រដ្ឋាភិបាលបានប្រកាសជាផ្លូវការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាល ជាបណ្តោះអាសន្ន រយៈពេល១៤ថ្ងៃ គិតចាប់ពីម៉ោងសូន្យថ្ងៃទី១៥ ខែមេសានេះ ដល់ថ្ងៃទី២៨ ខែមេសា ឆ្នាំ២០២១។
សេចក្តីសម្រេចរបស់រដ្ឋាភិបាល ចុះថ្ងៃទី១៤ ខែមេសា ឆ្នាំ២០២១ បានលើកឡើងថា ការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្តាលនេះ ធ្វើឡើងដើម្បីធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ-១៩ និងទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត។
សេចក្តីសម្រេចរបស់រដ្ឋាភិបាលបន្តថា ក្នុងអំឡុងពេលនៃការអនុវត្តវិធានការនេះ បុគ្គលគ្រប់រូបត្រូវបានហាមឃាត់មិនឱ្យធ្វើដំណើរចេញពីលំនៅដ្ឋានឬទីសំណាក់បច្ចុប្បន្នរបស់ខ្លួនប្រសិនបើគ្មានការចាំបាច់។
ប៉ុន្តែការធ្វើដំណើរចេញក្រៅពីលំនៅឋានឬទីសំណាក់ អាចត្រូវបានអនុញ្ញាតក្នុងករណីចាំបាច់មួយចំនួនដូចជា ការធ្វើដំណើរទៅបំពេញការងារ ឬប្រកបមុខរបរ ឬអាជីវកម្មមួយចំនួន ដោយមានភ្ជាប់ឯកសារបញ្ជាក់ពីការងារ មុខរបរ ឬអាជីវកម្ម ដែលចេញដោយទីកន្លែងអាជីវកម្មពាក់ព័ន្ធ ឬអាជ្ញាធរដែនដីដែលនៅទីតាំងជិតបំផុត, ការធ្វើដំណើរទៅកន្លែងលក់ម្ហូបអាហារឬគ្រឿងឧបភោគបរិភោគ និងសម្ភារប្រើប្រាស់ចាំបាច់ប្រចាំថ្ងៃ ដែលអនុញ្ញាតឱ្យបើកដំណើរការដោយអាជ្ញាធរ ប៉ុន្តែការធ្វើដំណើរនោះអាចធ្វើឡើងដោយសមាជិកយ៉ាងច្រើន២នាក់ក្នុងមួយលំនៅឋាន និងមិនឱ្យលើសពី៣ដងក្នុងមួយសប្តាហ៍ ក្នុងភូមិសាស្ត្រក្រុងឬខណ្ឌដែលខ្លួនរស់នៅ ដោយត្រូវយកតាមខ្លួននូវអត្តសញ្ញាណបណ្ណសញ្ជាតិខ្មែរ ឬបណ្ណសម្គាល់ខ្លួន។
សេចក្តីសម្រេចបន្តទៀតថា ការធ្វើដំណើរទៅកាន់មន្ទីរពេទ្យ មណ្ឌលសុខភាព សម្ភព ទីកន្លែងព្យាបាល ឬឱសថស្ថាន ដោយមូលហេតុសុខភាពបន្ទាន់ ក៏ត្រូវបានអនុញ្ញាតពីអាជ្ញាធរ ប៉ុន្តែមិនឱ្យលើសពី៤នាក់សម្រាប់ករណីនីមួយៗ និងត្រូវអនុវត្តដាច់ខាតនូវវិធានការសុវត្ថិភាព។
