រដ្ឋាភិបាលកម្ពុជា បានប្រែក្លាយ The Great Duke ដែលជាអតីតសណ្ឋាគារលំដាប់ផ្កាយ៥ នៅកណ្តាលរាជធានីភ្នំពេញ ឱ្យទៅជាកន្លែងសម្រាប់ព្យាបាលអ្នកជំងឺកូវីដ១៩ កម្រិតស្រាលដែលមានលទ្ធភាពដាក់អ្នកជំងឺបានប្រមាណ៥០០នាក់។
ការប្រែក្លាយអតីតសណ្ឋាគារលំដាប់ខ្ពស់មួយនេះទៅជាមន្ទីរពេទ្យសម្រាប់ព្យាបាលអ្នកជំងឺកូវីដ១៩នេះ បានធ្វើឡើងក្រោយពីមានអ្នកជំងឺជនជាតិចិនម្នាក់ស្លាប់ដោយសាររើថ្នាំញៀនធ្ងន់ធ្ងរ នៅពេលបុរសរូបនោះកំពុងសម្រាកព្យាបាលជំងឺកូវីដ១៩ នៅមជ្ឈមណ្ឌលព្យាបាលកូវីដ១៩ ព្រែកព្នៅ កាលពីថ្ងៃទី០១ ខែមីនា ឆ្នាំ២០២១។
កាលពីថ្ងៃម្សិលមិញ លោកនាយករដ្ឋមន្ត្រី ហ៊ុន សែន បានថ្លែងសារជាសំឡេងថា លោកមានការស្លុតចិត្តជាខ្លាំងនៅពេលដែលអាជ្ញាធរនិងក្រសួងសុខាភិបាលយកទីតាំងមជ្ឈមណ្ឌលចត្តាឡីស័ក ព្រែកព្នៅ ធ្វើជាកន្លែងព្យាបាលអ្នកជំងឺកូវីដ១៩។
ករណីនេះ លោកនាយករដ្ឋមន្ត្រី បានបញ្ជាឱ្យកូនប្រុសច្បងរបស់លោក គឺលោក ហ៊ុន ម៉ាណែត ដឹកនាំកម្លាំងចុះរៀបចំនៅទីតាំងសណ្ឋាគារ The Great Duke អតីតសណ្ឋាគារអាំងទែកុងទីណង់តាល់ ធ្វើជាមន្ទីរពេទ្យសម្រាប់ពិនិត្យ ថែទាំ និងព្យាបាលអ្នកជំងឺកូវីដ-១៩ ដោយផ្ទេរអ្នកជំងឺពីមណ្ឌលចត្តាឡីស័ករាជធានីភ្នំពេញ (ព្រែកព្នៅ)។
លោកបានថ្លែងថា៖ «សណ្ឋាគារអាំងទែកុងទីណង់តាល់ មានដល់ទៅ៥០០បន្ទប់ តែយើងបែរជាខ្វះនេះ ខ្វះនោះ ធ្វើស្អីក៏មិនចេញ អាចុងក្រោយខ្ញុំឱ្យដើររៀបចំទៅ ជាទីចុងបំផុតយកកន្លែងមួយដែលមិនសមជាមន្ទីរពេទ្យយកទៅធ្វើការរបៀបនេះ។ អ៊ីចឹងខ្ញុំទទួលយកអត់បានទេ កិច្ចការដឹកនាំបែបនេះ។ អ៊ីចឹងខ្ញុំសុំបញ្ជាដាច់ណាត់ រួមគ្នារៀបចំសណ្ឋាគារអាំងទែកុងទីណង់តាល់ ថ្ងៃហ្នឹង យប់ហ្នឹង ថ្ងៃស្អែក យប់ស្អែក ពីព្រែកពៅ្ន ចូលសណ្ឋាគារអាំងទែកុងទីណង់តាល់ ឱ្យខានតែបាន»។
ក្រោយបទបញ្ជានេះ លោក ហ៊ុន ម៉ាណែត បានប្រើពេល៣៣ម៉ោង ដើម្បីរៀបចំនិងកែប្រែសណ្ឋាគារ The Great Duke ដែលបានបិទទ្វារមិនដំណើរការអាជីវកម្មអស់រយៈពេល២ឆ្នាំនោះ ឱ្យក្លាយទៅជាមន្ទីរពេទ្យសម្រាប់ព្យាបាលអ្នកជំងឺកូវីដ១៩ កម្រិតស្រាល ដោយអាចព្យាបាលអ្នកជំងឺប្រមាណ៥០០នាក់ ក្នុងនោះក៏មានការផ្ទេរអ្នកជំងឺពីមជ្ឈមណ្ឌលចត្តាឡីស័កព្រែកព្នៅ ទៅកាន់ទីនោះផងដែរ។
