ក្រសួង​នឹង​ប្រើ​វិធាន​ច្បាប់​ចំពោះ​អ្នក​បំពាន​បម្រាម​សុខា​ភិបាល​ ដើម្បី​ទប់​ស្កាត់​ការ​រីក​សាយ​នៃ​កូវីដ-១៩​បំប្លែង​ថ្មី

រថយន្តមន្ទីរពេទ្យមួយគ្រឿងមកដឹកជនដែលសង្ស័យថាបានពាក់ព័ន្ធនឹងព្រឹត្តិការណ៍សហគមន៍២០កុម្ភៈ ដើម្បីយកទៅធ្វើតេស្តនិងធ្វើចត្តាឡីស័ក ថ្ងៃទី០៥ ខែមីនា ឆ្នាំ២០២១ រាជធានីភ្នំពេញ។ (ជន ចាន់រ៉ែន)

ក្រសួងសុខាភិបាល ព្រមានពីវិធានការច្បាប់ចំពោះអ្នកបំពានបម្រាមសុខាភិបាល ដើម្បីទប់ស្កាត់ជំងឺកូវីដ-១៩ ជាពិសេសវីរុសបំប្លែងថ្មីដែល​កំពុងវាយលុកក្នុងល្បឿនយ៉ាង​លឿននិងសាហាវជាងមុន នៅរាជធានីភ្នំពេញ និងបណ្តាខេត្តមួយចំនួន។

ការលើកឡើងបែបនេះ ធ្វើឡើងក្នុងសន្និសីទសារព័ត៌មានមួយ ស្តីពី «ការអនុវត្តច្បាប់លើវិធានការទប់ស្កាត់ការឆ្លងរាលដាលនៃជំងឺកូវីដ-១៩ និ​ងជំងឺឆ្លងកាចសាហាវប្រកបដោយគ្រោះថ្នាក់» នៅរាជធានីភ្នំពេញ នាព្រឹកថ្ងៃចន្ទនេះ ដែលមានរដ្ឋមន្ត្រីក្រ​សួ​ង​​សុខាភិបាល និងរដ្ឋមន្ត្រីក្រសួងយុត្តិធម៌ រួមនឹងមន្ត្រីជាន់ខ្ពស់​មួយចំនួនទៀត​ចូលរួម។

អ្នកនាំពាក្យក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន មានប្រសាសន៍ក្នុងសន្និសីទនោះ​ថា ជំងឺកូវីដ-១៩បំប្លែងថ្មី ចម្លងលឿននិងសា​ហាវជាងមុន ហើយ​វាអាចឆ្លង​តាមរយៈការចល័តរបស់មនុស្ស​ពីរាជធានីភ្នំពេញទៅ​​ខេត្តផ្សេងទៀត រួមទាំងក្នុ​ងពិធីរៀបមង្គលការជាដើម។

លោកស្រី ឱ វណ្ណឌីន គូសបញ្ជាក់ថា វិធានការផ្លូវច្បាប់នឹងត្រូវធ្វើក្រោមច្បាប់ថ្មីនេះ ដើម្បីកាត់ផ្តាច់ខ្សែសង្វាក់ចម្លង ដោយថា ថ្មីៗនេះ មានករណីបុរសម្នាក់នៅរាជធានី​ភ្នំពេញ ទៅចូលរួមមង្គលការនៅខេត្តមួយផ្សេងទៀតអំឡុងពេលកំពុងធ្វើចត្តាឡីស័ក ហើយ​ក្រោយមក បុរសនោះមានវិជ្ជមានកូវីដ-១៩ ដែលបង្កឱ្យមនុស្សច្រើនរយនាក់ទៀតមកចូលរួមមង្គលការនោះ កំពុងប្រឈមនឹងការឆ្លង។

លោកស្រីថា៖ «ត្រង់ហ្នឹងហើយដែលខ្ញុំតែងតែរំឭកថា កុំឱ្យរោងការរបស់យើង រោងបុណ្យរបស់យើង កុំឱ្យការជួបជុំរបស់យើង ហា​ង​របស់យើងផ្ទុះចេញនូវមេរោគកូវីដ-១៩ ខ្ញុំនិយាយរឿយៗត្រង់ចំណុចហ្នឹង […] អញ្ចឹងចាំបាច់នៅពេលនេះ ពីព្រោះច្បាប់មានហើ​យ។ អញ្ចឹងអាជ្ញាធរមូលដ្ឋាន លោកចាំចាច់ត្រូវតែអនុវត្តច្បាប់ហើយ»។

អ្នកនាំពាក្យរូបនេះ​បានក្រើនរំឭកថា រលកចម្លងថ្មីនឹងអាចថ​យ​ចុះ​វិញត្រឹម២សប្តាហ៍ទៀត បើពល​រដ្ឋ​​ចូលរួមគោរពវិធានការនានាដែលដាក់ចេញដោយរដ្ឋាភិបាល រួមទាំងការ​ផ្អាកបណ្តោះអាសន្ននូវការជួបជុំនិង​ការរៀបចំពិធីមង្គលការផងដែរ ។

លោកស្រីថា៖ «អញ្ចឹងសូមបងប្អូនថ្លឹងថ្លែង […] ពិសេសក្នុងបរិបទនៃការផ្ទុះឡើងនៃការចម្លងជំងឺឆ្លងនេះ […] ត្រូវគិតគូរអំពីផលប្រយោ​ជន៍ផ្ទាល់ខ្លួន និងសុខភាពសាធារណៈ ក៏ដូចជា ផលប្រយោជន៍សង្គមជាតិផងដែរ»។

