ក្រសួងសុខាភិបាល រកឃើញអ្នកឆ្លងជំងឺកូវីដ-១៩ ចំនួន៣៧នាក់ ក្នុងនោះមានអ្នកឆ្លងក្នុងព្រឹត្តិការណ៍សហគមន៍២០កុម្ភៈ ចំនួន៣៥នាក់ និងអ្នកធ្វើដំណើរមកពីក្រៅប្រទេស២នាក់។
សេចក្ដីប្រកាសព័ត៌មានរបស់ក្រសួងសុខាភិបាល ចុះថ្ងៃទី០១ ខែមេសា ឆ្នាំ២០២១ ឱ្យដឹងថា អ្នកដែលឆ្លងក្នុងព្រឹត្តិការណ៍សហគមន៍២០កុម្ភៈ ទាំង៣៥នាក់នោះ រួមមាន ជនជាតិចិន៣នាក់ ជនជាតិកូរ៉េម្នាក់ និងខ្មែរ៣១នាក់ ជាអ្នករស់នៅរាជធានីភ្នំពេញ ខេត្តព្រះសីហនុ និងខេត្តកណ្តាល។
ចំណែកអ្នកឆ្លងជំងឺកូវីដ-១៩ ចំនួន២នាក់ទៀត ក្រសួងថា ជាជនជាតិឥណ្ឌូនេស៊ី ដែលធ្វើដំណើរមកពីប្រទេសសិង្ហបុរី បានមកដល់កម្ពុជា នៅថ្ងៃទី១៨ ខែមីនា និងថ្ងៃទី៣០ ខែមីនា ឆ្នាំ២០២១។
ក្រសួងសុខាភិបាលបានឱ្យដឹងទៀតថា ក្រៅពីរកឃើញអ្នកឆ្លង ក៏មានអ្នកជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ ចំនួន៤៩នាក់បានជាសះស្បើយផងដែរ។
បើតាមក្រសួងសុខាភិបាល អ្នកឆ្លងជំងឺកូវីដ-១៩ ក្នុងព្រឹត្តការណ៍សហគមន៍២០កុម្ភៈ ក្នុងរយៈពេលជាង១ខែនេះ មានចំនួន១ ៩៤៩នាក់ ក្នុងនោះមានអ្នកស្លាប់ចំនួន១៤នាក់ ខណៈអ្នកឆ្លងនៅទូទាំងប្រទេសបានកើនដល់២ ៤៧៧នាក់ ក្នុងនោះព្យាបាលជាសះស្បើយ១ ២៤០នាក់ និងកំពុងសម្រាកព្យាបាល១ ២១៩នាក់៕
