អភិបាលខណ្ឌជ្រោយចង្វារអះអាងថា ក្នុងពេលបច្ចុប្បន្ននេះបើចង់ឱ្យបរិស្ថានស្អាតទាល់តែមានច្បាប់ចាប់អ្នកចោលសំរាមគ្មានសណ្តាប់ធ្នាប់ដាក់ពន្ធនាគារ ព្រោះលោកថា អាជ្ញាធរប្រឹងប្រែងអប់រំយ៉ាងណាក៏មិនមានការចូលរួមពីប្រជាជនដែរ។
ការលើកឡើងរបស់លោក ឃ្លាំង ហួត អភិបាលខណ្ឌជ្រោយចង្វារបែបនេះធ្វើឡើងពេលឆ្លើយសំនួររបស់អ្នកសារព័ត៌មានវីអូឌី ដែលសាកសួរជុំវិញករណីប្រជាជនចោលសំរាមនៅតាមដងផ្លូវជាតិលេខ៦ដែលស្ថិតក្នុងទឹកដីខណ្ឌជ្រោយចង្វាររាជធានីភ្នំពេញ។
បណ្តោយផ្លូវជាតិលេខ៦ចេញពីស្ពានជ្រោយចង្វារឆ្ពោះទៅស្ពានព្រែកតាមាក់គឺនៅក្នុងសង្កាត់ព្រែកលៀប និងសង្កាត់បាក់ខែង មានការចោលសំរាមជាហូហែសងខាងផ្លូវនៅតាមដីទំនេរដែលមិនមានផ្ទះ។ សំរាមកន្លែងខ្លះតិច កន្លែងខ្លះច្រើនក្លាយជាគំនរហើយបានជះក្លិនស្អុយដល់អ្នកធ្វើដំណើរផងដែរ។
លោក ឃ្លាំង ហួត មានប្រសាសន៍ថា ទោះអាជ្ញាធរមានវិធានការបែបណាក៏មិនអាចដោះស្រាយបញ្ហាសំរាមទាំងនេះបានដែរ។
លោក ឃ្លាំង ហួត៖«ស្រុកខ្មែរយើងសម្រាប់ច្បាប់បើថា ចង់ឱ្យសំរាមស្អាតទាល់តែចាប់ដាក់គុក ។ព្រោះការធ្វើណឹងទាល់តែមានការចូលរួមពីប្រជាជនបើប្រជាជនមិនចូលរួមទេ សំរាមវានៅតែមានចឹង។ ប៉ុន្តែយ៉ាងណាមិញ យើងមិនមែនទុកសំរាមលំអទីក្រុង សម្រាប់ការរិះគន់ ការពេបជ្រាយទេ»។
លោក ឃ្លាំង ហួត ជំរុញឱ្យសារព័ត៌មានជួយផ្សព្វផ្សាយអប់រំឱ្យពលរដ្ឋយល់ដឹងពីបញ្ហាសំរាមនេះ។
លោក ឃ្លាំង ហួត៖«វិទ្យុណឹងគប្បីធ្វើការអប់រំឱ្យច្រើនជាជាងធ្វើការស្តីបន្ទោសអាជ្ញាធរ។ រាល់ថ្ងៃណឹងខ្ញុំមើលឃើញថា ពួកយើងទាំងអស់គ្នាខ្វះការអប់រំ បើប្រៀបធៀបជាមួយគេទាំងវៀតណាម ទាំងថៃ គេធ្វើស្ពតសម្រាប់អប់រំដើម្បីឱ្យមានការភ្ញាក់រឭក ហើយយើងនេះមិនសូវទេ ចាំតែឃើញចាប់កំហុសវ៉ៃផូងតែម្តង»។
ចាប់ពីចំណុចស្ពានជ្រោយចង្វារ ទៅដល់ស្ពានព្រែកតាមាក់ ក្រៅពីសង្កាត់ចំនួន២នៅក្នុងខណ្ឌជ្រោយចង្វារ ក៏មានឃុំព្រែកអញ្ជាញស្ថិតនៅក្នុងស្រុកមុខកំពូលខេត្តកណ្តាលដែរ ដែលមានចោលសំរាមតាមបណ្តោយផ្លូវជាតិលេខ៦នេះ។ ស្ថានភាពនៃការចោលសំរាមនៅឃុំព្រែកអញ្ជ្រាញក៏ប្រហាក់ប្រហែលនៅក្នុងខណ្ឌជ្រោយចង្វារដែរគឺមានដាក់នៅរាយប៉ាយ និង គរដោយដុំ។
ប្រធានមន្ទីរបរិស្ថានខេត្តកណ្តាលលោក អ៊ូម ផាត់ ថ្លែងថា ខាងមន្ទីរតែងតែផ្សព្វផ្សាយអប់រំជាប្រចាំពីផលប៉ះពាល់នៃសំរាម។
លោក អ៊ូម ផាត់ បញ្ជាក់ថា ការចាត់ចែងរៀបចំសំរាមជាសមត្ថកិច្ចទទួលខុសត្រូវផ្ទាល់របស់អាជ្ញាធរឃុំ។
លោក អ៊ូម ផាត់៖«តាមអនុក្រឹត្យប១៣ ស្តីពីទីលានចាក់សំរាមឬកន្លែងទុកដាក់សំរាមទីប្រជុំជនយើងមានភាស៊ីផ្សារ ឬ អាជ្ញាធរឃុំហ្នឹង ជាអ្នករៀបចំទីតាំងឱ្យបោះចោល»។
លោក អ៊ូម ផាត់ បញ្ជាក់ថា ចំពោះអ្នកចោលសំរាមតាមទីសាធារណៈមិនបានត្រឹមត្រូវក៏ប្រឈមការផាកពិន័យផងដែរ។
លោក អ៊ូម ផាត់៖«នៅក្នុងអនុក្រឹត្យមានផាកពិន័យពួកគាត់ដែរតើស ផាកពី២ម៉ឺនទៅ៤០ម៉ឺនឯណោះ អាណឹងបើគាត់បោះចោលយើងអប់រំម្តងទៅ២ដងហើយគាត់មិនបានស្តាប់ចឹង»។
អ្នកលក់ពោតស្ងោរម្នាក់នៅសង្កាត់បាក់ខែងអ្នកស្រី លក្ខណ៍ ថ្លែងថា គាត់លក់មិនដាច់ដូច្នេះមិនចង់អស់លុយបង់ថ្លៃសំរាមទើបយកទៅរកកន្លែងចោលដោយខ្លួនឯង។
អ្នកស្រីលក្ខណ៍៖« ខ្ញុំលក់អត់សូវដាច់ អត់សូវមានសំរាមផង។ ចឹង២ទៅ៣ថ្ងៃយកទៅបោះចោលខ្លួនឯង»។
របាយការណ៍របស់ក្រសួងបរិស្ថានបានបង្ហាញថា ប្រទេសកម្ពុជាបានផលិតសំរាមជាង១ម៉ឺនតោនក្នុងមួយថ្ងៃ ហើយក្នុងរាជធានីភ្នំពេញមានសំរាមជិត៣ពាន់តោន ដោយការប្រើប្រាស់ថង់ប្លាស្ទិកប្រមាណជាង១០លានថង់ក្នុងមួយថ្ងៃ។
របាយការណ៍ដដែលបញ្ជាក់ថា បរិមាណសំរាមនៅទូទាំងប្រទេសកម្ពុជាមានប្រមាណជិត៤លានតោនក្នុងមួយឆ្នាំ៕
