ក្រសួងការងារ និងបណ្តុះបណ្តាលវិជ្ជាជីវៈ ចាប់ផ្តើមយុទ្ធនាការចាក់វ៉ាក់សាំងបង្ការជំងឺកូវីដ-១៩ នៅថ្ងៃទី៧ ខែមេសានេះ សម្រាប់កម្មករ-និយោជិតធ្វើការនៅតាមរោងចក្រផ្សេងៗនៅទូទាំងប្រទេស ខណៈសហជីពថាចំនួនកម្មករដែលបានចុះឈ្មោះចាក់វ៉ាក់សាំងនៅមានកម្រិតនៅឡើយ។
សេចក្តីជូនដំណឹងរបស់អនុគណៈកម្មការចាក់វ៉ាក់សាំងកូវីដ-១៩ នៅថ្ងៃទី៦ ខែមេសា ឆ្នាំ២០២១ ឱ្យដឹងថា ខាងក្រសួងគ្រោងចាក់វ៉ាក់សាំងដល់កម្មករ-និយោជិតធ្វើការនៅតាមរោងចក្រនិងសហគ្រាសផ្សេងៗនៅទូទាំងប្រទេស ចំនួន២០ម៉ឺនដូស ក្នុង១ខែ ចាប់ពីថ្ងៃទី៧ ខែមេសានេះតទៅ ដោយមានក្រុមគ្រូពេទ្យចំនួន៦០ក្រុម បែងចែកពាក់កណ្តាលចុះនៅរាជធានីភ្នំពេញ តាមទីតាំងផ្សេងៗគ្នា និងពាក់កណ្តាលទៀតចុះតាមបណ្តាខេត្ត។
យុទ្ធនាការចាក់វ៉ាក់សាំងនេះ ធ្វើឡើងបន្ទាប់ពីរដ្ឋាភិបាលកម្ពុជាជំរុញការចាក់វ៉ាក់សាំងដល់កម្មកររោងចក្រនៅទូទាំងប្រទេសដែលមានជាង៧០ម៉ឺននាក់ ដើម្បីបង្ការនិងទប់ស្កាត់គ្រោះថ្នាក់នៃការឆ្លងរាលដាលនៃជំងឺកូវីដ-១៩ក្នុងចំណោមពួកគេ ខណៈរលកចម្លងពាក់ព័ន្ធនឹងព្រឹត្តិការណ៍សហគមន៍២០កុម្ភៈនៅតែមិនទាន់អាចកាត់ផ្តាច់បាន។
អ្នកនាំពាក្យក្រសួងការងារ និងជាប្រធានអនុគណៈកម្មការចាក់វ៉ាក់សាំង លោក ហេង សួរ ប្រាប់វីអូឌីថា គិតត្រឹមថ្ងៃទី៣ ខែមេសា កម្មករ-និយោជិតធ្វើការនៅតាមរោងចក្រចំនួនជាង៣៨ម៉ឺននាក់ បានចុះឈ្មោះចាក់វ៉ាក់សាំង។ លោកថា ចំនួននេះល្មមគ្រប់គ្រាន់សម្រាប់ផែនការចាក់វ៉ាក់សាំងរយៈពេល២ខែដំបូង។
លោក ហេង សួរ បានប្រាប់វីអូឌីបន្ថែមនៅថ្ងៃនេះថា ក្រសួងនឹងចាត់វិធានការលើកម្មករដែលមិនចង់ចាក់វ៉ាក់សាំង ដោយបណ្តេញចេញពីការងារនៅពេលចំនួនអ្នកចាក់រួចក្នុងចំណោមពួកគេលើសពី៧០ភាគរយ ដូចជាវិធានការរបស់រដ្ឋាភិបាលលើមន្រ្តីរាជការ នគរបាល និងកងកម្លាំងប្រដាប់អាវុធអញ្ចឹងដែរ។
លោក ហេង សួរ មានប្រសាសន៍តាមសារ SMS ថា៖ «យើងនឹងមានវិធានការដូចគ្នា ដើម្បីធានាថា កម្ពុជាយើងមានភាពស៊ាំទៅនឹងជំងឺកូវីដ។ យើងតម្រូវចាក់វ៉ាក់សាំងសរុបឱ្យបាន១០លាននាក់ ត្រឹមខែមិថុនា ឆ្នាំ២០២២»។
ប្រធានសម្ព័ន្ធសហជីពកម្ពុជា អ្នកស្រី យ៉ាង សោភ័ណ្ឌ លើកឡើងថា ចំនួនកម្មករដែលបានចុះឈ្មោះចាក់វ៉ាក់សាំងនៅមានកម្រិតនៅឡើយ ដោយសារពួកគេមួយចំនួនមិនទាន់ទទួលបានព័ត៌មានច្បាស់លាស់អំពីប្រសិទ្ធភាពនិងគុណភាពរបស់វ៉ាក់សាំង។
អ្នកស្រីថា កម្មករមួយចំនួនដែលមានបញ្ហាសុខភាព ហើយមិនបានចុះឈ្មោះចាក់ ត្រូវបានខាងភាគីរោងចក្រព្រមានពីការបណ្តេញចេញពីការងារ ឬអាចនឹងត្រូវរងការផាកពិន័យផ្សេងៗ ជាដើម។ អ្នកស្រីថា ការចាក់វ៉ាក់សាំងគួរតែធ្វើឡើងតាមគោលការណ៍ស្ម័គ្រចិត្ត ដោយពុំមានការបង្ខិតបង្ខំ ដែលមានចែងក្នុងអនុក្រឹត្យស្តីពីវិធានការសុខាភិបាលដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