ចំណែកការធ្វើដំណើរទៅបង្ហាញខ្លួនឱ្យមន្ត្រីសុខាភិបាលធ្វើការយកវត្ថុសំណាកទៅវិភាគរកមេរោគកូវីដ-១៩ និងការចាក់វ៉ាក់សាំងបង្ការកូវីដ-១៩, ការធ្វើដំណើរដើម្បីចូលរួមសកម្មភាពដែលបម្រើផលប្រយោជន៍សាធារណៈ, ការធ្វើសកម្មភាពកីឡាជាលក្ខណៈបុគ្គលដែលមិនលើសពី២នាក់, ការធ្វើដំណើររបស់មន្ត្រីការទូត មន្ត្រីបុគ្គលិកនៃស្ថានតំណាងបរទេស ទីភ្នាក់ងារអង្គការសហប្រជាជាតិ អង្គការហិរញ្ញវត្ថុអន្តរជាតិ អង្គការអន្តរជាតិ រួមនឹងអ្នកសារព័ត៌មាន ក៏ត្រូវបានអនុញ្ញាតឱ្យធ្វើដំណើរ ប៉ុន្តែត្រូវភ្ជាប់នូវឯកសារបញ្ជាក់អំពីអត្តសញ្ញាណនិងការងារ។
ការធ្វើដំណើរចេញ-ចូលតំបន់បិទខ្ទប់តាមផ្លូវអាកាស និងការធ្វើដំណើរដោយមូលហេតុចាំបាច់ផ្សេងទៀត ត្រូវមានការអនុញ្ញាតជាមុនពីអាជ្ញាធរមានសមត្ថកិច្ចដែលអនុវត្តវិធានការបិទខ្ទប់ និងគោរពតាមបទប្បញត្តិនិងវិធានការសុខាភិបាល។
សេចក្តីសម្រេចរបស់រដ្ឋាភិបាលបានបញ្ជាក់ទៀតថា វិធានការបិទខ្ទប់នេះត្រូវបានហាមឃាត់រាល់សកម្មភាពការងារ មុខរបរ ឬអាជីវកម្មទាំងអស់ ដែលមិនមែនជាតម្រូវការចាំបាច់ប្រចាំថ្ងៃ លើកលែងតែសកម្មភាពការងាររបស់ស្ថាប័នសាធារណៈ និងកងកម្លាំងប្រដាប់អាវុធ រោងចក្រ សហគ្រាស សិប្បកម្ម ឬទីកន្លែងផលិតម្ហូបអាហារនិងគ្រឿងឧបភោគបរិភោគ រួមទាំងទីសត្តឃាត។
ចំពោះសកម្មភាពការងារដែលពាក់ព័ន្ធនឹងការផ្តល់សេវាសាធារណៈ ការងារឬអាជីវកម្មដែលដំណើរការតាមរយៈប្រព័ន្ធអនឡាញ ការផ្គត់ផ្គង់ទំនិញដែលជាតម្រូវការចាំបាច់ប្រចាំថ្ងៃ ដូចជា ហាងលក់ទំនិញ ផ្សារលក់ដុំ ផ្សារឬទីតាំងលក់ដូរគ្រឿងឧបភោគបរិភោគ ផ្សារម៉ាត ភោជនីយដ្ឋាន-អាហារដ្ឋានដែលលក់អាហារវេចខ្ចប់ ស្ថានីយប្រេងឥន្ធនៈ-ហ្គាស ឬទីតាំងផ្គត់ផ្គង់ទំនិញដែលជាតម្រូវការចាំបាច់ប្រចាំថ្ងៃផ្សេងទៀត ក៏ត្រូវបានអនុញ្ញាតឱ្យដំណើរការ ប៉ុន្តែត្រូវសុំការអនុញ្ញាតពីអាជ្ញាធរមានសមត្ថកិច្ច។
