ទូត​ខ្មែរ​នៅ​ម៉ាឡេស៊ី​ ប្រាប់​ពលរដ្ឋ​ខ្មែរ​ដែល​ផុត​ទិដ្ឋាការ​ស្នាក់​នៅ​ទី​នោះ​ត្រឡប់​មក​កម្ពុជា​វិញ​

ពលរដ្ឋខ្មែរដែលត្រលប់មកពីប្រទេសម៉ាឡេស៊ី មកដល់ព្រលានយន្ដហោះអន្តរជាតិភ្នំពេញ កាលពីថ្ងៃទី១៦ ខែមិថុនា ឆ្នាំ២០២០។ (ជន ចាន់រ៉ែន)

អាជ្ញាធរម៉ាឡេស៊ី បានជូនដំណឹងដល់​ប្រជាពលរដ្ឋខ្មែរដែលកំពុង​​រស់នៅក្នុងប្រទេសម៉ាឡេស៊ី​ ដែលមានទិដ្ឋាការស្នាក់នៅបណ្ដោះអាសន្នអស់សុពលភាព (special pass) ត្រូវចាកចេញពីប្រទេសម៉ាឡេស៊ី មិនឱ្យហួសថ្ងៃទី​២១ ខែមេសា ឆ្នាំ២០២១នេះ បើពុំនោះទេនឹងត្រូវប្រឈមនឹង​ផ្លូវច្បាប់។

យោងតាមសេចក្ដីជូនដំណឹងរបស់ស្ថានទូតកម្ពុជាប្រចាំប្រទេសម៉ាឡេស៊ី ដែលចេញនៅថ្ងៃនេះ បានឱ្យដឹងថា កាលពីថ្ងៃទី១៥ ខែមេសា​ ឆ្នាំ២០២១ ទូតកម្ពុជា បានទទួលដំណឹងពីក្រសួង​ការបរទេសម៉ាឡេស៊ី ពាក់ព័ន្ធនឹងជនបរទេសទាំងអស់ដែលមានទិដ្ឋាការស្នាក់នៅបណ្ដោះអាសន្ន (special pass) អស់សុពលភាព ត្រូវចាកចេញពីប្រទេសម៉ាឡេស៊ី មិនឱ្យហួសថ្ងៃទី២១ ខែមេសា ឆ្នាំ២០២១ ព្រោះនាយកដ្ឋានអន្តោប្រវេសន៍ម៉ាឡេស៊ី នឹងចាប់អនុវត្តច្បាប់និងបទបញ្ជាឬបទប្បញ្ញតិ្តផ្សេងៗរបស់រាជរដ្ឋាភិបាលម៉ាឡេស៊ី។

ករណីនេះ ស្ថាតទូតកម្ពុជាប្រចាំប្រទេសម៉ាឡេស៊ី ណែនាំ​​ទៅកាន់ប្រជាពលរដ្ឋខ្មែរ សិស្ស/និសិ្សត ពលករ/ពលការិនី និងអ្នកដែលមានទីលំនៅអចិន្ត្រៃយ៍ឬបណ្ដោះអាសន្ន ដែលកំពុងរស់នៅក្នុងប្រទេសនេះ និងមានទិដ្ឋាការស្នាក់នៅបណ្ដោះអាសន្នអស់សុពលភាព ហើយប្រឈមការលំបាកត្រលប់ទៅស្រុកកំណើតវិញ ដោយសារតែការរីករាលដាលនៃជំងឺកូវីដ-១៩ អាចដាក់ពាក្យ​ស្នើសុំ​ពន្យារពេលស្នាក់នៅបាន។

ស្ថានទូតបញ្ជាក់ថា៖ «រាល់ឯកសារស្នើសុំ​ ត្រូវតែមានការបញ្ជាក់យល់ព្រមនិងសម្របសម្រួលដោយស្ថានទូតកម្ពុជាប្រចាំប្រទេសម៉ាឡេស៊ី មុន​នឹង​ដាក់ពាក្យស្នើសុំ​បន្តទៅនាយកដ្ឋានអន្តោប្រវេសន៍របស់ម៉ាឡេស៊ី»៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