លោក ហ៊ុន ម៉ាណែត បានសរសេរនៅក្នុងទំព័រហ្វេសប៊ុករបស់លោកថា៖ «ការដាក់ឱ្យដំណើរការទីតាំងសណ្ឋាគារនេះជាមន្ទីរពេទ្យសម្រាប់អ្នកជំងឺកូវីដ-១៩ កម្រិតស្រាល គឺដើម្បីផ្តល់លទ្ធភាពដល់ក្រសួងសុខាភិបាលក្នុងការប្រមូលផ្តុំធនធានមនុស្ស សម្ភារ បរិក្ខារ និងបច្ចេកទេសចាំបាច់មួយចំនួនបម្រើដល់ការជួយសង្គ្រោះដល់អាយុជីវិតមនុស្សឱ្យបានទាន់ពេលវេលា និងធានាទប់ស្កាត់ការរីករាលដាលកាន់តែធ្ងន់ធ្ងរនៃជំងឺនេះនៅក្នុងសហគមន៍»។
នៅថ្ងៃនេះដែរ គេសង្កេតឃើញមានរថយន្តពេទ្យជាច្រើនគ្រឿងបានដឹកជញ្ជូនអ្នកជំងឺពីមជ្ឈមណ្ឌលព្យាបាលជំងឺកូវីដ១៩ ព្រែកព្នៅ ទៅកាន់សណ្ឋាគារ The Great Duke ផងដែរ។
វីអូឌី មិនអាចសុំការអត្ថាធិប្បាយពីអភិបាលរាជធានីភ្នំពេញ លោក ឃួង ស្រេង ពាក់ព័ន្ធនឹងការផ្ទេរអ្នកជំងឺកូវីដ១៩ ពីមជ្ឈមណ្ឌលព្យាបាលកូវីដ១៩ «ព្រែកព្នៅ» បានទេ នៅថ្ងៃនេះ ដោយ លោកថាជាប់រវល់ធ្វើការងារ។
ចំណែកអភិបាលខណ្ឌព្រែកព្នៅ លោក សុខ សម្បត្តិ បដិសេធអត្ថាធិប្បាយ។
អ្នកឃ្លាំមើលសង្គម លោកបណ្ឌិត សេង សារី គាំទ្រការសម្រេចរបស់រដ្ឋាភិបាលដែលយកទីតាំងសណ្ឋាគារ The Great Duke ធ្វើជាកន្លែងសម្រាប់ព្យាបាលអ្នកជំងឺកូវីដ១៩។
លោកថា៖ «បើគាត់ជ្រើសរើសយកច្រកនេះ គួរតែអបអរសាទរ ព្រោះយើងមើលមណ្ឌលចត្តាឡីស័កដែលបង្កើតឡើងភ្លាមៗហ្នឹង ការសម្រាកពិតជាលំបាកណាស់ ក្ដៅផងអីផង ហើយអ្នកជំងឺក៏ត្រូវការបរិយាកាសដែលល្អដើម្បីថែរក្សាសុខភាពដែរ។ បើសិនជាយើងអាចយកសណ្ឋាគារដែលមានស្ដង់ដារ មកធ្វើចត្តាឡីស័កសម្រាប់អ្នកជំងឺ អាហ្នឹងវាជាជម្រើសល្អ»។
គិតត្រឹមព្រឹកថ្ងៃចន្ទ ទី៨ ខែមីនានេះ ក្រសួងសុខាភិបាលឱ្យដឹងថា មានមនុស្ស២៤នាក់ត្រូវបានធ្វើតេស្តវិជ្ជមានជំងឺកូវីដ១៩ ពាក់ព័ន្ធជាមួយព្រឹត្តិការណ៍២០កុម្ភៈ ដែលតួលេខចុងក្រោយនេះ បាននាំឱ្យចំនួនអ្នកឆ្លងសរុបទូទាំងប្រទេសឡើងដល់១ ០១១ករណី ក្នុងនោះ អ្នកជាសះស្បើយ៥១៧នាក់ និងអ្នកកំពុងសម្រាកព្យាបាល៤៩៣នាក់។
តួលេខនេះក៏បានបង្ហាញដែរថា មិនដល់បីសប្តាហ៍ផង ចាប់តាំងពីមានព្រឹត្តិការណ៍សហគមន៍២០កុម្ភៈមក កម្ពុជាមានករណីវិជ្ជមានកូវីដចំនួន៥២៧ករណី គឺលើសពីចំនួន៤៨៤ករណីដែលត្រូវបានកត់ត្រាក្នុងមួយឆ្នាំទៅទៀត ចាប់តាំងពីជំងឺនេះត្រូវបានរកឃើញជាលើកដំបូងនៅថ្ងៃទី២៧ ខែមករា ឆ្នាំ២០១៩ រហូតមកដល់ថ្ងៃទី១៩ ខែកុម្ភៈឆ្នាំនេះ៕
