លោកនាយករដ្ឋមន្ត្រី ហ៊ុន សែន ចាត់ទុកការអំពាវនាវរបស់លោក សម រង្ស៊ី ឱ្យពលរដ្ឋទៅចាក់វ៉ាក់សាំងចិន ដើម្បីបង្ការជំងឺកូវីដ-១៩ នាពេលនេះ ថាជាចេតនាអាក្រក់ជំរុញពលរដ្ឋដណ្តើមគ្នា ខណៈរដ្ឋាភិបាលមិនទាន់មានលទ្ធភាពផ្គត់ផ្គង់បានគ្រប់គ្រាន់នៅឡើយ។
មេដឹកនាំអតីតបក្សប្រឆាំង លោក សម រង្ស៊ី កាលពីម្សិលមិញ បានអំពាវនាវលើហ្វេសប៊ុករបស់លោក ឱ្យពលរដ្ឋទទួលយកវ៉ាក់សាំងដើម្បីបង្ការជំងឺកូវីដ-១៩ ខណៈរដ្ឋាភិបាលកំពុងធ្វើយុទ្ធនាការចាក់វ៉ាក់សាំងចិនប្រភេទស៊ីណូវ៉ាក់ និងស៊ីណូហ្វាម ជូនកងម្លាំង មន្ត្រីរាជការ និងអ្នកមានអាទិភាពមួយចំនួនទៀត។
តាមរយៈវីដេអូឃ្លីបជិត៣នាទី លោក សម រង្ស៊ី បានគូសបញ្ជាក់ថា បច្ចុប្បន្ន កម្ពុជាមិនទាន់មានវ៉ាក់សាំងណាផ្សេងក្រៅពីវ៉ាក់សាំងចិននោះទេ ដែលករណីនេះ លោកបានអំពាវនាវដល់ប្រជាពលរដ្ឋនិងកម្មករគួរទៅទទួលយកវ៉ាក់សាំងនេះ ដើម្បីបង្ការទប់ស្កាត់ជំងឺកូវីដ-១៩ ដោយសារគិតមកដល់បច្ចុប្បន្ន មិនមានព័ត៌មានណាមួយបានផ្សព្វផ្សាយពីគ្រោះថ្នាក់នៃការចាក់វ៉ាក់សាំងនេះដូចពាក្យចចាមអារ៉ាមឡើយ។
លោកថា៖ «ប្រសិទ្ធភាពក៏អ៊ីចឹងដែរ បើទោះបីមិនបាន១០០ភាគរយ ដូចវ៉ាក់សាំងអាមេរិកាំង បើវ៉ាក់សាំងចិនមានប្រសិទ្ធភាព៧០ទៅ៨០ភាគរយ […] ក៏យើងអាចទទួលយកបានដែរ ពីព្រោះបើយើងមិនទទួលយកអាហ្នឹង គ្រោះថ្នាក់ធំណាស់ អត់ការពារយើងអីទាំងអស់ ការពារសូន្យ បើការពារសូន្យ ជំងឺមកដល់ យើងឆ្លង»។
តែយ៉ាងណា លោកនាយករដ្ឋមន្ត្រី ហ៊ុន សែន តាមរយៈសារសំឡេងនៅថ្ងៃចន្ទនេះ បានចាត់ទុកការលើកឡើងរបស់មេដឹកនាំអតីតបក្សប្រឆាំងនេះ ថាជាសារបង្កប់នូវចេតនាអាក្រក់ជំរុញឱ្យពលរដ្ឋទៅដណ្តើមគ្នាចាក់វ៉ាក់សាំង ក្នុងពេលដែលរដ្ឋាភិបាលមិនទាន់មានវ៉ាក់សាំងគ្រប់គ្រាន់សម្រាប់ចាក់ជូនពលរដ្ឋទាំងអស់។
លោកថា៖ «មុននេះ ខ្លួនវា [លោក សម រង្ស៊ី] ផ្ទាល់ និងមនុស្សរបស់វា វាបែរជាចាត់ទុកថាវ៉ាក់សាំងចិន គឺសម្រាប់យកមកសម្លាប់ប្រជាជន។ ថ្ងៃនេះ វាសរសើរវ៉ាក់សាំងចិន មិនមែនជាបំណងល្អរបស់វាទេ គោលដៅគឺការដណ្តើមវ៉ាក់សាំងរបស់ប្រជាជន ក្នុងពេលដែលយើងមិនមានវ៉ាក់សាំងគ្រប់គ្រាន់»។
