ក្រសួងសុខាភិបាល នៅថ្ងៃនេះ រកឃើញអ្នកឆ្លងកូវីដ១៩ថ្មីដែលភាគច្រើនជាជនជាតិចិន ចំនួន៦៥នាក់ ក្នុងនោះអ្នកឆ្លង ៥៨នាក់ ពាក់ព័ន្ធនឹងការឆ្លងព្រឹត្តិការណ៍២០កុម្ភៈ ខណៈ ៧នាក់ទៀតជាអ្នកដំណើរមកពីក្រៅប្រទេស និងអ្នកដែលធ្វើតេស្តសុខភាពដើម្បីសុំវិញ្ញាបនបត្របញ្ជាក់សុខភាព។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី២៥ ខែកុម្ភៈ ឆ្នាំ២០២១នេះ ឱ្យដឹងថា អ្នកឆ្លងជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ ទាំង៥៨នាក់ នៅរាជធានីភ្នំពេញ ក្នុងនោះ មានជនជាតិចិនចំនួន៤១នាក់ វៀតណាម៩នាក់ ខ្មែរ៥នាក់ កូរ៉េម្នាក់ សិង្ហបុរីម្នាក់ និងជប៉ុនម្នាក់ ។
ចំណែកអ្នកឆ្លង ៧នាក់ទៀត រួមមាន ជនជាតិខ្មែរម្នាក់ដែលជាកងទ័ពមួកខៀវ មកពីប្រទេសអាហ្រិ្វក មកដល់កម្ពុជា នៅថ្ងៃទី២១ ខែកុម្ភៈ ឆ្នាំ២០២១ និងជនជាតិចិន ៦នាក់ នៅខេត្តព្រះសីហនុ ត្រូវបានរកឃើញថាវិជ្ជមានវីរុសកូវីដ១៩ នៅថ្ងៃទី២៣ ខែកុម្ភៈ នៅពេលដែលពួកគេស្នើសុំវិញ្ញាបនបត្របញ្ជាក់សុខភាព ដើម្បីធ្វើដំណើរទៅប្រទេសចិនវិញ។
ក្រសួងបញ្ជាក់ថា បច្ចុប្បន្ន អ្នកជំងឺចំនួន៥៨នាក់ត្រូវបានដាក់ឱ្យសម្រាកព្យាបាលនៅមណ្ឌលចត្តាឡីស័ករាជធានីភ្នំពេញ និង ៧នាក់ទៀតត្រូវបានដាក់ឱ្យសម្រាកព្យាបាលនៅមន្ទីរពេទ្យបង្អែកខេត្តព្រះសីហនុ និងសាលារក្សាសន្តិភាពពហុសាស្ត្រកំពង់ស្ពឺ ចំនួន១នាក់។
ក្រសួងបន្ថែមថា កាលពីថ្ងៃម្សិលមិញ ក៏មានអ្នកជំងឺកូវីដ១៩ម្នាក់បានជាសះស្បើយផងដែរ ដែលជាស្ត្រីខ្មែរធ្វើដំណើរមកពីសហរដ្ឋអាមេរិក។
គិតត្រឹមព្រឹកថ្ងៃទី២៥ ខែកុម្ភៈ ឆ្នាំ២០២១នេះ កម្ពុជារកឃើញអ្នកឆ្លងកូវីដ១៩ សរុបចំនួន៦៩៧នាក់ ក្នុងនោះ អ្នកជាសះស្បើយចំនួន៤៧៧នាក់ និងអ្នកកំពុងសម្រាកព្យាបាលនៅមន្ទីរពេទ្យមានចំនួន២១៧នាក់។ ក្នុងចំណោមអ្នកឆ្លងចំនួន៦៩៧នាក់ មានអ្នកឆ្លងក្នុងព្រឹត្តិការណ៍សហគមន៍២០កុម្ភៈ មានចំនួន១៩៤នាក់៕
