កម្ពុជា​រក​ឃើញ​អ្នក​វិជ្ជមាន​កូវីដ-១៩​ថ្មី​ចំនួន២៧៧​​នាក់ ​និង​ស្លាប់​ម្នាក់​

រថយន្តពេទ្យដឹកអ្នកជំងឺកូវីដ១៩ ទៅព្យាបាលនិងធ្វើចត្តាឡីស័កនៅសណ្ឋាគារ The Great Duke ក្រោយផ្លាស់មកពីមណ្ឌលចត្តាឡីស័កព្រែកព្នៅ ថ្ងៃទី០៨ ខែមីនា ឆ្នាំ២០២១។ (ជន ចាន់រ៉ែន)

ក្រសួងសុខាភិបាល រកឃើញអ្នកវិជ្ជមានកូវីដ-១៩ថ្មីក្នុងព្រឹត្តិការណ៍សហគមន៍ចំនួន២៧៧នាក់បន្ថែមទៀត ក្នុងនោះស្លាប់ម្នាក់។

ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី១២ ខែមេសា ឆ្នាំ២០២១ ឱ្យដឹងថា ក្នុងចំណោម​អ្នកវិជ្ជមានកូវីដ-១៩ ទាំង២៧៧នាក់ រួមមាន អ្នករស់នៅរាជធានីភ្នំពេញ ២០៤​នាក់ ខេត្តស្វាយរៀង ៤៣​នាក់ ខេត្ត​កណ្ដាល ២៣នាក់ ខេត្តពោធិ៍សាត់ ៣នាក់ ខេត្តតាកែវម្នាក់​​​ ខេត្តព្រៃវែង ២នាក់  និងខេត្តព្រះសីហនុ​ម្នាក់​។

ចំណែកសេចក្ដីប្រកាសព័ត៌មានដាច់ដោយឡែកមួយទៀតរបស់ក្រសួង បានឱ្យដឹងទៀត​​ថា ស្ត្រី​ខ្មែរ​ម្នាក់អាយុ៦១ឆ្នាំបាន​ស្លាប់នៅមន្ទីរពេទ្យហ្លួងម៉ែ កាលពីថ្ងៃទី១១ ខែមេសា ឆ្នាំ២០២១ ដោយសារវិបត្តិផ្លូវដង្ហើមស្រួចស្រាល់ធ្ងន់ធ្ងរ និងរលាកសួតទាំងសងខាងដែលបណ្ដាលមកពីជំងឺកូវីដ-១៩ ខណៈអ្នកជំងឺរូបនេះក៏មានជំងឺទឹកនោមផ្អែមប្រចាំកាយផងដែរ។

ក្រសួងដដែលថា ស្ត្រីរូបនោះរស់នៅសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ត្រូវបានរកឃើញវិជ្ជមានកូវីដ-១៩ ហើយបានចូលសម្រាកព្យាបាលនៅមន្ទីរពេទ្យហ្លួងម៉ែ កាលពីថ្ងៃទី៣០ ខែមីនា ឆ្នាំ២០២១។

ក្រៅពីរកឃើញអ្នកឆ្លងនិងអ្នកស្លាប់ ក្រសួងថា ក៏មានអ្នកជំងឺកូវីដ-១៩ ចំនួន៦០នាក់បានព្យាបាលជាសះស្បើយ និងបានអនុញ្ញាតឱ្យពួកគេចេញពីមន្ទីរពេទ្យផងដែរ។

បើតាមក្រសួងសុខាភិបាល គិតចាប់តាំងពីថ្ងៃទី២០ ខែកុម្ភៈ ដល់ថ្ងៃទី១២ ​ខែមេសា ឆ្នាំ២០២១ កម្ពុជា​រកឃើញអ្នកវិជ្ជមានកូវីដ-១៩ ក្នុងព្រឹត្តិការណ៍សហគមន៍បានកើនដល់​៣ ៩៨២នាក់ ក្នុងនោះ ស្លាប់ចំនួន៣០នាក់ ខណៈអ្នកឆ្លងទូទាំងប្រទេសសរុប៤ ៥១៥នាក់ ក្នុងនោះ​ព្យាបាលជាសះស្បើយ២ ២១២នាក់ និងកំពុងសម្រាកព្យាបាល២ ២៦៨នាក់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