ក្រសួងសុខាភិបាលអំពាវនាវទៅអាជ្ញាធរនៅតាមរាជធានី-ខេត្តទាំងអស់ ជួយសម្រួលដល់ប្រជាពលរដ្ឋដែលចាក់វ៉ាក់សាំងដូសទី១រួច ឱ្យពួកគេបានទៅចាក់ដូសលើកទី២ ដោយសារអ្នកខ្លះកំពុងជាប់បម្រាមគោចររបស់រដ្ឋាភិបាល។
កាលពីថ្ងៃទី៦ ខែមេសា ឆ្នាំ២០២១នេះ រដ្ឋាភិបាលបានចេញសេចក្តីសម្រេចមួយ ដើម្បីរាំងខ្ទប់ការធ្វើដំណើរឆ្លងកាត់ ចេញ-ចូលពីខេត្តមួយទៅខេត្តមួយ រយៈពេល១៤ថ្ងៃ ដោយគិតចាប់ពីម៉ោងសូន្យថ្ងៃទី៧ រហូតដល់ថ្ងៃទី២០ ខែមេសា ឆ្នាំ២០២១។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានផ្ញើសារជាសំឡេងប្រាប់អ្នកសារព័ត៌មាននៅក្នុងបណ្តាញតេឡេក្រាមនាថ្ងៃនេះថា មានប្រជាពលរដ្ឋមួយចំនួនដែលធ្លាប់ចាក់វ៉ាក់សាំងដូសទី១រួច បានប្រាប់លោកស្រីថា ពួកគេមានបញ្ហាលំបាកនៅពេលដែលបម្រាមគោចររបស់រដ្ឋាភិបាលហាមមិនឱ្យពួកគេធ្វើដំណើរឆ្លងពីរាជធានីទៅខេត្ត ពីខេត្ត ទៅរាជធានី ដែលធ្វើឱ្យពួកគាត់ជួបបញ្ហាប្រឈម ខ្លាចផុតកំណត់ពេលវេលាចាក់វ៉ាក់សាំងសម្រាប់ដូសទី២។
អ្នកនាំពាក្យក្រសួងសុខាភិបាលរូបនោះ ពន្យល់ថា វ៉ាក់សាំងប្រភេទស៊ីណូហ្វាម និង ស៊ីណូវ៉ាក់ ចាក់ដូសទី១ ចន្លោះពេលពី១៤ថ្ងៃ ទៅ២៨ថ្ងៃ ត្រូវទៅចាក់ដូសទី២។ ចំណែកការចាក់ដូសទី១ សម្រាប់ប្រភេទថ្នាំ កូហ្វីស្សែល (អាស្ត្រាហ្សេនីកា) គឺមានរយៈពេល៨សប្តាហ៍ ទៅ១២សប្តាហ៍ ត្រូវទៅចាក់ដូសទី២។ លោកស្រីបន្តថា បើសិនជាប្រជាពលរដ្ឋដែលទៅចាក់ដូសទី១ ហើយមិនបានទៅចាក់ដូសទី២ តាមការកំណត់របស់ក្រសួងសុខាភិបាល គឺការចាក់ដូសទី១ នឹងក្លាយទៅជាអសារបង់ទៅវិញ។
ករណីនេះ លោកស្រីអំពាវនាវទៅអភិបាលនៃគណៈអភិបាលរាជធានី-ខេត្ត ជួយសម្រួលឱ្យប្រជាពលរដ្ឋដែលមានកាតសម្រាប់ចាក់វ៉ាក់សាំងដូសទី២ បង្ហាញទៅសមត្ថកិច្ចជាប់ព្រំប្រទល់ពីរាជធានីទៅខេត្ត ឬពីខេត្តទៅខេត្តមួយផ្សេងទៀត បានទៅចាក់វ៉ាក់សាំងដូសទី២ តាមគោលដៅរបស់ខ្លួន ដើម្បីការពារសុខភាពជូនពួកគេ និងរួមគ្នាកាត់បន្ថយការឆ្លងជំងឺកូវីដ-១៩ ។
លោកស្រីអំពាវនាវដូច្នេះថា៖ «សូមមេត្តាជួយទៅលើបញ្ហាកង្វល់របស់បងប្អូនប្រជាពលរដ្ឋរបស់យើង នៅលើការដែលគាត់មិនមានការអនុញ្ញាតឱ្យគាត់មកចាក់វ៉ាក់សាំងលើកទី២ នៅទីតាំងដែលគាត់បានចាក់លើកទី១។ ខ្ញុំសុំដាក់ជូនដល់ឯកឧត្តម លោកជំទាវ ដែលជាអភិបាលនៃគណៈអភិបាលរាជធានីខេត្ត និងជាប្រធាន-អនុគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌរាជធានីខេត្តនេះ សូមមេត្តាចាត់ចែងតាមការគួរ»។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី មានប្រសាសន៍ថា បើសិនជាប្រជាពលរដ្ឋដែលគាត់មានកាតបង្ហាញអាជ្ញាធរ ដើម្បីឡើងមកភ្នំពេញឬចេញពីភ្នំពេញទៅតាមបណ្តលខេត្ត ដើម្បីចាក់វ៉ាក់សាំងដូសទី២ គឺអាជ្ញាធរនឹងអនុញ្ញាតឱ្យពួកគេធ្វើដំណើរបាន ដោយមិនមានការហាមឃាត់នោះទេ។