រដ្ឋមន្ត្រីក្រសួងយុត្តិធម៌​ លោក កើត រិទ្ធ មានប្រសាសន៍ថា ច្បាប់និងអនុក្រឹត្យស្តីពីវិធានការ​ទប់ស្កាត់ជំងឺកូវីដ-១៩ បានចូលជាធរមានហើយកាលពីទី១២ ខែមីនានេះ ដែលបាន​ផ្តល់សិទ្ធិអំណាច​ដល់រដ្ឋាភិបាលក្នុងការដាក់វិធានការ​ចាំបាច់ ដើម្បីទប់ស្កាត់ជំងឺកូវីដ-១៩ និងជំងឺឆ្លងផ្សេងៗដែលអាចកើតឡើងជាយថាហេតុនៅថ្ងៃអនាគត។

លោកថា ច្បាប់ថ្មីនេះបានផ្តោតលើបទល្មើសចំនួន៥ ដូចជា បទល្មើសពីការធ្វើចត្តាឡីស័ក អំពើគេចវេះពីការព្យា​បាល ចេតនាក្នុងការចម្លងដល់អ្នកដទៃ និងការរារាំង​អាជ្ញាធរអនុវត្តច្បាប់។

លោកថា៖ «អំពើមិនគោរពវិធានការរដ្ឋបាល ត្រូវពិន័យពី១លានរៀលទៅ៥លានរៀល ហើយប្រសិនបើការមិនគោរពហ្នឹងបណ្តាល​​ឱ្យឆ្លងជំងឺទៅអ្នកដទៃ គឺត្រូវមានទោសដាក់ពន្ធនាគារពី៦ខែទៅ៣ឆ្នាំ ហើយទោសនេះអាចកើនឡើងដល់៥ឆ្នាំ បើសិនជាការមិ​ន​គោរពវិធានការរដ្ឋបាលនេះបណ្តាលឱ្យប៉ះពាល់ធ្ងន់ធ្ងរដល់សុខភាពសាធារណៈ»។

គណបក្សប្រជាធិបតេយ្យមូលដ្ឋាន កាលពីសប្តាហ៍មុន បាននិយាយក្នុងសេចក្តីថ្លែងការណ៍របស់ខ្លួនថា ដើម្បីទប់ស្កាត់ចលាចលសង្គមពីវិបត្តិជំងឺកូវីដ-១៩​នេះ រដ្ឋាភិបាលត្រូវបង្ហាញវិធានការឱ្យបានច្បាស់ជាងនេះ រួមទាំងប្រាប់ពីទំហំ​សាច់ប្រាក់ដែលត្រូវបញ្ចេញស​ម្រា​ប់ជួ​យសង្គ្រោះ​សេដ្ឋកិច្ចអ្នកដែលរងផលប៉ះពាល់។

អ្នកសិក្សាសង្គម លោកបណ្ឌិត សេង សារី មានប្រសាសន៍ថា ភាពមិនស៊ីសង្វាក់គ្នារវាងពលរដ្ឋ និងការអំពាវនាវរបស់ក្រសួងកន្លងទៅ អាចមកពីពលរដ្ឋមួយចំនួនមិនជឿលើប្រព័ន្ធផ្សព្វផ្សាយរបស់រដ្ឋ ដែលត្រូវពិនិត្យឡើងវិញដើម្បីបង្កើនជំនឿពលរដ្ឋ។

អ្នកឃ្លាំមើលរូបនេះបារម្ភថា វិធានការច្បាប់លើកនេះនឹងជំរុញឱ្យមានភាពចម្រូងចម្រាស​ បើ​សិន​មិន​ទប់ស្កាត់អំពើពុករលួយនៅពេលអនុវត្តច្បាប់។

លោកថា៖ «ខ្ញុំថា ការប្រើយន្តការពិន័យឬក៏ចាប់ដាក់ពន្ធនាគារ ក្នុងការបំពានឬរំលោភធ្ងន់ធ្ងរហ្នឹង ខ្ញុំថាចំណុចហ្នឹងមិនជាចោទទេ ដើ​ម្បីជំរុញការអនុវត្តច្បាប់ឱ្យមានប្រសិទ្ធភាពនោះ ប៉ុន្តែអ្វីដែលសំខាន់ខ្ញុំបារម្ភថា ចំណុចខ្លះវាធ្វើឱ្យមនុស្សមួយចំនួនដែលរកស៊ីក្បែរច្បា​ប់ហ្នឹងវាមានឱកាសដែរ ព្រោះអីកន្លងមកយើងឃើញច្បាប់ចរាចរណ៍ថ្មីហ្នឹង ក៏មានការប្រទាំងប្រទើស​គ្នាច្រើនរវាងរដ្ឋាភិបាលនិ​ងប្រជាពលរដ្ឋ»។

បើគិតត្រឹមព្រឹក​ថ្ងៃទី១៤ ខែមីនានេះ ក្រសួងរកឃើញអ្នកឆ្លងជំងឺកូវីដ-១៩ ក្នុងព្រឹត្តិ​ការណ៍​សហគមន៍២០​កុម្ភៈ កើនដល់​៨១០​នាក់ ក្នុងនោះមាន​អ្នក​ស្លាប់​ម្នាក់ដែលចំនួន​នេះបាន​ធ្វើឱ្យអ្នកឆ្លងសរុបនៅកម្ពុជា ចាប់ពីចុងឆ្នាំ២០១៩មក បាន​កើនដល់១ ៣២៥នាក់ ព្យាបាលជាសះស្បើយ​៧៣០នាក់  និងកំពុងសម្រាកព្យាបាល៥៩២នាក់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