ក្រៅពីនោះ រដ្ឋាភិបាលក៏អនុញ្ញាតចំពោះសកម្មភាពការងារឬអាជីវកម្មមួយចំនួនទៀតដូចជា ការផ្គត់ផ្គង់សេវាដែលជាតម្រូវការចាំបាច់ប្រចាំថ្ងៃ ជាអាទិ៍ សេវាសង្គ្រោះបន្ទាន់ សេវាសុខាភិបាលនិងឱសថស្ថាន សេវាប្រៃសណីយ៍-ទូរគមនាគមន៍ សេវាធនាគារនិងហិរញ្ញវត្ថុ សេវាសណ្ឋាគារនិងផ្ទះសំណាក់ សេវាដឹកជញ្ជូនទំនិញចាំបាច់ សេវាកម្មដឹកជញ្ជូនទំនិញទូទៅចេញ-ចូល ឬឆ្លងកាត់ភូមិសាស្ត្រដែលត្រូវបានបិទខ្ទប់ ដើម្បីបម្រើវិស័យសង្គម-សេដ្ឋកិច្ចនៃប្រទេស និងសកម្មភាពការងារ មុខរបរ ឬអាជីវកម្មចាំបាច់ដទៃទៀត ដោយមានការអនុញ្ញាតពីអាជ្ញាធរ។
សេចក្តីសម្រេចរបស់រដ្ឋាភិបាលបានបន្តទៀតថា ក្នុងអំឡុងពេលនៃការអនុវត្តវិធានការបិទខ្ទប់នេះ ត្រូវហាមឃាត់រាល់ការជួបជុំ ឬការប្រមូលផ្តុំមនុស្សច្រើន ប៉ុន្តែអាចលើកលែងសម្រាប់ការជួបជុំក្នុងចំណោមសមាជិកគ្រួសារ ការរៀបចំពិធីបុណ្យសព ការប្រមូលផ្តុំរបស់បុគ្គលិកសុខាភិបាល ការជួបជុំរបស់អាជ្ញាធរមានសមត្ថកិច្ច កម្លាំងគណៈបញ្ជាការឯកភាពរដ្ឋបាលគ្រប់លំដាប់ថ្នាក់ក្នុងការបំពេញការងារថែរក្សាសន្តិសុខ សណ្តាប់ធ្នាប់ និងរបៀបរៀបរយសាធារណៈ។
រាល់ការធ្វើដំណើរដែលត្រូវបានអនុញ្ញាតនេះ មិនត្រូវធ្វើឡើងនៅចន្លោះម៉ោង៨យប់ដល់ម៉ោង៥ភ្លឺ លើកលែងតែការធ្វើដំណើរដោយមូលហេតុសុខភាពបន្ទាន់ មូលហេតុចាំបាច់និងបន្ទាន់ក្នុងគ្រួសារ ការដឹកជញ្ជូនទំនិញ ការបំពេញកាតព្វកិច្ចដែលបម្រើផលប្រយោជន៍សាធារណៈ ការធ្វើដំណើរទៅនិងមកពីកន្លែងការងារក្នុងសហគ្រាស គ្រឹះស្ថាន ឬទីតាំងអាជីវកម្មដែលត្រូវបានលើកលែងឱ្យបើកដំណើរការ និងករណីចាំបាច់ដទៃទៀតដែលមានការអនុញ្ញាតពីអាជ្ញាធរ។
សេចក្តីសម្រេចរបស់រដ្ឋាភិបាលក៏បានសម្រេចបង្កើតគណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់នេះផងដែរ ដោយមានលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាប្រធាន និងមានអនុប្រធាន អនុប្រធានអចិន្ត្រៃយ៍ និងសមាជិក សរុបចំនួន១៩នាក់។
