បុរសម្នាក់រស់នៅខេត្តព្រៃវែង បានស្លាប់បាត់បង់ជីវិត ព្រោះតែវិបត្តិផ្លូវដង្ហើមស្រួចស្រាល់ និងរលាកសួតទាំងសងខាង ដោយសារវីរុសកូវីដ-១៩។
សេចក្តីប្រកាសព័ត៌មានរបស់ក្រសួងសុខាភិបាល ចុះថ្ងៃទី១៤ ខែមេសា ឆ្នាំ២០២១ បានឱ្យដឹងថា បុរសដែលស្លាប់ដោយសារជំងឺកូវីដ-១៩នោះ មានអាយុ៣៥ឆ្នាំ រស់នៅឃុំបឹងព្រះ ស្រុកបាភ្នំ ខេត្តព្រៃវែង បានស្លាប់នៅម៉ោង៦និង២០នាទីព្រឹកថ្ងៃពុធនេះ។
ក្រសួងបន្តថា អ្នកជំងឺរូបនេះបានទៅព្យាបាលនៅមន្ទីរពេទ្យកាលពីថ្ងៃទី០២ ខែមេសា ឆ្នាំ២០២១ ជាមួយនឹងស្ថានភាពឈឺបំពង់ក ក្តៅខ្លួន ហត់ខ្លាំង និងត្រូវបានក្រុមគ្រូពេទ្យយកសំណាកទៅវិភាគរកឃើញវិជ្ជមានវីរុសកូវីដ-១៩។ ដោយសារស្ថានភាពអ្នកជំងឺកាន់តែវិវត្តធ្ងន់ធ្ងរទៅៗ ហើយក្រុមគ្រូពេទ្យបានជួយសង្គ្រោះតាមបច្ចេកទេស រួមទាំងការប្រើប្រាស់ម៉ាស៊ីនជំនួយផ្លូវដង្ហើមផង ប៉ុន្តែនៅតែមិនអាចជួយសង្គ្រោះបាន។
នៅថ្ងៃនេះ ក៏មានជនជាតិបារាំងម្នាក់អាយុ៨៦ឆ្នាំ និងបុរសជនជាតិខ្មែរអាយុ៥៨ឆ្នាំ បានស្លាប់ដោយសារជំងឺកូវីដ-១៩នេះដែរ។ នេះបើតាមសេចក្តីប្រកាសព័ត៌មានដាច់ដោយឡែកចំនួន២ របស់ក្រសួងសុខាភិបាល។
របាយការណ៍របស់ក្រសួងសុខាភិបាល នៅថ្ងៃទី១៤ ខែមេសា ឆ្នាំ២០២១នេះ ឱ្យដឹងថា គិតចាប់តាំងពីថ្ងៃទី២០ ខែកុម្ភៈ មកដល់ថ្ងៃម្សិលមិញ មានអ្នកជំងឺ៣៥នាក់ស្លាប់ ហើយបើគិតករណីអ្នកស្លាប់៣នាក់ថ្មីទៀតនៅថ្ងៃនេះ បានធ្វើឱ្យតួលេខអ្នកស្លាប់កើនដល់៣៨នាក់ ខណៈចំនួនអ្នកឆ្លងបានកើនដល់២ ៤៩៧នាក់។
ក្រសួងបន្តថា ចំពោះចំនួនអ្នកឆ្លងសរុបក្នុងរយៈពេលជាង១ឆ្នាំមកនេះ បានកើនដល់៤ ៨៧៤នាក់ ក្នុងនោះមានអ្នកជាសះស្បើយចំនួន២ ២៩០នាក់ និងកំពុងសម្រាកព្យាបាលមានចំនួន២ ៥៤៤នាក់៕
