ក្រសួងសុខាភិបាលអះអាងថា បានរកឃើញអ្នកវិជ្ជមានជំងឺកូវីដ-១៩ ចំនួន២៦២នាក់បន្ថែមទៀត ខណៈអ្នកជំងឺចំនួន៧៤នាក់ត្រូវបានព្យាបាលឱ្យជាសះស្បើយនិងអនុញ្ញាតឱ្យចេញពីកន្លែងសម្រាកព្យាបាលផងដែរ។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១៦ ខែមេសា ឆ្នាំ២០២១ បញ្ជាក់ថា អ្នកវិជ្ជមានកូវីដ-១៩ ជាង២០០នាក់នោះ ជាអ្នកឆ្លងពាក់ព័ន្ធព្រឹត្តិការណ៍សហគមន៍២០កុម្ភៈទាំងអស់ ដោយមិនមានករណីនាំចូលពីក្រៅប្រទេសនោះឡើយ។
អ្នកជំងឺកូវីដ-១៩ ទាំងនោះ រួមមាន រាជធានីភ្នំពេញ ២៣២នាក់, ព្រះសីហនុ ១២នាក់, កណ្តាល ៤នាក់, ពោធិ៍សាត់ ២នាក់, ព្រៃវែង ២នាក់, តាកែវ ២នាក់, សៀមរាប ២នាក់, កំពង់ចាម ២នាក់, កំពង់ធំ ១នាក់, កំពង់ស្ពឺ ១នាក់, ស្វាយរៀង ១នាក់ និងខេត្តត្បូងឃ្មុំ ១នាក់។
ទំព័រហ្វេសប៊ុករបស់ក្រសួងសុខាភិបាលនៅថ្ងៃនេះ បានជំរុញឱ្យពលរដ្ឋត្រូវរួមគ្នាប្រយុទ្ធនឹងសត្រូវអត់ស្រមោលកូវីដ-១៩ ដើម្បីចៀសផុតពីជ្រោះមរណ:ដោយសារជំងឺដ៏កាចសាហាវមួយនេះ។
ទំព័រហ្វេសប៊ុកក្រសួងសរសេរថា៖ «ធ្វើសកម្មភាពរួមគ្នា ដើម្បីប្រយុទ្ធនឹងវីរុសកូវីដ-១៩ សម្រាប់ការរស់នៅល្អប្រសើរនៅថ្ងៃស្អែក សម្រាប់ឆ្នាំល្អប្រសើរ និងសម្រាប់អនាគតល្អប្រសើរ។ សិទ្ធិរបស់អ្នក គឺជាសិទ្ធិដែលត្រូវបានការពារពីការចម្លងវីរុសកូវីដ-១៩ ពីបុគ្គលម្នាក់ទៅបុគ្គលម្នាក់ទៀត។ ដូច្នេះ យើងទាំងអស់គ្នាត្រូវអនុវត្តសិទ្ធិរបស់យើងក្នុងការវាយបកធ្វើឱ្យវីរុសកូវីដ-១៩ ទទួលរងនូវការបរាជ័យ ដោយស្នាដៃពួកយើងទាំងអស់គ្នា។ សូមមានសុវត្ថិភាពល្អទាំងអស់គ្នា ដោយនៅផ្ទះ»។
អ្នកឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ មានចំនួនកើនដល់៤ ៩៣៨នាក់ និងស្លាប់ចំនួន៣៨នាក់ គិតថ្ងៃទី១៦ ខែមេសា ឆ្នាំ២០២១។
ក្រសួងបញ្ជាក់ថា គិតត្រឹមថ្ងៃសុក្រនេះ អ្នកឆ្លងជំងឺកូវីដ-១៩ ទូទាំងប្រទេសសរុបចំនួន៥ ៤៨០នាក់ ព្យាបាលជាសះស្បើយ២ ៣៩៣នាក់ និងកំពុងសម្រាកព្យាបាល៣ ០៤៤នាក់៕