អ្នកស្រី យ៉ាង សោភ័ណ្ឌ មានប្រសាសន៍ថា៖ «យើងដឹងហើយថា ប្រជាពលរដ្ឋឬក៏កម្មករយើងហ្នឹង ជាពិសេសកម្មករហ្នឹងឯង គាត់សុទ្ធតែជាអ្នកប្រឈមខ្លាំងជាងគេ អញ្ចឹងចង់មិនចង់ វ៉ាក់សាំងហ្នឹងគាត់ត្រូវជាមនុស្សអាទិភាព ត្រូវទទួលបានការចាក់វ៉ាក់សាំងហ្នឹងឯង។ ហើយបើសិនជាមិនមានការពន្យល់ពួកគាត់ឱ្យបានស្រួលបួលទេ ខ្ញុំគិតថា ពួកគាត់មិនយល់ រឿងអីដែលគាត់ចាក់»។
កម្មការិនីមួយរូបឈ្មោះ ពុំ ស្រីម៉ុល បម្រើការនៅរោងចក្រ ខាយណេង ក្នុងខេត្តកំពង់ឆ្នាំង លើកឡើងថា គាត់មិនបានចុះឈ្មោះចាក់វ៉ាក់សាំងកូវីដ-១៩នោះទេ ដោយសារគាត់មានបញ្ហាសុខភាព និងធ្លាប់វះកាត់ បើទោះជាគាត់អាចនឹងត្រូវរងការផាកពិន័យជាប្រាក់តាមការលើកឡើងរបស់រោងចក្រក្តី។
កម្មការិនី ស្រីម៉ុល និយាយថា៖ «មុនដំបូង គាត់ថា អត់ទេ! ត្រូវតែស៊ីញ៉េ [ចុះហត្ថលេខា]។ ខ្ញុំថា ខ្ញុំអត់ស៊ីញ៉េទេបង! ព្រោះអីខ្ញុំគិតថា ខ្ញុំបង់លុយ។ ខ្ញុំថា បង់ៗទៅ មិនដឹងធ្វើម៉េចទេ។ ពេលក្រោយទៀតមក អត់ឮនិយាយរឿងបង់លុយហ្នឹងទៀតទេ បង! ក្រោយមកថា ឥលូវស្ម័គ្រចិត្ត ចុះដោយស្ម័គ្រចិត្តអញ្ចឹង។ អ្នកណាគេចុះៗ អ្នកណាអត់ៗទៅ ប៉ុន្តែបើមានរឿងអី យើងទទួលខុសត្រូវខ្លួនឯង»។
ដោយឡែក កម្មការិនី ជា ស្រីណា នៅរោងចក្រ ហ្រ្គីនទ្រី ក្នុងរាជធានីភ្នំពេញ លើកឡើងថា គាត់បានចុះឈ្មោះចាក់វ៉ាក់សាំងរួចហើយ ប៉ុន្តែគាត់មិនទាន់សម្រេចថានឹងចាក់ទេ ដោយត្រូវរង់ចាំការពិគ្រោះជាមួយគ្រូពេទ្យចាក់វ៉ាក់សាំងជាមុនសិន ដោយសារគាត់មានបញ្ហាអាលែកហ្ស៊ីស្បែក។
កម្មការិនី ស្រីណា និយាយថា៖ «ខ្ញុំមានការបារម្ភតិចតួចដែរ ព្រោះអីគេថា ចាក់ទៅមានធ្វើទុក្ខខ្លួនអញ្ចឹង។ គ្រាន់តែថា ខ្ញុំក៏ចង់ចាក់ដែរ ព្រោះយើងចង់ការពារខ្លួនអញ្ចឹងណា។ តែឮគេនិយាយថា អ្នកអាលែកហ្ស៊ី ចាក់អត់កើត អាហ្នឹងទាល់តែពិភាក្សាជាមួយពេទ្យទៀត»។
យ៉ាងណាសម្រាប់ប្រធានរដ្ឋបាលរោងចក្រ Y&W នៅខណ្ឌដង្កោ លោក ធី ប៊ុនថុន លើកឡើងថា ការចុះឈ្មោះចាក់វ៉ាក់សាំងនៅរោងចក្ររបស់លោក គឺធ្វើឡើងដោយការស្ម័គ្រចិត្ត ហើយថា ក្នុងចំណោមកម្មករដែលបានចុះឈ្មោះគឺមានជាង២ពាន់នាក់ ដែលស្មើនឹងប្រមាណ៥០ភាគរយនៃចំនួនកម្មករសរុប។
លោក ប៊ុនថុន និយាយថា៖ «ពេលខ្លះ យើងត្រូវតែចាក់បទបង្ហាញរបស់ក្រសួងសុខាភិបាលឬក៏ការណែនាំអំពីអត្ថប្រយោជន៍ក្នុងការចាក់វ៉ាក់សាំងអីផ្សេងៗ ដើម្បីឱ្យគាត់យល់កាន់តែច្បាស់។ ព្រោះជាទូទៅ វាជាមាគ៌ាមួយដែរ វ៉ាក់សាំងណា! បើករណីថាយើងអត់មាន អញ្ចឹងក៏យើងទៅណាមកណាក៏យើងមានអារម្មណ៍មួយខ្លាចដែរ»៕
