកូនប្រពន្ធមើល។ ពេលនៅឯណោះ[ពន្ធនាគារ] ក៏ខ្ញុំមើលដែរ ដេកដាក់នៅជញ្ជាំងមើលអ៊ីចឹងទៅ»៕