អាជ្ញាធររាជធានីភ្នំពេញ បានអះអាងថា ផ្សារចាស់ដែលស្ថិតនៅក្នុងខណ្ឌដូនពេញ ត្រូវបានបិទជាបណ្តោះអាសន្នចាប់ពីល្ងាចថ្ងៃនេះទៅ ខណៈអាជ្ញាធរខេត្តបាត់ដំបងបានប្រកាសពីការបិទផ្សារចំនួន៨ក្នុងខេត្តនេះមួយរយៈដែរ ដើម្បីទប់ស្កាត់ការឆ្លងរាលដាលជំងឺកូវីដ-១៩។
អភិបាលរាជធានីភ្នំពេញ លោក ឃួង ស្រេង បានប្រាប់វីអូឌីថា ក្រោយពីការបិទផ្សារនេះ អាជ្ញាធរបានយកវត្ថុសំណាករបស់អាជីវករ និងអ្នកដើរផ្សារជាង៤០០នាក់ ទៅធ្វើតេស្តនៅព្រឹកថ្ងៃទី១២ ខែមេសានេះ ក្រោយរកឃើញអាជីវករនៅផ្សារនេះចំនួន៤នាក់បានឆ្លងជំងឺកូវីដ-១៩។
លោកបន្តថា ការបើកផ្សារឡើងវិញនៅពេលណានោះ គឺអាស្រ័យលើស្ថានភាពនៃជំងឺកូវីដ-១៩។
ក្រៅពីផ្សារចាស់នៅរាជធានីភ្នំពេញ ផ្សារចំនួន៨នៅក្រុងបាត់ដំបង ខេត្តបាត់ដំបង ក៏ត្រូវបានប្រកាសបិទផ្នែកខាងក្នុងផ្សារឬតួផ្សារជាបណ្តោះអាសន្នរយៈពេល៧ថ្ងៃ ចាប់ពីថ្ងៃទី១៤ ដល់ថ្ងៃទី២០ ខែមេសា ដើម្បីទប់ស្កាត់ការឆ្លងជំងឺកូវីដ-១៩ នៅក្នុងឱកាសបុណ្យចូលឆ្នាំថ្មី។
ប៉ុន្តែសេចក្តីប្រកាសរបស់រដ្ឋបាលខេត្តបាត់ដំបង នៅថ្ងៃនេះ បានអនុញ្ញាតឱ្យអាជីវករអាចលក់ដូរបាននៅបរិវេណខាងក្រៅផ្សារ។
បើតាមរដ្ឋបាលខេត្ត ផ្សារទាំង៨នោះ រួមមាន ផ្សារធំបាត់ដំបង (ផ្សារណាត់) ផ្សារបឹងឈូក ផ្សារ១៣មករា ផ្សារអប្សរា ផ្សារលើ ផ្សាររោងល្ខោន ផ្សារវត្តលៀប ផ្សារពោធិ៍វង្ស និងផ្សារទំនើបភូពុយ៕
