ស្ថានទូតចិនប្រចាំកម្ពុជា បានអះអាងថា វ៉ាក់សាំងចិន Sinovac ដែលកម្ពុជាបញ្ជាទិញពីរដ្ឋាភិបាលចិនជំហានទីពីរ ចំនួន៥០ម៉ឺនដូស នឹងមកដល់កម្ពុជា នៅថ្ងៃទី១៧ ខែមេសា ឆ្នាំ២០២១។
ទំព័រហ្វេសប៊ុករបស់ស្ថានទូតចិនប្រចាំកម្ពុជានៅថ្ងៃសុក្រនេះ បានបញ្ជាក់ថា វ៉ាក់សាំងចិន Sinovac ដែលជាការបញ្ជាទិញជំហានទីពីររបស់រាជរដ្ឋាភិបាលកម្ពុជា ចំនួន៥០ម៉ឺនដូស នឹងដឹកជញ្ជូនមកដល់អាកាសយានដ្ឋានអន្តរជាតិរាជធានីភ្នំពេញ នាថ្ងៃទី១៧ ខែមេសា ស្អែកនេះ។
ស្ថានទូតចិននិយាយទៀតថា ទោះបីជាប្រទេសចិនស្ថិតក្នុងស្ថានភាពដែលមានតម្រូវការវ៉ាក់សាំងក៏ដោយ ក៏នៅតែបន្តផ្តល់ទៅតាមតម្រូវការបញ្ជាទិញរបស់ភាគីកម្ពុជាដែរ។
ទំព័រហ្វេសប៊ុកស្ថានទូតចិនសរសេរបន្តថា៖ «នេះបានបង្ហាញយ៉ាងច្បាស់អំពីចំណងមិត្តភាពដែកថែបប្រៀបដូចបងប្អូនរវាងប្រទេសទាំងពីរ។ សង្ឃឹមថា វ៉ាក់សាំងចិនអាចរួមចំណែកយ៉ាងសកម្មជូនដល់ប្រជាជនកម្ពុជា ក្នុងកិច្ចការប្រយុទ្ធប្រឆាំងជំងឺវីរុសកូវីដ-១៩»។
កាលពីថ្ងៃទី១៣ ខែមេសា ស្ថានទូតចិនដដែលឱ្យដឹងថា ដើម្បីគាំទ្ររាជរដ្ឋាភិបាលកម្ពុជា ក្នុងកិច្ចប្រយុទ្ធប្រឆាំងជំងឺកូវីដ-១៩ រដ្ឋាភិបាលចិនសម្រេចផ្តល់ជំនួយឥតសំណងជាវ៉ាក់សាំង ស៊ីណូហ្វាម (Sinopharm) ចំនួន៤០ម៉ឺនដូសបន្ថែមទៀតដល់ភាគីកម្ពុជា។ វ៉ាក់សាំងទាំងនេះនឹងដឹកជញ្ជូនមកដល់កម្ពុជា នាចុងខែមេសាខាងមុខនេះ តាមរយៈជើងហោះហើរពាណិជ្ជកម្ម។
គិតត្រឹមថ្ងៃទី១៤ ខែមេសា កម្ពុជាបានទទួលជំនួយវ៉ាក់សាំងចិនដែលមានប្រភេទស៊ីណូវ៉ាក់ (Sinovac) ស៊ីណូហ្វាម (Sinopharm) និង Covishield សរុប១ ១០០ ០០០ដូស និងបានបញ្ជាទិញពីប្រទេសនេះបន្ថែមចំនួន១ ៥០០ ០០០ដូស ក្នុងតម្លៃ១៥ ០០០ ០០០ដុល្លារ។
កាលពីថ្ងៃទី១២ ខែមេសា អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន មានប្រសាសន៍ថា កម្ពុជាមិនទាន់អាចបញ្ជាទិញវ៉ាក់សាំងប្រឆាំងវីរុសកូវីដ-១៩ ពីប្រទេសផ្សេងៗក្រៅពីប្រទេសចិនបាននោះទេ ដោយសារបញ្ហាការដឹកជញ្ជូន និងផលិតកម្ម។
យ៉ាងណាក្តី អ្នកនាំពាក្យស្ថានទូតសហរដ្ឋអាមេរិកប្រចាំនៅកម្ពុជា លោក Chad Roedemeier ធ្លាប់ប្រាប់ វីអូឌី ថា វ៉ាក់សាំងកូវីដ-១៩ នឹងមកដល់កម្ពុជា ដើម្បីបង្គ្រប់១ ១០០ ០០០ដូស តាមគម្រោងនៅមុនដំណាច់ខែឧសភា និងបញ្ជូនមកបន្ថែមទៀតជាបន្តបន្ទាប់ក្រោមគម្រោង Covax របស់អង្គការសុខភាពពិភពលោក ដែលមានអាមេរិកជាប្រទេសផ្តល់ជំនួយហិរញ្ញវត្ថុធំបំផុត។
ប្រមុខរដ្ឋាភិបាលធ្លាប់ប្រកាសពីគម្រោងចាក់ដល់ពលរដ្ឋឱ្យបាន៧០ភាគរយ ឬស្មើនឹង១០ ០០០ ០០០នាក់ នៅមុនដំណាច់ឆ្នាំ២០២២ ដើម្បីធានាភាពផ្សាំរបស់ពលរដ្ឋប្រឆាំងនឹងជំងឺផ្លូវដង្ហើមថ្មីមួយនេះ៕
