ក្រសួងសុខាភិបាល បានរកឃើញជនបរទេស៣នាក់ដែលចូលមកកម្ពុជានៅដើមខែកុម្ភៈនេះ វិជ្ជមានវីរុសកូវីដ១៩ បំប្លែងខ្លួនថ្មី។
សេចក្តីប្រកាសព័ត៌មានរបស់ក្រសួងសុខាភិបាលដែលចេញនៅថ្ងៃនេះ ឱ្យដឹងថា ករណីវិជ្ជមានកូវីដ១៩បំប្លែងខ្លួនថ្មី កើតមានលើបុរសជនជាតិឥណ្ឌា វ័យ២៨ឆ្នាំ និងស្រ្តីជនជាតិឥណ្ឌា វ័យ២៣ឆ្នាំ ដែលពួកគេទាំង២នាក់បានធ្វើដំណើរមកពីប្រទេសឥណ្ឌា កាត់តាមសិង្ហបុរី ហើយមកដល់កម្ពុជាកាលពីថ្ងៃទី៣ ខែកុម្ភៈ ។
ករណីមួយទៀត ក្រសួងថា កើតឡើងលើស្រ្តីជនជាតិចិន វ័យ២៦ឆ្នាំ ដែលធ្វើដំណើរមកពីប្រទេសចិន កាត់តាមកូរ៉េខាងត្បូង និងបានមកដល់កម្ពុជានៅថ្ងៃទី៧ ខែកុម្ភៈ។
ក្រសួងសុខាភិបាលឱ្យដឹងបន្ថែមថា ពួកគេទាំង៣នាក់ស្នាក់នៅរាជធានីភ្នំពេញ ហើយបច្ចុប្បន្ន កំពុងសម្រាកព្យាបាលនៅមជ្ឈមណ្ឌលជាតិកំចាត់រោគរបេង និងហង់សិន រាជធានីភ្នំពេញ។
គិតត្រឹមថ្ងៃនេះ អ្នកមានជំងឺកូវីដ១៩ ដែលត្រូវបានរកឃើញនៅកម្ពុជា មានចំនួន៤៨២នាក់ គិតទាំងជនបរទេស៣នាក់ដែលទើបរកឃើញថាមានវីរុសកូវីដ១៩បំប្លែងខ្លួនថ្មីនេះ ហើយក្នុងនោះ ព្យាបាលជាសះស្បើយចំនួន៤៦៩នាក់៕