លោកមានប្រសាសន៍ថា៖ «គាត់ធ្វើដំណើរមកចាក់វ៉ាក់សាំងរបស់គាត់ បញ្ជាក់ថា ត្រូវដល់ថ្ងៃគាត់ចាក់វ៉ាក់សាំង ធម្មតា [អនុគ្រោះ] ហើយ លើកលែងតែថា កាតចាក់វ៉ាក់សាំងគាត់១០ថ្ងៃទៀត ស្រាប់តែគាត់ធ្វើដំណើរមកថ្ងៃហ្នឹង វាមិនឆ្លុះបញ្ចាំងពីភាពជាក់ស្តែងនៃតម្រូវការចាំបាច់ វាជាករណីផ្សេង»។
អ្នកនាំពាក្យស្នងការរាជធានីភ្នំពេញ លោក សាន សុខសីហា មានប្រសាសន៍ដែរថា អាជ្ញាធរតែងតែអនុវត្តតាមបម្រាមរដ្ឋាភិបាលនិងក្រសួងសាម៉ី ដើម្បីជាប្រយោជន៍ដល់ប្រជាពលរដ្ឋ ជាពិសេសត្រូវចាក់វ៉ាក់សាំងដូសទី២ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩នោះ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត គាំទ្រនឹងការអំពាវនាវរបស់មន្ត្រីសុខាភិបាលរូបនេះ ប៉ុន្តែលោកបានផ្តល់ជាអនុសាសន៍ថា ជម្រើសល្អជាងនេះ ក្រសួងសុខាភិបាលគួរតែឱ្យប្រជាពលរដ្ឋដែលត្រូវដល់ថ្ងៃចាក់វ៉ាក់សាំងដូសទី២ បានទៅចាក់នៅកន្លែងដែលគាត់កំពុងស្នាក់នៅបច្ចុប្បន្ន ដើម្បីកុំឱ្យបំពានបម្រាមគោចររបស់រដ្ឋាភិបាល ដែលហាមឃាត់មិនឱ្យពលរដ្ឋឆ្លងពីរាជធានីទៅខេត្ត ពីខេត្តទៅរាជធានីនោះ ទើបទប់ស្កាត់ការឆ្លងរាលដាលនៃជំងឺកូវីដ-១៩ កាន់តែមានប្រសិទ្ធភាព។
លោកមានប្រសាសន៍ថា៖ «នៅខេត្តណា អាចសម្រួលឱ្យគាត់ចាក់នៅខេត្តហ្នឹង ទៅតាមប្រភេទវ៉ាក់សាំងដែលគាត់បានចាក់ ក៏ជារឿងល្អម្យ៉ាងដែរ! ដែលមិនបាច់ធ្វើដំណើរ ប៉ុន្តែគ្រាន់តែថា ទាក់ទងនឹងទិន្នន័យនៃការចាក់ វាអាស្រ័យទៅលើខាងក្រសួងសុខាភិបាល ព្រោះការចល័តមិនសូវល្អប៉ុន្មានទេ វាស្ថិតនៅក្នុងបម្រាមគោចរ ហើយការចល័តគាត់មិនអាចមកតែម្នាក់ឯងទេ គាត់អាចមានអ្នកជូនមកជាមួយ ការចល័តទៅមកក៏វាមិនសូវល្អដែរ»។
របាយការណ៍ក្រសួងសុខាភិបាល បានឱ្យដឹងនៅថ្ងៃទី៩ ខែមេសា ឆ្នាំ២០២១នេះថា រយៈពេល៨ថ្ងៃនៃយុទ្ធនាការចាក់វ៉ាក់សាំងកូវីដ-១៩ ស៊ីណូវ៉ាក់ គឺក្រុមគ្រូពេទ្យបានចាក់ជូនមន្ត្រីរាជការនិងជនគោលដៅនៅទូទាំងប្រទេស បានជិត៣២ម៉ឺននាក់។
របាយការណ៍ដដែលបង្ហាញថា រយៈពេល៨ថ្ងៃកន្លងទៅនេះ អ្នកស្ម័គ្រចិត្តមកចាក់វ៉ាក់សាំងស៊ីណូវ៉ាក់ មានចំនួន៣៣៣ ៦៥៣នាក់ ក្នុងនោះ អ្នកអនុញ្ញាតឱ្យចាក់មានចំនួន៣១៨ ៤៦៧នាក់ និងអ្នកមិនអនុញ្ញាតឱ្យចាក់មានចំនួន១៥ ៨២៦នាក់។
គិតត្រឹមថ្ងៃទី៩ ខែមេសា ឆ្នាំ២០២១នេះ ក្រសួងសុខាភិបាលបានឱ្យដឹងថា ក្រុមគ្រូពេទ្យបានចាក់វ៉ាក់សាំងទាំង៣ប្រភេទ (ស៊ីណូហ្វាម អាស្ត្រាហ្សេនីកា និងស៊ីណូវ៉ាក់) បានចំនួនជាង៦១ម៉ឺននាក់ហើយ៕