លោកបានអំពាវនាវឱ្យប្រជាពលរដ្ឋរក្សាភាពនឹងនរ និងកុំសម្រុកទៅកាន់ទីតាំងចាក់វ៉ាក់សាំងទាំងគ្មានការជូនដំណឹងពីអាជ្ញាធរនិងស្ថាប័នពាក់ព័ន្ធ ដោយលោកថា រដ្ឋាភិបាលនឹងចាក់ជូនតាមលំដាប់អាទិភាពជាបន្តបន្ទាប់តាមលទ្ធភាពនិងចំនួនវ៉ាក់សាំងដែលបានមកដល់។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី ចាត់ទុកការចោទប្រកាន់គ្នានេះជាល្បែងនយោបាយចាស់ ដើម្បីយកប្រៀបខាងនយោបាយ បើទោះបីកម្ពុជាដើរចូលកាន់តែជ្រៅក្នុងវិបត្តិកូវីដ-១៩ក៏ដោយ។
តែយ៉ាងណា លោកជំរុញដល់រដ្ឋាភិបាលបង្កើនការអប់រំដល់ប្រជាពលរដ្ឋបន្ថែមទៀត ដើម្បីឱ្យពួកគាត់បានយល់ដឹងពីច្បាប់និងផលប្រយោជន៍នៃការចាក់វ៉ាក់សាំង ជាជាងការចេញវិធានការច្បាប់តឹងរ៉ឹង និងការដាក់ទោសទណ្ឌទៅលើពលរដ្ឋ។
លោកថា៖ «ការដែលយើងដាក់វិធានការដោយខ្វះការអប់រំបែបនេះ វាស្មើនឹងធ្វើឱ្យទំនុកចិត្តរវាងពលរដ្ឋនិងរដ្ឋាភិបាលកាន់តែមានគម្លាតឆ្ងាយពីគ្នា»។
អ្នកស្រី អឿង សារី អាយុ៣៧ឆ្នាំ រស់នៅខេត្តកណ្តាល មានមុខរបរជាអ្នកដាំបន្លែ បាននិយាយថា គាត់នៅពុំទាន់បានទៅចាក់វ៉ាក់សាំងប្រឆាំងកូវីដ-១៩នៅឡើយ ព្រោះបារម្ភពីកត្តាសុខភាព។
អ្នកស្រីថា៖ «សម្រាប់ខ្ញុំ ខ្ញុំអត់ទៅដណ្តើមអីទេ! ខ្ញុំនៅរារែក ទោះជាមានវ៉ាក់សាំងច្រើនក៏ដោយ នៅធម្មតា មិនទៅខ្វល់អីពីការជំរុញ មិនជំរុញអីទេ ហើយខ្ញុំមិនសូវស្តាប់មេបក្សៗអីទេ សំខាន់មើលតែជីវភាពខ្លួនឯង»។
អ្នករត់ម៉ូតូកង់បីម្នាក់នៅរាជធានីភ្នំពេញ លោក សុភ័ក្រ អាយុ៤១ឆ្នាំ ប្រាប់ថា នឹងទៅទទួលវ៉ាក់សាំងបង្ការជំងឺឆ្លងនេះ នៅពេលដែលគាត់ទទួលបានការជូនដំណឹងពីអាជ្ញាធរ។
លោកថា៖ «ខ្ញុំ បើសិនជាគេប្រាប់ឱ្យទៅចាក់ ខ្ញុំទៅចាក់។ ប៉ុន្តែអាជ្ញាធរឃុំ-សង្កាត់ គេអត់ទាន់ប្រាប់ខ្ញុំថាទៅចាក់ថ្ងៃណាៗ ព្រោះអីចង់ការពារដែរ ខ្លាចដែរ»។
យុទ្ធនាការចាក់វ៉ាក់សាំងជុំទី២ ត្រូវបានធ្វើឡើងចាប់ពីថ្ងៃទី១ ខែមីនា ឆ្នាំ២០២១ ដែលការចាក់វ៉ាក់សាំងប្រភេទ ស៊ីណូវ៉ាក់ ជុំទី២នេះ ធ្វើឡើងក្នុងក្របខណ្ឌទូទាំងប្រទេស ផ្តោតលើអ្នកមានអាទិភាពជាង៧៤ម៉ឺននាក់ (៧៤៥ ០០០នាក់) ក្នុងនោះមានក្រុមគ្រូពេទ្យ បុគ្គលិក មន្ត្រីសុខាភិបាលជួរមុខ កងកម្លាំងប្រដាប់អាវុធ រដ្ឋសភា ព្រឹទ្ធសភា និងក្រុមគ្រួសាររបស់ពួកគេ ជាដើម។
ទោះយ៉ាងណា លោកនាយករដ្ឋមន្ត្រី ហ៊ុន សែន បានគូសបញ្ជាក់ថា យុទ្ធនាការចាក់វ៉ាក់សាំងបង្ការជំងឺកូវីដ-១៩ នេះ នឹងបន្តចាក់ជូនពលរដ្ឋ មន្ត្រីរាជការ និងកងម្លាំង ឱ្យបានប្រមាណ១០លាននាក់ ក្នុងចំណោមពលរដ្ឋជិត១៦លាននាក់ ដោយអាចនឹងប្រើពេលរហូតដល់១២ខែ៕