គណៈកម្មការជាតិនេះមានភារកិច្ចដាក់ចេញនូវវិធានការលម្អិតនានា សំដៅធានាដល់ប្រសិទ្ធភាពនៃការអនុវត្តវិធានការបិទខ្ទប់ និងការគ្រប់គ្រងការឆ្លងរាលដាលជំងឺកូវីដ-១៩ នៅក្នុងដែនដីដែលត្រូវបានបិទខ្ទប់ ក៏ដូចជាទប់ស្កាត់ជំងឺនេះមិនឱ្យរាលដាលទៅតំបន់ផ្សេងទៀត រួមទាំងការដាក់ចេញនូវគោលនយោបាយនិងវិធានការ ដើម្បីគាំពារនិងជួយសង្គ្រោះដល់ជនក្រីក្រនិងជនងាយរងគ្រោះក្នុងអំឡុងពេលបិទខ្ទប់។
ស្របពេលគ្នានេះដែរ លោកនាយករដ្ឋមន្ត្រី ហ៊ុន សែន តាមរយៈការថ្លែងសារពិសេសនៅយប់ថ្ងៃទី១៤ ខែមេសា បានអំពាវនាវដល់ប្រជាពលរដ្ឋកុំភិតភ័យស្លន់ស្លោចំពោះការដាក់ចេញនូវវិធានការបិទខ្ទប់នេះ។
លោកថា៖ «ប្រសិនបើបងប្អូនបានឃើញ និងសិក្សាឱ្យបានច្បាស់ អំពីសេចក្តីសម្រេចរបស់រាជរដ្ឋាភិបាលនេះ បងប្អូនពិតជាមិនមានការព្រួយបារម្ភហួសហេតុពេកនោះទេ […] ខ្ញុំព្រះករុណាខ្ញុំសូមបញ្ជាក់ថា បងប្អូននឹងមិនដាច់បាយ មិនខ្វះអង្ករ មិនខ្វះអំបិល មិនខ្វះស្បៀងអាហារសម្រាប់ការផ្គត់ផ្គង់នៅក្នុងទីក្រុងភ្នំពេញនោះទេ បន្លែបង្ការដែលធ្លាប់ផ្គត់ផ្គង់ចូលពីខេត្តកណ្តាលទៅទីក្រុងភ្នំពេញ អាចនឹងត្រូវទទួលបានការអនុញ្ញាតឱ្យនាំចូលទៅចែកចាយនៅក្នុងទីក្រុងភ្នំពេញ ដើម្បីផ្តល់ឱ្យសម្រាប់ការផ្គត់ផ្គង់នៅទីក្រុងភ្នំពេញដដែល»។
លោកនាយករដ្ឋមន្ត្រី ហ៊ុន សែន ក៏បានបញ្ជាទៅរដ្ឋបាលរាជធានីភ្នំពេញ ត្រូវយកចិត្តទុកដាក់និងផ្តល់នូវជំនួយសង្គ្រោះ ជួយដល់ប្រជាពលរដ្ឋនៅតំបន់ក្រីក្រ និងឱ្យក្រសួងស្ថាប័នពាក់ព័ន្ធ ពិនិត្យនិងទប់ស្កាត់កុំឱ្យឈ្មួញឆ្លៀតឱកាសដំឡើងថ្លៃទំនិញនៅលើទីផ្សារផងដែរ។
លោកក៏បានអំពាវនាវជាថ្មីម្តងទៀតដល់ប្រជាពលរដ្ឋអត់ធ្មត់ និងកុំចេញពីផ្ទះបើមិនចាំបាច់ ហើយត្រូវអនុវត្តវិធានសុខាភិបាលឱ្យបានខ្ជាប់ខ្ជួន ដើម្បីចូលរួមទប់ស្កាត់ការឆ្លងរាលដាលជំងឺកូវីដ-១៩។
លោកបានគូសបញ្ជាក់ថា៖ «សូមអង្វរករបងប្អូនប្រជាពលរដ្ឋរបស់យើងខិតខំឡើង រួមគ្នាដើម្បីបញ្ចប់នូវព្រឹត្តិការណ៍ដ៏គ្រោះថ្នាក់នេះ។ យើងកំពុងស្ថិតនៅមាត់ជ្រោះនៃមរណៈហើយ ប្រសិនបើយើងមិនប្រឹងរួមគ្នា យើងនឹងឈានទៅរកមរណៈពិតប្រាកដ ដូច្នេះវិធីតែមួយគត់ គឺរួមដៃគ្នាទាំងរដ្ឋនិងប្រជាជន»៕
