ក្រសួងសុខាភិបាលប្រកាសថា អ្នកជំងឺកូវីដ-១៩ ចំនួន២នាក់បន្ថែមទៀតបានស្លាប់ដោយសារវីរុសផ្លូវដង្ហើមមួយនេះ ដែលនាំឱ្យចំនួនអ្នកស្លាប់ដោយជំងឺកូវីដ-១៩ បានកើនឡើងដល់៥៦នាក់។
សេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី២១ ខែមេសា ឆ្នាំ២០២១ បញ្ជាក់ថា អ្នកជំងឺកូវីដ-១៩ ទាំង២នាក់ដែលស្លាប់នៅថ្ងៃទី២១ ខែមេសានេះ ជាស្ត្រីជនជាតិខ្មែរ និងមានវ័យ៥៤ឆ្នាំទាំង២នាក់។ ពួកគាត់ទាំង២នាក់នោះជាអ្នករស់នៅរាជធានីភ្នំពេញ និងបានចូលសម្រាកព្យាបាលជំងឺនៅមន្ទីរពេទ្យមិត្តភាពខ្មែរ-សូវៀត (មន្ទីរពេទ្យរុស្ស៊ី) នៅថ្ងៃទី១០ ខែមេសា និងម្នាក់ទៀតចូលសម្រាកនៅថ្ងៃទី១២ ខែមេសា បន្ទាប់ពីពួកគាត់រកឃើញវិជ្ជមានកូវីដ-១៩។
ក្រសួងសុខាភិបាលបញ្ជាក់ថា អ្នកជំងឺទាំង២នាក់ដែលបានស្លាប់នៅថ្ងៃពុធនេះ ដោយសារមានបញ្ហាផ្លូវដង្ហើមធ្ងន់ធ្ងរ និងរលាកសួតទាំងសងខាងធ្ងន់ធ្ងរបង្កឡើងពីវីរុសកូវីដ-១៩។
គិតដល់ត្រឹមថ្ងៃទី២១ ខែមេសា ឆ្នាំ២០២១នេះ អ្នកជំងឺកូវីដ-១៩ ចំនួន៥៦នាក់ហើយបានស្លាប់ដោយសារមេរោគនេះ៕
