រដ្ឋាភិបាលជប៉ុន ផ្តល់ហិរញ្ញប្បទានឥតសំណងនូវទឹកប្រាក់ជិត១១លានដុល្លារអាមេរិក ដល់រដ្ឋាភិបាលកម្ពុជា ដើម្បីអនុវត្តគម្រោងអភិវឌ្ឍន៍ប្រព័ន្ធចរាចរណ៍នាវានៅកំពង់ផែស្វយ័តក្រុងព្រះសីហនុ ខេត្តព្រះសីហនុ។
យោងតាមសេចក្តីប្រកាសព័ត៌មានរបស់ស្ថានទូតជប៉ុនប្រចាំនៅកម្ពុជា នៅថ្ងៃទី០១ ខែមីនា ឆ្នាំ២០២១នេះ បានឱ្យដឹងថា តបតាមសំណើរបស់រដ្ឋាភិបាលកម្ពុជា ជប៉ុនបានផ្តល់នូវហិរញ្ញប្បទានឥតសំណងរបស់ជប៉ុន នូវទឹកប្រាក់ចំនួន ១ ១៣២ ០០០ ០០០យ៉េន (មួយប៊ីលាន មួយរយសាមសិបពីរលានយ៉េន) ឬស្មើប្រមាណ ១០ ៨០០ ០០០ដុល្លារអាមេរិក ដល់កម្ពុជា ដើម្បីអនុវត្តគម្រោងអភិវឌ្ឍន៍ប្រព័ន្ធចរាចរណ៍នាវានៅកំពុងផែស្វយ័តក្រុងព្រះសីហនុ។
ស្ថានទូតជប៉ុនបន្តថា គម្រោងនេះនឹងបង្កើតប្រព័ន្ធចរាចរណ៍នាវា (VTS) ដើម្បីធ្វើឱ្យប្រសើរឡើងនូវសុវត្ថិភាពផ្លូវសមុទ្រ និងប្រសិទ្ធភាពការធ្វើនាវាចរណ៍នៅជុំវិញកំពង់ផែស្វយ័តក្រុងព្រះសីហនុ។
សេចក្តីប្រកាសព័ត៌មានបញ្ជាក់ថា៖ «យើងរំពឹងថា តាមរយៈលទ្ធផលនៃគម្រោងនេះ វិធានការណ៍សុវត្ថិភាពនៅកំពង់ផែស្វយ័តក្រុងព្រះសីហនុ ការអភិវឌ្ឍសង្គមនិងសេដ្ឋកិច្ចរបស់ប្រទេសកម្ពុជា ព្រមទាំងការតភ្ជាប់ក្នុងតំបន់មេគង្គ នឹងត្រូវបានលើកកម្ពស់»។
បើតាមសេចក្តីប្រកាសព័ត៌មាន ការផ្តល់ជំនួយនេះបានធ្វើឡើងតាមរយៈលិខិតប្តូរសារ ដែលចុះហត្ថលេខារវាងលោក ប្រាក់ សុខន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និង លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំប្រទេសកម្ពុជា នៅថ្ងៃនេះ៕
