មន្ត្រីជាន់ខ្ពស់ក្រសួងសុខាភិបាល ឱ្យដឹងថា ប្រធានសាលាឧទ្ធរណ៍រាជធានីភ្នំពេញ និងមន្ត្រីក្រសួងបរិស្ថានមួយរូប វិជ្ជមានជំងឺកូវីដ-១៩ ខណៈអ្នកពាក់ព័ន្ធផ្សេងទៀតត្រូវបានយកសំណាកទៅធ្វើតេស្តរកមេរោគកូវីដ-១៩។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់ វីអូឌី នៅថ្ងៃនេះថា ប្រធានសាលាឧទ្ធរណ៍រាជធានីភ្នំពេញ លោក យូ ប៊ុនឡេង និងមន្ត្រីម្នាក់នៅក្រសួងបរិស្ថាន បានឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ។ លោកស្រីបន្តថា អ្នកជំងឺត្រូវបានយកទៅព្យាបាល ខណៈអ្នកពាក់ព័ន្ធត្រូវបានយកសំណាកទៅធ្វើតេស្តនិងដាក់ឱ្យធ្វើចត្តាឡីស័ក។
លោកស្រីថា៖ «គ្រាន់តែដឹងគាត់ [ប្រធានសាលាឧទ្ធរណ៍រាជធានីភ្នំពេញ លោក យូ ប៊ុនឡេង] ឆ្លង ហើយមានទំនាក់ទំនងជាមួយព្រឹត្តិការណ៍សហគមន៍២០កុម្ភៈ។ គេកំពុងធ្វើការបន្តហើយ [រកអ្នកពាក់ព័ន្ធ]។ នៅក្រសួងបរិស្ថាន ព្រឹកមិញ ទៅយកសំណាករួចអស់ហើយ ខ្ញុំមិនដឹងចំនួនប៉ុន្មាននាក់ទេ ព្រោះគេ [ខាងក្រសួង] អ្នកធ្វើ»។
ចំពោះអ្នកពាក់ព័ន្ធនៅក្រសួងបរិស្ថាននោះ លោកស្រីសុំមិនធ្វើអត្ថាធិប្បាយ ដោយឱ្យទៅសួរអ្នកនាំពាក្យក្រសួងបរិស្ថានវិញ។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា បានប្រាប់ វីអូឌី ថា ក្រោយរកឃើញមន្ត្រីនៅក្នុងក្រសួងបរិស្ថានម្នាក់ឆ្លងជំងឺកូវីដ-១៩នោះ មន្ត្រីសុខាភិបាលចុះទៅយកសំណាកមន្ត្រីដែលពាក់ព័ន្ធជាមួយអ្នកជំងឺផ្ទាល់និងប្រយោលជាង១០០នាក់ ដើម្បីធ្វើតេស្តរកវីរុសកូវីដ-១៩។ លោកបន្តថា ក្រៅពីយកសំណាក អ្នកពាក់ព័ន្ធទាំងជាង១០០នាក់នោះ ក៏ត្រូវបានដាក់ឱ្យធ្វើចត្តាឡីស័កផងដែរ។
លោកថា៖ «ព្រឹកមិញនេះ ក្រសួងសុខាភិបាលបានយកសំណាកជាង១០០នាក់ទៅធ្វើតេស្តតាមដានមើលការវិវត្តនៃជំងឺកូវីដ-១៩ របស់មន្ត្រីដែលពាក់ព័ន្ធ ក្នុងករណីដែលគាត់ពាក់ព័ន្ធប៉ះពាល់ផ្ទាល់និងដោយប្រយោលជាមួយនឹងអ្នកជំងឺហ្នឹង»។
ចាប់តាំងពីថ្ងៃទី២០ ខែកុម្ភៈ ដល់ថ្ងៃទី១២ ខែមីនា ឆ្នាំ២០២១ អ្នកឆ្លងជំងឺកូវីដ-១៩ ក្នុងព្រឹត្តិការណ៍នេះមានចំនួន៧១២នាក់ហើយ ក្នុងនោះមានស្លាប់ម្នាក់។
គិតត្រឹមថ្ងៃទី១២ ខែមីនា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ នៅទូទាំងប្រទេសសរុប១ ២២៥នាក់ ក្នុងនោះ អ្នកជាសះស្បើយចំនួន៦១៩នាក់ ហើយកំពុងសម្រាកព្យាបាល៦០៤នាក់៕
